Lukautim Gutnem Bilong Yu

WOK bilong skelim gut wanpela naispela piksa ol man i wokim em i gutpela wok tru. Taim man i lukluk gut long en, em inap lukim planti handet liklik mak bilong bras em man bilong wokim piksa i bin putim bambai piksa i gat kain kain kala.

Olsem tasol, bilong kisim gutnem man i mas mekim planti liklik liklik gutpela pasin inap sampela taim. Yumi ken tok piksa olsem: Man i no inap kisim bras na putim wanpela bikpela mak na nau piksa i kamap gutpela. Nogat. Isi isi yumi kisim gutnem long rot bilong ol gutpela pasin yumi mekim.

Na tu, taim man bilong penim piksa em i no holim gut bras na em i penim kranki wanpela hap, dispela inap bagarapim dispela piksa. Na i wankain long nem bilong yumi. Saveman King Solomon i tok: “Sampela manmeri i save mekim longlong pasin na bagarapim ol yet.” (Sindaun 19:⁠3) Man i mekim wanpela longlong pasin tasol​—⁠ating em i belhat nogut tru, o em i dring spak, o mekim pasin pamuk​—⁠dispela inap bagarapim gutnem bilong em. (Sindaun 6:​32; 14:17; 20:⁠1) Olsem na em i bikpela samting long yumi mas wok strong long kisim gutnem na wok strong long lukautim gut.​—⁠Skelim wantaim KTH 3:⁠5.