Ol Naispela Ston i Gat Laip Long Namibia!

Ol Naispela Ston i Gat Laip Long Namibia!

NAMIBIA, em i longpela hap graun i bihainim nambis inap 1,500 kilomita samting long hap saut-wes bilong Afrika. Nambis olgeta bilong dispela kantri i gat ol liklik maunten wesan, ol maunten ston, na ol bikpela ples daun i gat ol liklik liklik ston. Namel long ol liklik liklik ston long nambis bilong Namibia, i gat ol naispela ston i gat ol kain kain kala. Sampela taim ol i painim ston daimon tu long dispela hap. Tasol dispela kantri i gat samting i naispela moa na i winim ol dispela ston. Namibia i gat ol naispela ston i gat laip—⁠em ol man bilong kain kain lain.

Ol man i stap pastaim tru long Namibia ol i save mekim ol tok ples em wanpela tok ples ol i kolim Koisan i as bilong en. Toktok bilong ol i gat krai olsem klik klik. Namel long ol lain i save mekim tok ples Koisan long nau em ol Damara, em skin bilong ol i blak, na ol Nama, em skin bilong ol i wait liklik na ol i sotpela man, na ol Busman em ol i gat nem long painim abus. Insait long sampela handet yia i go pinis, planti ol lain blakskin ol tu i kam long Namibia. I gat 3-pela bikpela lain insait long ol dispela lain: ol Ovambo (em wanpela bikpela lain tru long Namibia), ol Herero, na ol Kavango. Bihain long yia 1800 ol man bilong Yurop ol i kam sindaun long Namibia. Sampela man moa bilong ol narapela kantri ol i kam long Namibia bihain long ol i painimaut olsem i gat ol ston daimon long dispela ples wesan nating.

Ol manmeri bilong Namibia ol i olsem naispela samting tru, long wanem, ol i insait long ol lain bilong graun em God i givim pikinini bilong em long ol, na opim rot bilong ol i ken kisim laip oltaim. (Jon 3:16) Planti handet manmeri bilong ol lain long Namibia i kisim save pinis long dispela tok bilong God i kisim bek ol man na ol i bihainim. Ol i olsem ol naispela ston i gat laip, long wanem, ol i insait long “ol gutpela samting bilong olgeta lain” nau ol i bungim ol i kam long haus lotu bilong Jehova.—⁠Hagai 2:⁠7, NW.

Wok Bilong Painim Ol Samting Bilong Spirit i Kirap

Long 1928, wok i kirap bilong painim ol gutpela samting bilong spirit long Namibia. Long dispela yia, brens bilong Sosaiti Was Taua long Saut Afrika i salim 50,000 nius samting bilong Baibel i go long ol man i stap nabaut long dispela kantri. Long yia bihain, Lenie Theron, em wanpela Kristen bilong lain God i bin makim na em i bilong Saut Afrika, em i go painim ol man i bin kisim nius na ol i laik harim tok. Insait long 4-pela mun em wanpela tasol i autim tok long dispela bikpela kantri na em i tilim 6,000 buk samting long tok Afrikans, Inglis, na Jemani, em ol buk bilong helpim ol man long stadi long Baibel. Dispela wok em i mekim i no lus nating.

Olsem: Tingim Bernhard Baade, em wanpela man bilong Jemani i bin wok long main bilong painim ston daimon samting. Long 1929 em i save kisim kiau long wanpela fama i save karamapim wan wan kiau long wanpela pes bilong wanpela buk bilong Sosaiti Was Taua. Bernhard i amamas long kaunim olgeta pes em i kisim, na em i wok long tingting long husat man i raitim dispela buk. Bihain em i kaunim laspela pes i gat atres bilong Sosaiti Was Taua bilong Jemani long en. Bernhard i raitim pas long ol na askim ol long salim sampela buk samting moa long em, na em i kamap namba wan man bilong Namibia long kisim tok i tru.

Ol Misineri i Kam

Long 1950, 4-pela misineri i bin skul long Wastaua Baibel Skul Bilong Gileat ol i kamap long Namibia. Long 1953, namba bilong ol misineri i go antap long 8-pela. Insait long dispela lain em Dick na Coralie Waldron, em tupela marit bilong Ostrelia na ol i mekim gut yet wok bilong ol long dispela hap. Planti man bilong Saut Afrika na ol narapela kantri ol i save autim tok bilong Kingdom long olgeta de, ol tu i bin insait long dispela wok bilong painim ol naispela samting bilong spirit long Namibia. Ol narapela misineri, na tu, sampela brata i bin go long Skul Bilong Lainim Wok Bilong Lukautim Kongrigesen, Sosaiti i salim ol i go long Namibia.

Narapela samting i helpim dispela wok bilong spirit i go bikpela long Namibia, em wok bilong tanim tok na wokim ol buk samting bilong Baibel long ol bikpela tok ples bilong ol, olsem tok Herero, Kwangali, Kwanyama, Nama/Damara na Ndonga. Kirap long 1990, ol i mekim wok long wanpela gutpela haus em i olsem ofis bilong tanim tok na haus bilong ol man i wok volantia long olgeta de, long biktaun Windhuk. Karen Deppisch i bin wok wantaim man bilong em long autim tok long ol narapela narapela hap bilong Namibia, em i tok: “Planti man i kirap nogut taim mipela i tilim ol buk samting long tok ples bilong ol yet, long wanem, i gat wan wan buk long olgeta kain i stap long tok ples bilong ol.”

Polisim Ol Naispela Ston

Taim solwara i bruk long nambis na sakim wesan i go i kam inap planti tausen yia, dispela i bin polisim sampela naispela ston bilong Namibia. Tasol yumi save dispela kain pasin bilong solwara samting i polisim ol ston daimon tru tru i no inap kamapim ol naispela ston i gat laip. Yumi ol sinman i mas wok strong long rausim “pasin bilong olpela man” na kisim ol nupela pasin bilong Krais. (Efesus 4:20-24) Olsem, pasin bilong lotuim ol tumbuna i dai pinis, em wanpela pasin i strong tru namel long planti ol lain bilong Namibia. Ol man i no insait long mekim ol pasin bilong lotuim ol tumbuna, planti taim ol famili na wantok i birua long ol. Taim wanpela i kisim save long tok bilong Baibel olsem ol daiman “i no inap save long wanpela samting,” i gat wanpela traim ol i mas winim. (Saveman 9:⁠5) Long wanem rot ol i mas winim traim?

Wanpela Witnes i save mekim tok Herero, em i tok: “Mi gat bikpela hatwok tru long bihainim tok i tru. Mi stadi long Baibel wantaim ol Witnes Bilong Jehova, tasol longpela taim i bin lus bambai mi ken bihainim ol tok mi lain long en. Pastaim mi bin mekim traim bambai mi ken save, mi inap tru long i stap gutpela maski mi no bihainim ol pasin tumbuna, o nogat. Olsem: Mi bin ran long ka i go abrusim sampela ples matmat long Namibia, na mi no pasim ka long rot bilong putim wanpela ston antap long matmat o holim hat bilong mi i go antap bilong tok gude long ol daiman. Isi isi mi kisim save olsem i no gat wanpela samting inap painim mi sapos mi no lotuim ol tumbuna i dai pinis. Mi amamas tru long Jehova i bin blesim ol wok mi mekim bilong helpim famili bilong mi na ol narapela man i laik harim tok long kisim save long tok i tru!”

Sot Long Ol Wokman Bilong Painim Ol Samting Bilong Spirit

Paslain long ol misineri i kam long 1950, i gat wanpela pablisa tasol bilong autim gutnius long Namibia. Isi isi namba bilong ol pablisa i wok long go antap na nau i gat 995. Tasol i gat bikpela wok yet i stap bilong mekim. Long sampela hap, ol i bin autim tok wan wan taim tasol long en. Olsem wanem? Yu inap go na wok long hap i sot tru long ol man bilong autim tok bilong Kingdom? Sapos olsem, orait, kam long Namibia na helpim mipela long painim sampela naispela ston moa bilong spirit na polisim ol.—⁠Skelim wantaim Aposel 16:⁠9.

[Mep/Ol Piksa long pes 26]

(Bilong save ol dispela rait i stap we long pes, lukim buk o magasin)

AFRIKA

NAMIBIA

[Ol Piksa]

Namibia em wanpela kantri i gat ol naispela naispela ston

[Ol Kredit Lain]

[Ol Piksa long pes 26]

Ol i autim gutnius long ol narapela narapela lain bilong Namibia

[Piksa long pes 28]

Olsem wanem? Yu inap autim tok long hap i sot long ol man bilong autim tok?