Birua Long Narapela Skin na Lotu

NIUS Time i toktok wantaim Mark Mathabane, em wanpela man bilong raitim buk na mama i bin karim em long Saut Afrika, na em i tok olsem: “Taim mi kam long Amerika long 1978, mi bin ting olsem ol lain bilong Amerika i bin stretim pinis hevi bilong ol long biruaim man bilong narapela skin, na ol blakskin i gat wankain sindaun olsem bilong ol. Long planti samting mi lukim ol i gat wankain sindaun. I olsem Amerika i winim tru Saut Afrika long dispela samting. Tasol mi kirap nogut long kisim save olsem ol man i no bin senisim tru tingting bilong ol.” Olsem wanem em i luksave long dispela samting?

Mathabane i tok: “Long Amerika, wanpela hap taim ol waitskin na blakskin i no ken bung wantaim em long 11 klok long moningtaim long Sande.” Em i tok olsem, long ol haus lotu tu, ol manmeri i no inap kam bung wantaim na lotu wantaim ol lain bilong narapela skin. Em i tok: “Ol bai i gat wanem kain tingting long ol narapela skin long ol narapela de long wik?” Mathabane i toktok long ol skul olsem rot bilong senisim tingting bilong ol man na em i tok: “Taim yumi skul, dispela i mekim na yumi mas orait long tingim olgeta lain i wankain tasol.”

Ol Witnes Bilong Jehova i wanbel olsem skul tasol inap stretim dispela hevi, tasol ol i tok skul em Baibel i as bilong en, em i gutpela moa. Yes, Baibel i save helpim ol long daunim pasin bilong bel nogut long ol man bilong narapela skin​—⁠na ol i save mekim olsem tu long ol hap em pasin bilong bel nogut long ol narapela lain i strong tru. Long olgeta wik long ol Haus Kingdom bilong ol, ol manmeri bilong kain kain skin na ples i save bung wantaim na bai ol i ken skul long ol lo bilong Baibel, em Tok Bilong God. Long ol dispela miting ol i no save singaut long mani. Ol i amamas long yu kam bung!