Taim ‘Win i Kam na i Sakim Yumi’
Man bilong raitim Gutnius, Mak, em i tok “win i kam long poret bilong bot na i sakim ol, na ol i hatwok tru long pul.” Em i mekim dispela tok taim em i stori long samting tru tru i bin painim ol disaipel bilong Jisas long taim ol i stap long wanpela bot na ol i hatwok long brukim solwara Galili. Jisas i stap long nambis, na em i lukim dispela bagarap i laik painim ol na em i wokim mirakel na i wokabaut antap long solwara na i go long ol. Taim em i go insait long bot, na i stap wantaim ol, win i dai.—Mak 6:48-51.
Dispela man bilong raitim Baibel i stori tu long samting i bin kamap pastaim, em i tok wanpela “traipela win i kirap.” Em nau, Jisas i kirap “krosim win, . . . na win i dai, na wara i no mekim nais liklik.”—Mak 4:37-39.
Tru, long nau yumi no inap lukim ol kain mirakel olsem, tasol yumi ken lainim planti samting long ol dispela mirakel. Yumi ol manmeri i gat sin na yumi stap long taim nogut, olsem na ol hevi olsem win i save painim yumi. (2 Timoti 3:1-5) Tru, sampela taim ol traim i painim yumi na i mekim na yumi bel hevi tru na dispela i kamap olsem bikpela win tru. Tasol i gat helpim i stap! Jisas i tokim yumi olsem: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.”—Matyu 11:28.
Taim yumi pilim olsem ‘win i kam na i sakim yumi,’ bai yumi pilim olsem bel bilong yumi i stap isi. Olsem wanem yumi inap pilim olsem? Taim yumi bilip long ol tok promis bilong Jehova em ol i no save popaia.—Skelim wantaim Aisaia 55:9-11; Filipai 4:5-7.