Yu Inap Save Long Ol Samting Bai Kamap Bihain!
Planti manmeri i save tingting strong long ol samting bai kamap long bihain. Ol i skelim gut ol samting ol i laik mekim long bihain, na bungim gut sampela mani, na ol i laik stap bel isi na i no ken pret long ol samting bai kamap. Tasol i gat sampela samting bilong helpim yumi long save gut long ol samting bai painim yumi long bihain?
OL MAN i bin traim kain kain rot bilong kisim save long ol samting bai kamap bihain. Ol saientis i save skelim ol pasin na sindaun samting bilong ol man, na long dispela rot ol i save traim long skelim wanem ol samting bai kamap bihain. Ol saveman bilong mani na wok bisnis, ol i tu i mekim olsem. Ol man bilong lukluk long ol sta bilong kisim save long ol samting i laik kamap bihain, na ol man bilong painim save long ol samting i stap hait, ol i save ritim ol buk i stori long pasin bilong lukluk long ol sta, na ol i mekim wok long glas bal, na ol spirit nogut. Na planti manmeri i save bihainim ol. Olsem: Nostradamus, em wanpela man bilong Frans i save lukluk long ol sta, maski em i dai sampela handet yia i go pinis, ol man i save tingting yet long em.
Olgeta dispela lain i laik kamap olsem profet, tasol tok ol i mekim i no bin kamap tru, na save bilong ol i no bin helpim ol man, long wanem, ol i sakim God Jehova na tok bilong em long Baibel. Long dispela as ol i no inap bekim ol bikpela askim olsem: ‘Olsem wanem mi ken save tru olsem ol samting Baibel i tok profet long en, ol bai kamap tru? Olsem wanem ol dispela samting i stret wantaim ol samting God i laik mekim bilong helpim ol manmeri? Olsem wanem ol dispela tok profet i ken helpim mi wantaim famili bilong mi?’ Baibel i bekim ol dispela askim.
Long planti narapela rot tu, tok profet bilong Baibel i win. Baibel i no olsem ol samting ol man i tokaut long en long rot bilong glasim ol sta. Nogat. Baibel i save larim ol man i skelim ol samting na bihainim sampela laik bilong ol yet. God i no save makim ol samting i mas painim ol man, nogat. (Lo 30:19) Ol buk, olsem bilong Nostradamus, ol i lus tru long skulim ol man long ol stretpela pasin, ol i save skulim ol man long ol tingting i olsem i no gat as bilong en, na long ol samting bilong kirapim nating tingting na bel bilong ol man. Tasol tok profet bilong Baibel i gat ol gutpela tok bilong skulim man long ol stretpela pasin. Baibel i kamapim olsem i gat wanem as na God bai mekim ol samting em i tingting pinis long mekim. (2 Stori 36:15) Na ol tok profet bilong Jehova i save kamap tru, long wanem, “God . . . i no save giaman.” (Taitus 1:2) Olsem na ol manmeri i larim Tok Bilong God i stiaim ol, ol i stap gut, na i stap bilong ol i gat as bilong en, na ol i stap amamas na ol i no lusim nating taim na ol samting bilong ol long mekim ol samting i no gat as bilong en.—Song 25:12, 13.
Ol dispela tok na planti narapela tok moa, ol i bin stori long en long “Tok Profet Bilong God” Kibung Distrik bilong ol Witnes Bilong Jehova i bin kamap long olgeta hap long 1999 na 2000. Ol tok, ol soim, na wanpela pilai bilong Baibel, ol dispela samting i bin kirapim tingting bilong ol lain i stap long kibung long tingim ol gutpela samting bilong spirit em ol manmeri i stadi na bihainim ol tok profet bilong God ol i save kisim. Ol stori i kamap bihain long dispela ol bai stori long sampela bikpela tok i bin kamap long kibung.