Kisim Save Long Ol Samting Bai Kamap Tru Bihain

“SAPOS man inap save long ol samting bai kamap tru 3-pela de bihain, em bai inap kamap maniman na i stap olsem inap planti tausen yia bihain.” Em wanpela savetok bilong ol Saina.

Ol man i laik save long ol samting bai kamap bihain, na planti ol i orait long tromoi bikpela mani samting na bai ol i ken kisim save tru long dispela samting, na ol i wok long painim dispela save. Redio o nius i save tokaut long ren o bikpela san samting bai kam, o long ol wok mani bai kamap bikpela o nogat. Sapos yumi ken save gut long wanem ol samting bai kamap, bai yumi inap long stretim ol samting yumi laik mekim.

Planti man i save singaut long ol glasman o marilaman bilong helpim ol long painim dispela save. Planti buk i stori long sampela ol man bilong bipo na bilong nau ol i tok ol inap save long ol dispela samting, tasol planti man i no bilipim tok bilong ol. Cato em wanpela saveman bilong Rom bipo na em i bin tok: “Mi ting ol glasman i save ol i man bilong giaman.”

Ol man i save kolim kain kain samting bai kamap bihain. Long 1972 wanpela lain saveman na bisnisman bilong Klap Bilong Rom ol i tok, ol samting bilong graun bai pinis, na long 1981 ol gol bai pinis, na long 1985 ol mekyuri bai pinis, na long 1992 bensin bai pinis. Tasol dispela tok bilong ol i lus nating. Ol dispela samting i no bin pinis.

Planti ol man i tingim samting bilong lotu na ol i kolim ol samting bai kamap bihain. Bisop Wulfstan i bin tok, taim ol Denmak i daunim ol Inglan bihain long yia 1100, dispela i makim olsem klostu ol samting bilong graun bai bagarap. Na long yia 1525 Thomas Münzer i tok em i bin driman na i lukim ol ensel i sapim naip bilong ol na bai ol i ken kisim ol kaikai i mau pinis, olsem na em i kirapim ol rabisman bilong Jemani long pait na daunim gavman. Dispela tupela tok wantaim i lus nating na samting ol i kolim i no bin kamap tru.

Baibel i gat planti toksave long ol samting bai kamap bihain. Na ol man i bin raitim tok bilong Baibel ol i tok, God i bin givim save long ol. Aposel Pita i tok: “Yumi no ken bihainim tingting bilong yumi yet na autim as bilong wanpela tok profet i stap long buk bilong God [olsem Baibel]. Long wanem, i no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.”​—⁠2 Pita 1:​20, 21.

Baibel i kolim ol samting i mas kamap long taim Krais Jisas i kisim wok king na em i kamap King bilong Kingdom. Baibel i tok bai i gat planti pait, na kaikai bai sot, na planti guria bai kamap, na ol man bai bihainim pasin i no stret, na ol dispela samting bai makim “taim bilong las de.” (2 Timoti 3:​1-5; Matyu 24:​3-14, 34) Na Baibel i tok, taim King Krais Jisas i pinisim dispela pasin nogut bilong graun, nau rot bai op na nupela taim bai kamap long graun na ol man inap i stap amamas oltaim na God bai mekim gut long ol.​—⁠2 Pita 3:13; KTH 21:​1-4.

Yu ting olsem wanem long ol dispela tok profet bilong Baibel? Yu ting ol tu i giaman olsem ol dispela tok ol man yet i bin mekim long ol samting i mas kamap bihain na tok bilong ol i bin lus nating? Yumi ken skelim sampela tok profet bilong Baibel em truim bilong en i no kamap yet, bambai yumi ken save ol tok em i bin mekim long ol samting bilong bipo em i bin kamap tru o nogat. Stori i kam bihain long dispela bai toktok long dispela samting.

[Piksa Kredit Lain long pes 3]

Courtesy National Weather Service