Skin Bilong Ol i Liklik, Tasol Ol i Gat Gutpela Bel

SAPOS longpela bilong yu i olsem 76 sentimita tasol, yu bai pilim olsem wanem taim yu toktok wantaim ol man long Kingdom bilong God? Laura i save. Em i gat 33 krismas, na longpela bilong em i 76 sentimita tasol. Susa bilong em, María, em i gat 24 krismas na longpela bilong em i olsem 86 sentimita. Tupela i sindaun long Kwito, long Ekwado. Yumi ken larim tupela i stori long hevi bilong ol taim ol i mekim wok autim tok.

“Bilong i go long ples bilong autim tok na bilong i go long ol miting Kristen, mitupela i save wokabaut inap 500 mita bilong kisim bas. Long ples bas i lusim mitupela long en, mitupela i save wokabaut inap 500 mita gen bilong kisim namba tu bas. Tasol long dispela rot i gat 5-pela dok nogut i stap. Mitupela i save pret long ol dok, long wanem, long mitupela bikpela bilong dok i olsem bikpela bilong hos. Bilong rausim ol dispela dok, mitupela i save karim wanpela stik na taim mitupela i no kalap long bas yet, mitupela i save haitim long wanpela hap inap long mitupela i ken mekim wok long en taim mitupela i wokabaut i go bek long haus.

“Mitupela i hatwok tru long kalap long bas. Bilong kalap long bas, mitupela i save sanap antap long wanpela hip graun. Sampela draiva i save sanapim bas klostu long dispela hip graun, tasol sampela nogat. Sapos ol draiva i no sanapim bas klostu long hip graun, wanpela i mas helpim narapela long kalap long bas. Bilong kisim namba tu bas, mitupela i mas brukim bikrot i gat planti ka long en. Em bikpela hatwok tru, long wanem, mitupela i gat sotpela lek. Mitupela i no gat bikpela skin, olsem na i hatwok long karim hanbek i gat planti buk samting long en. Bilong helpim mitupela, mitupela i save karim liklik Baibel na mitupela i no save karim planti buk na nius samting.

“Kirap long taim mitupela i liklik yet, mitupela i save sem long toktok. Ol man i stap klostu long mitupela ol i save mitupela i save pret long toktok wantaim ol narapela man. Olsem na ol i save kirap nogut long lukim mitupela i paitim dua bilong ol, na planti taim ol i harim tok bilong mitupela. Tasol long ol hap ol man i no save gut long mitupela, ol i tingim mitupela i olsem ol sotpela meri tasol, na i no olgeta taim ol i save putim gut yau long tok mitupela i autim. Tasol maski i olsem, mitupela i pilim pasin sori bilong Jehova na dispela i strongim mitupela long wok yet long autim tok. Mitupela i save tingim long bel tok bilong Sindaun 3:​5, 6, na dispela tu i save strongim mitupela.”

Olsem Laura na María i kamapim, maski skin i no gutpela tumas, pasin bilong wok strong inap givim biknem long God. Aposel Pol i bin beten long God i ken tekewe wanpela samting olsem ‘nil i save sutim skin bilong em’​—⁠ating em wanpela kain sik bilong skin. Tasol God i tokim em: “Marimari bilong mi em inap long yu. Long wanem, strong bilong mi em i save kamap strong tru long man i no gat strong.” Yes, i no olsem God i mas rausim wanpela sik bilong skin bambai yumi ken mekim wok bilong em. Sapos yumi bilip strong long God dispela inap helpim yumi long mekim gutpela wok long i stap bilong yumi, maski yumi gat wanem kain sindaun. Pol i gat dispela tingting long dispela samting olsem ‘nil i save sutim skin’ bilong em, olsem na em inap tok: “Taim mi no gat strong, long dispela taim tasol mi gat strong tru.” (2 Korin 12:​7, 9, 10) Sampela yia bihain Pol i tok: “Krais i save strongim mi, na long strong bilong em mi inap mekim olgeta samting.”​—⁠Filipai 4:⁠13.

Long taim bilong yumi, God i inapim ol bikpela wok long rot bilong ol man, meri, na pikinini em ol i givim bel tru long em. Skin bilong sampela i bagarap. Maski olgeta i wetim God i oraitim ol long rot bilong Kingdom bilong em, ol i no wet inap long taim God i stretim sik bilong ol na nau ol i ken kirap mekim wok bilong em.

Olsem wanem? Yu tu i gat sik bilong skin? Strongim bel! Long rot bilong bilip bilong yu, yu inap stap olsem Pol, Laura, na María. Wanpela tok ol i bin mekim long ol bilipman na bilipmeri bilong bipo i stret tu long ol, olsem: “Ol i no gat bikpela strong, tasol bihain ol i kisim strong.”​—⁠Hibru 11:⁠34.

[Piksa long pes 8]

María

Laura

[Piksa long pes 9]

María i save helpim Laura long kalap long bas

[Ol Piksa long pes 9]

“Mitupela i save pret long ol dok, long wanem, bikpela bilong ol i olsem bikpela bilong hos”

Daunbilo: Laura na María, na tupela i bin stadi long Baibel wantaim ol