Em i Bihainim Stretpela Pasin na Ol i Kilim Em i Dai
“YUMI tingim yet August Dickmann (mama i karim em long 1910), em i wanpela Witnes Bilong Jehova.” Dispela em kirap bilong tok ol i raitim long wanpela hap plang (i stap long piksa) ol i bin putim long olpela banis kalabus long Saksenhausen i no longtaim i go pinis. Bilong wanem ol i raitim nem bilong wanpela Witnes Bilong Jehova long kain plang olsem? Sampela tok moa i stap long dispela plang i tok: “Ol lain SS [em wanpela lain polis bilong Hitler] ol i bin sutim em na kilim em i dai long Septemba 15, 1939, long wanem, em i bin sanap strong na bihainim maus bilong bel.”
Ol i bin kalabusim August Dickmann long banis kalabus Saksenhausen long 1937. Namba Tu Pait i kirap long 1939, na 3-pela de bihain ol i bin subim em long sainim wanpela pepa bilong i go insait long ami. Em i no laik sainim pepa, na namba wan bos bilong kem i askim Heinrich Himmler, em namba wan bos bilong lain SS (Schutzstaffel, wanpela lain polis bilong Hitler), long em i ken kisim tok orait long kilim i dai Dickmann long ai bilong olgeta narapela wankalabus bilong em. Long Septemba 17, 1939, nius The New York Times i kamapim ripot i kam long Jemani olsem: “Long hia ol soldia i gat wok long kilim ol man ol i kilim i dai August Dickmann, em i gat 29 krismas.” Nius i tok olsem em i namba wan Jeman i bin sanap strong na bihainim maus bilong bel long dispela taim bilong pait.
Long Septemba 18, 1999, em 60 yia bihain long taim ol i kilim em i dai, wanpela lain (Brandenburg Memorial Foundation) i tingim i dai bilong em, na ol i putim hap plang i gat nem bilong Dickman long en i toksave long ol man i kam raun na lukim ol samting long tingim pasin bilong em olsem em i gat strongpela bel na strongpela bilip. Namba tu plang i gat nem long en i stap long banis ausait long haus kalabus bilong bipo na dispela i toksave long ol man i kam raun olsem Dickmann em i wanpela bilong 900 samting Witnes Bilong Jehova em ol i bin kisim nogut long Saksenhausen, long wanem, ol i bihainim bilip bilong ol. Planti moa i bin kisim nogut long ol narapela banis kalabus. Em nau, maski sindaun bilong ol long banis kalabus i nogut tru, planti ol i strong long holimpas ol lo bilong God.
Ol Witnes Bilong Jehova i save olsem em i wanpela wok Kristen bilong ol long “i stap aninit long ol gavman.” (Rom 13:1) Tasol taim ol gavman i laik subim ol long brukim ol lo bilong God, ol i save bihainim pasin bilong ol aposel bilong Krais, ol i tok: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:29) Olsem na maski long olgeta kantri i gat pasin birua namel long ol man bilong narapela narapela lain, na sampela lain i no laikim ol man bilong narapela ples na ol man i kisim bikpela hevi long dispela, tasol ol Witnes Bilong Jehova long ol dispela hap, ol i olsem August Dickmann na ol i strong long i stap bel isi wantaim ol narapela man. Ol i tingim tok Baibel i mekim: “Yu no ken larim pasin nogut i winim yu. Nogat. Yu mas mekim gutpela pasin na bai yu daunim pasin nogut.”—Rom 12:21.