Mipela i Go Long Ol Ailan Pasifik—Bilong Mekim Wok!
LONG ples balus bilong Brisben na Sidni, Ostrelia, i gat wanpela lain i stap long rum ol man bilong kisim balus ol i sindaun long en, na bel bilong ol i kirap tru na ol i toktok na amamas wantaim. Dispela lain i gat 46 manmeri long en, ol i redi long lusim Ostrelia na i go long Samoa bilong bung wantaim 39 narapela manmeri bilong Nu Silan, Hawaii, na Amerika. Ol kago bilong ol i narapela kain—em ol tul olsem ol hama na so na boa—em ol samting ol man i save raun lukim ol naispela ailan Pasifik i no save karim. Tasol i gat narapela as na dispela lain i go.
Ol i baim tiket bilong ol yet na ol i volantia long mekim wok na ol i no kisim pe. Ol bai stap tupela wik na mekim wok bilong sanapim sampela haus, em wanpela dipatmen (Regional Engineering Office) long brens-ofis bilong ol Witnes Bilong Jehova long Ostrelia i bosim. Ol i wok long sanapim ol Haus Kingdom, na Haus Kibung, na haus misineri, na ol haus bilong brens-ofis o ofis bilong tanim tok, em bilong helpim ol kongrigesen bilong ol Witnes Bilong Jehova i wok long i go bikpela hariap long ol ailan Pasifik. Na mani bilong mekim dispela wok, em mani ol man i givim long laik bilong ol yet. Nau bai yumi toktok wantaim sampela bilong ol dispela wokman ol i bin mekim wok long sanapim sampela Haus Kingdom long kantri bilong ol yet.
Max em i man bilong Kowra long Nu Saut Wels, Ostrelia, na em i save wokim ol rup bilong haus. Em i marit na i gat 5-pela pikinini. Arnold em i man bilong Hawaii. Em wantaim meri bilong em i gat tupela pikinini man, na tu em i mekim wok painia oltaim, olsem autim tok long olgeta de. Max na Arnold ol i mekim wok elda long ol kongrigesen bilong ol long ples. Olsem na yumi no ken ting dispela tupela man na planti ol narapela volantia i no gat planti wok long mekim na long dispela as ol i laik i go mekim dispela wok volantia, nogat. Ol wantaim famili bilong ol i luksave olsem i mas i gat sampela bilong helpim dispela wok na ol i gat laik long mekim olsem.
Ol Wokman Bilong Ol Narapela Kantri i Helpim Tru Wok
Tuvalu em i wanpela hap ol i sot long ol man i gat save long mekim dispela kain wok, em i wanpela kantri long Pasifik i gat 9-pela liklik ailan bilong en na 10,500 manmeri i sindaun long en. Ol i stap klostu long ekweta na not-wes long Samoa. Bikpela bilong ol dispela ailan wan wan i olsem 2.5 skwe kilomita. Long 1994 i gat 61 Witnes i stap long dispela hap na ol i mas i gat wanpela nupela Haus Kingdom, na ofis bilong tanim tok i liklik tumas na ol i mas wokim i go bikpela.
Long dispela hap bilong Pasifik ol i mas wokim strong ol haus bambai ol inap winim ol bikpela win i save kamap planti taim long dispela hap. Tasol i no gat ol gutpela samting bilong wokim strongpela haus long en long ol dispela ailan. Wanem rot bilong winim dispela hevi? Ol i mas kisim olgeta samting long Ostrelia na pulimapim long ol traipela bokis ain na salim i go long sip—em ol ain bilong rup, bun bilong haus, ol tebol na sia samting, toilet na ol skru na nil tu.
Taim ol samting bilong wokim ol haus i no kamap yet, i gat wanpela lain ol i bin kam redim graun na putim simen bilong haus. Bihain ol wokman bilong ol narapela hap i kam bilong sanapim na penim ol haus na putim ol tebol, sia samting insait long ol haus.
Ol wok ol brata i mekim long Tuvalu i kirapim belhat bilong wanpela pasto na em i autim tok long redio olsem ol Witnes i wok long sanapim wanpela “Taua bilong Babel”! Tasol ol i wokim wanem samting tru? Wanpela volantia, nem bilong em Graeme, i tok, “Taim ol man i bin wokim Taua bilong Babel, em Baibel i stori long en, ol i no inap toktok wantaim narapela narapela, long wanem, God i bin paulim tok ples bilong ol na ol i no inap pinisim dispela taua ol i laik sanapim.” (Stat 11:1-9) “Tasol em i narapela kain taim yumi mekim wok bilong God Jehova. Maski ol wokman i gat ol narapela narapela tok ples na pasin na sindaun, ol wok ol i mekim ol i save pinisim.” Na i wankain tu long dispela wok ol i mekim long Tuvalu—ol i pinisim insait long tupela wik. Na 163 manmeri i kam long bung bilong dediketim ol nupela haus ol i wokim, na meri bilong praim-minista tu i bin kam.
Doug, em man bilong bosim dispela wok, i tok: “Mi amamas tru long wok wantaim ol volantia bilong ol narapela kantri. Planti samting bilong mipela i narapela kain, olsem pasin bilong mekim wok, na nem mipela kolim long ol wok na tul samting, na pasin bilong metaim samting, tasol dispela i no bin kamapim sampela hevi namel long mipela.” Em i bin mekim dispela kain wok planti taim, na em i tok moa olsem: “Dispela i save strongim tingting bilong mi olsem, taim Jehova i helpim ol manmeri bilong em, ol inap sanapim wanpela haus long wanem wanem hap ol i laik sanapim, maski em i stap long wanpela hap i stap longwe tru na i hatwok long sanapim wanpela haus. Tru, yumi gat planti brata i gat save long mekim wok, tasol spirit bilong Jehova tasol i save inapim yumi long mekim dispela wok.”
Spirit bilong God i kirapim tu ol famili Witnes i stap long ol dispela ailan long givim kaikai na ples slip long ol volantia, maski sampela ol i no gat planti samting bilong skin. Na ol volantia i pilim tru gutpela pasin ol famili Witnes i bin mekim long ol. Ken, em i bilong Melbon, Ostrelia, i bin mekim wankain wok long Frens Polinisia. Em i tok: “Mipela kam olsem ol wokboi, tasol ol brata sista i mekim gut long mipela olsem mipela i king.” Sampela brata sista bilong ol dispela ples ol i helpim dispela wok. Long ailan Solomon ol meri i tanim simen long han. Wan handet manmeri i bin go antap tru long ol maunten em ren i wasim na ol i kisim 40 ton diwai na karim i kam daunbilo. Ol yangpela tu i bin mekim dispela wok. Wanpela wokman bilong Nu Silan i tok: “Mi tingim wanpela yangpela brata bilong ailan em i bin karim 2-pela o 3-pela bek simen wantaim. Na em i bin savolim ol liklik ston long de olgeta maski san na ren.”
Taim ol Witnes bilong ol dispela hap i insait long dispela wok, narapela gutpela samting i kamap. Brens-ofis bilong Sosaiti Was Taua long Samoa i tok: “Ol brata bilong dispela hap ol i kisim sampela save ol inap mekim wok long en bilong sanapim ol nupela Haus Kingdom na long stretim na wokim gen ol Haus Kingdom samting em bikpela win i save bagarapim. Na tu, ating save ol i kisim em inap helpim ol long painim wok mani bilong lukautim ol yet.”
Dispela Wok i Stap Olsem Witnes Bilong Tokaut Long ol Man
Colin i stap long Honiara na em i lukim ol i wokim Haus Kibung. Em i kirap nogut, na em i raitim pas long brens-ofis bilong Sosaiti Was Taua long dispela hap long tok Pisin bilong ol Solomon, na pas i tok: “Everyone they gettim one mind and no one they cross, they also one family.” (“Olgeta i wanbel, na no gat wanpela i kros long narapela, ol i stap olsem wanpela famili.”) Bihain liklik em i go bek long Aruligo, em ples bilong em, na em wantaim famili bilong em ol i wokim Haus Kingdom bilong ol yet. Nau ol i salim narapela pas long brens-ofis i tok: “Haus Kingdom bilong mipela i redi pinis, na ples bilong sanap na mekim tok tu i redi. Olsem wanem? Mipela inap kirap mekim ol miting long hia?” Kwiktaim Sosaiti i stretim rot bilong mekim olsem, na inap 60 samting ol i save kam bung long ol miting long olgeta taim.
Wanpela wokman bilong Yuropian Yunion i bin lukim wok ol i mekim long Tuvalu na em i tokim wanpela brata, “long ai bilong mi samting yupela i mekim em i wanpela mirakel. Ating planti man i save mekim wankain tok long yupela!” Wanpela meri i wok long PTC i bin askim narapela volantia: “Olsem wanem na yupela i amamas tru? Dispela ples i hat nogut tru!” Ol i no bin lukim pasin Kristen i kamapim gutpela wok olsem dispela bilong helpim tru ol man na ol i mekim long pasin bilong daunim laik bilong ol yet.
Ol i No Bel Hevi Long Ol Samting Ol i Bin Lusim
Long 2 Korin 9:6, Baibel i tok, “Man i planim planti, em bai i kisim planti.” Ol wokman, na ol famili bilong ol, na kongrigesen bilong ol, i wok long planim planti samting bilong helpim ol wanbilip Witnes i stap long hap bilong Pasifik. Wanpela elda bilong Kinkamba, klostu long Sidni, nem bilong em Ross, i tok, “Kongrigesen mi stap long en i bin givim bikpela hap mani bilong helpim mi long baim tiket, na tambu bilong mi, em tu i bin kam, em i givim 500 dola long mi bilong helpim mi.” Narapela brata i salim ka bilong em yet na em i kisim mani bilong baim rot bilong i go. Na narapela i salim wanpela hap graun. Kevin em i sot long 900 dola, olsem na em i laik salim 16 pisin balus bilong em. Wanpela man em i save long en, em i painim wanpela man i laik baim ol dispela pisin na em i givim em 900 dola stret!
Ol i askim Danny na Cheryl olsem, “Pe yupela save kisim long wok mani i lus taim yupela i bin kam mekim wok, sapos yumi bungim dispela wantaim mani yupela tromoi long baim balus long i kam long hia, em i olsem 6,000 dola. Olsem wanem? Yupela i amamas long lusim bikpela mani olsem?” Ol i tok, “Yes! Maski mipela i mas dabolim dispela mani bai mipela i amamas long mekim dispela wok.” Alan, em i bilong Nelson, Nu Silan, i tok: “Long mani mi tromoi long i go long Tuvalu mi inap go long Yurop na i gat sampela mani yet i stap. Tasol sapos mi bin mekim olsem bai mi no inap kisim blesing, na bungim ol nupela pren, na mekim sampela samting bilong helpim narapela, a? Nogat tru! Na maski mi givim wanem samting long ol brata bilong yumi i stap long ailan, ol i bin givim mi planti samting moa.”
Narapela samting i mekim na dispela wok i kamap gutpela, em ol famili i bin sambai long ol volantia. Sampela meri bilong ol wokman ol inap long i go wantaim man bilong ol na mekim sampela wok, tasol sampela i gat ol pikinini i stap long skul o ol i gat wanpela bisnis bilong famili ol i mas lukautim. Clay i tok: “Meri bilong mi i mekim bikpela samting moa i winim samting mi bin mekim—em i stap na lukautim ol pikinini na haus bilong mipela.” Tru tumas, ol man marit em ol i no inap kisim meri bilong ol i go wantaim ol, bai ol i wanbel long tok bilong Clay!
Bihain long taim ol i pinisim wok long Tuvalu, ol volantia i bin wokim ol Haus Kingdom, ol Haus Kibung, ol haus misineri, na ol ofis bilong tanim tok long Fiji, Tonga, Papua Niugini, Nu Kaledonia na sampela hap moa. Ol i wok long stretim rot bilong wokim ol nupela haus samting long hap bilong Saut-is Esia na long planti hap moa. Olsem wanem? Bai ol i sot long ol wokman bilong mekim dispela wok?
Ating yumi ken tok nogat. Brens-ofis long Hawaii i tok: “Olgeta manmeri long hia ol i bin mekim dispela wok ol i tokim mipela long tingim ol long bihain, taim i gat sampela wok moa bilong mekim. Taim ol i go bek pinis long ples, ol i kirap gen long bungim mani bambai ol inap mekim gen dispela wok.” Yumi save dispela wok bai kamap gutpela, long wanem, Jehova i save mekim gut long ol manmeri taim ol i givim bel long mekim wok bilong em olsem ol dispela volantia i bin mekim.
[Piksa long pes 9]
Ol samting bilong wokim haus
[Ol Piksa long pes 9]
Ol wokman i stap long hap bilong mekim wok
[Ol Piksa long pes 10]
Taim wok i laik pinis, mipela i amamas long ol samting spirit bilong God i bin kamapim