Yu Save Bihainim Gutpela Tingting?
TAIM Moses i laik makim ol hetman bilong Israel, em i wok long painim “sampela saveman na [man i bihainim gutpela tingting, NW ] na man i save pinis long ol pasin bilong i stap hetman.” (Lo 1:13) Ol save man i kisim taim em i winim planti krismas em i wanpela mak ol i mas winim, tasol i gat sampela samting moa. Savepasin na pasin bilong bihainim gutpela tingting em tu i bikpela samting.
Man i bihainim gutpela tingting bai mekim gutpela tok na gutpela pasin. Wanpela dikseneri (Webster’s Ninth New Collegiate Dictionary) i tok, kain man olsem “em inap save long taim stret bilong pasim maus.” Yes, i gat “taim bilong toktok” na “taim bilong pasim maus,” na man i gat gutpela tingting em i save long dispela samting. (Saveman 3:7) I gat as bilong pasim maus olsem Baibel i tok: “Sapos man i mekim planti toktok, em inap mekim sin long tok bilong en. Tasol man i no mekim planti toktok, em i gat gutpela tingting.”—Sindaun 10:19.
Ol Kristen i bihainim gutpela tingting long ol samting ol i mekim wantaim ol wanbilip. Man i save mekim planti toktok o toktok strong, i no olsem em i nambawan. Moses i “kamap man bilong mekim ol strongpela toktok,” tasol pastaim em i no inap bosim ol Israel—em i mas wet inap long taim em i kisim pasin bilong isi long man, na pasin daun na pasin bilong bosim bel. (Aposel 7:22) Olsem na ol man i holim wok bos ol i mas bihainim gutpela tingting na isi long ol man.—Sindaun 11:2.
Dispela lain Jisas Krais i makim bilong “bosim olgeta samting bilong em,” Baibel i kolim ol olsem “wokboi i gat gutpela tingting, na i save mekim gutpela wok.” (Matyu 24:45-47) Ol i no bikhet na bihainim wanpela tingting i save kamap wantu long bel bilong ol na ol i mekim samting Jehova i no makim ol long mekim, nogat; na taim Jehova i makim pinis samting bilong mekim, ol i no isi isi long mekim. Ol i save long taim bilong toktok na taim bilong pasim maus na wetim sampela tok bilong kliaim tingting. I gutpela sapos olgeta Kristen i ken bihainim pasin bilong bilip bilong ol na bihainim gutpela tingting olsem lain wokboi i save bihainim.—Hibru 13:7.