“Naispela Meme Bilong Maunten”
NAISPELA em i no wanpela tok yumi planti bai mekim wok long en bilong stori long meme. Ating yumi tingim ol meme ol i gutpela animal i save kaikai kain kain samting, na yumi inap kisim switpela abus bilong ol, na gutpela susu bilong strongim skin—tasol yumi no inap tok olsem ol i naispela.
Tasol Baibel i stori long meri marit i olsem “wanpela gutpela dia na wanpela naispela meme bilong maunten.” (Sindaun 5:18, 19, NW ) Solomon, em i wanpela man i raitim Buk Sindaun, em i save amamas long lukim ol wel animal bilong bus bilong Israel, olsem na i gat gutpela as na em i mekim dispela tok piksa. (1 King 4:30-33) Ating em i bihainim pasin bilong papa bilong em Devit, na em i save lukim ol meme bilong maunten taim ol i kam raun long hap bilong Engedi, klostu long nambis bilong raunwara Detsi.
Ol liklik lain meme i stap long ples drai nating bilong Judia, ol i save kam olgeta taim long hul wara long Engedi. Long dispela ples drai nating Engedi tasol i gat wara, olsem na inap planti handet yia ol wel meme bilong maunten i save go long dispela hap bilong kisim wara. Insait bilong dispela nem Engedi i olsem “hul wara bilong pikinini meme,” na dispela nem i kamapim olsem ol pikinini meme i save stap oltaim long dispela hap. King Devit i bin i go hait long dispela hap taim King Sol i laik mekim nogut long em, maski em i mas stap olsem wanpela ranaweman long “Ples Nogut Bilong Wel Meme.”—1 Samuel 24:1, 2.
Long Engedi yu inap lukim yet wanpela kain meme meri bilong maunten em i wokabaut gut tru i go daun long sait bilong bikpela baret i gat ston tasol long en, na i bihainim meme man i go long wara. Ating nau bai yu inap save long as bilong tok piksa i skelim meme meri wantaim meri marit i stap gut long man bilong em. Pasin bilong em long stap isi na gutpela pasin bilong em i tokaut long ol pasin bilong ol meri. Dispela tok “naispela” i makim gutpela pasin bilong en long wokabaut na gutpela skin bilong meme bilong maunten.a
Meme meri i mas i gat strong bilong karim ol hevi, na tu, em i mas i gat gutpela pasin bilong wokabaut. Olsem Jehova i tokim Jop, ol meme bilong ples maunten i save karim pikinini long ol bikpela ston bilong ples maunten, em ol ples ol man i no inap go long en, na i nogat planti kaikai na ples i hat o kol nogut tru. (Jop 39:1) Maski ol dispela hevi i stap, meme meri i save lukautim gut ol pikinini bilong en, na skulim ol long wokabaut na kalap gut namel long ol ston olsem em yet i save mekim. Na tu, em i save wok strong tru long lukautim ol pikinini bilong en bambai ol birua i no ken kisim ol. Wanpela man i lukim wanpela mama meme bilong maunten i pait long wanpela tarangau inap olsem hap aua, taim pikinini meme i hait i stap aninit long en.
Planti meri Kristen i marit na ol mama ol i save mekim bikpela long ol pikinini bilong ol, maski ol i gat planti hevi. Kain olsem meme bilong maunten, ol i save givim bel tru na daunim laik bilong ol yet bilong mekim dispela wok God i givim long ol. Na ol i save strongim bel na lukautim pikinini bilong ol bambai ol samting i no ken bagarapim ol pikinini long ol samting bilong spirit. Olsem na Solomon i no bin mekim dispela tok piksa bilong daunim ol meri, nogat; em i laik kirapim yumi long tingim ol gutpela pasin na naispela skin bilong ol meri—ol gutpela pasin bilong spirit ol i save kamapim, maski ol i karim planti hevi.
[Futnot]
a Wanpela buk (The New Brown-Driver-Briggs-Gesenius Hebrew and English Lexicon) i tok, long dispela hap tok Hibru chen ol i tanim olsem “naispela,” i makim ‘skin i gutpela tru.’
[Ol Piksa long pes 30, 31]
Meri Kristen i marit na i gat ol pikinini, em i kamapim ol gutpela pasin bilong spirit taim em i mekim wok God i bin givim long em