“Ol i Stap Gutpela Piksa Long Pasin Wanbel”

EM het-tok bilong wanpela niuspepa long Indaiatuba, Sao Paulo, Brasil. Husat i stap olsem gutpela piksa? Man bilong raitim stori long nius, em i tok: “Em ol Witnes Bilong Jehova, ol i tingting long wokim nupela ‘Haus Kingdom,’ olsem ol i save kolim ples bilong ol long bung bilong mekim lotu. Ol i stap olsem gutpela piksa tru long pasin bilong wok gut wantaim, em wanpela pasin bilong ol yumi mas tingim.”

Pasin bilong ol Witnes Bilong Jehova long i stap wanbel i save kamap long ples klia long ol kain taim olsem. Nius i tok moa: “Bel bilong yumi i kirap tru taim yumi lukim ol man, meri, na ol yangpela i amamas long wok wantaim long wokim wanpela ples, ol inap bung long en bilong lotu long God.”

Ol Witnes Bilong Jehova i stap olsem gutpela piksa long ol narapela samting tu. Nius i tok moa: “Ol Witnes Bilong Jehova i save stadi na beten, na ol i save wok strong tu long helpim ol man i kalabus long dring na drak long senisim pasin bilong ol na sindaun gut gen, na ol i skulim ol man long pasin bilong i stap wanbel na laikim ol narapela.” Olsem wanem ol inap long mekim ol dispela samting? Ol Witnes i save olsem, pasin bilong kisim save na bihainim ol gutpela tok bilong Baibel i save helpim man long lusim ol pasin nogut. Long dispela as ol i save wok strong long skulim ol narapela long ol samting ol i bin lainim long Baibel. Nius i tok olsem: “Tru tumas, ol i save makim gutpela pasin em ol narapela i mas kirap hariap long bihainim.”

Ol man i ken go long ol miting bilong ol Witnes Bilong Jehova, na ol i no save singaut long mani. Mipela i amamas long singautim yu long kam long wanpela Haus Kingdom i stap klostu long hap bilong yu.