Stretpela Pasin i Wok Long Pinis
“DISPELA kain samting i no bin kamap bipo.” Em tok bilong wanpela bikman bilong Jemani long bipo, em Helmut Schmidt. Em i kamapim bel hevi bilong em taim nius i stori long pasin giaman nogut tru bilong sampela wokman bilong gavman. Em i tok: “Pasin mangal i kirapim ol man long lusim stretpela pasin.”
Planti bai wanbel long dispela tok bilong em. Inap longpela taim planti man i bilip olsem ol lo bilong Baibel long stretpela pasin i bilong soim yumi long wanem ol samting i stret o i no stret, tasol long nau planti ol i wok long sakim ol dispela lo. Na dispela pasin i kamap tu long ol kantri i tok ol i bihainim lotu Kristen.
Stretpela Pasin Em Baibel i Makim i Gutpela Long Nau?
Pasin bilong tok tru na wokabaut stret oltaim i insait long ol lo bilong Baibel i skulim yumi long stretpela pasin. Tasol pasin giaman na pasin bilong paulim mani samting, em i stap long olgeta hap. Wanpela nius bilong Landon (The Times) i tok sampela polis “i save kisim ol drak long ol man nogut na holim bilong ol yet na givim long sampela narapela lain bilong maketim, o ol i paulim sampela samting ol polis i holim bilong kotim ol bikman nogut, na taim ol i mekim olsem ol i save kisim bikpela mani olsem 373,000 kina.” Long Ostria, pasin bilong giamanim ol kampani bilong insurens i kamap planti taim. Na long Jemani ol lain bilong saiens i kirap nogut tru taim sampela i bin painimaut olsem “pasin giaman i bin kamap insait long sampela wok saiens bilong Jemani yet.” Wanpela profesa i gat “biknem tru winim ol narapela lain wanwok bilong em,” i kisim kot, long wanem, em i kamapim planti giaman long ol ripot bilong em.
Na tu, pasin bilong stap gut long marit i insait long ol lo bilong Baibel i makim stretpela pasin. Tasol planti marit moa i wok long katim marit bilong ol. Wanpela nius bilong ol Katolik (Christ in der Gegenwart) i tok: “Ol lain bilong Swiselan i save bihainim ol pasin bilong bipo, tasol long nau planti marit bilong ol tu i wok long bagarap.” Long Netelan, 33 pesen bilong ol marit i save katim marit bilong ol. Wanpela meri i tingim ol senis i kamap long i stap bilong ol man long Jemani long nau na em i tok: “Long nau planti ol i ting marit em pasin bilong ol tumbuna tasol. Ol i no gat tingting moa long marit na stap wantaim poroman inap long ol i dai.”
Tasol planti milion manmeri i gat tingting olsem ol lo bilong Baibel long stretpela pasin em ol samting ol i ken bilip tru long en na i gutpela long bihainim nau long dispela taim. Tupela marit i save sindaun long boda bilong Swiselan na Jemani i bin kisim save olsem pasin bilong bihainim ol stretpela lo bilong Baibel i helpim ol long i stap amamas moa. Long tingting bilong tupela, “i gat wanpela samting tasol bilong stiaim olgeta samting bilong i stap bilong yumi. Dispela samting em Baibel tasol.”
Wanem tingting bilong yu? Tok i stap long Baibel i gutpela long stiaim yumi? Ol lo bilong Baibel long stretpela pasin i gutpela long bihainim long nau?