Yu Ting Ol Lo Bilong Baibel Long Stretpela Pasin i Win Tru?

“OL MAN i mas i gat sampela lo i stiaim ol long ol bikpela samting na helpim ol long sindaun gut.” Em tok bilong wanpela man Jeman i raitim ol stori na mekim wok niusman bilong TV. Em i gutpela tingting, a? Bilong helpim ol man long sindaun gut na stap isi, ol i mas wanbel long sampela lo i kamapim klia wanem samting i stret o i no stret, o wanem samting i gutpela o i nogut. Dispela i kamapim askim olsem: Wanem ol lo i gutpela moa bilong ol manmeri i ken bihainim?

Sapos ol man i kisim na bihainim ol stretpela pasin em Baibel i makim, ol dispela lo bai helpim ol long wokabaut gut na stap amamas. Na taim ol man wan wan i stap gut, dispela bai kamapim gutpela sindaun long ol man i bihainim ol dispela lo. Olsem wanem? Kain samting olsem i save kamap? Yumi ken skelim tok bilong Baibel long tupela bikpela samting olsem: pasin bilong stap gut long marit, na wok bilong wokabaut stret.

No Ken Lusim Poroman

Man bilong wokim yumi i bin wokim Adam na bihain em i wokim poroman bilong em Iv. Em namba wan marit i bin kamap long graun na oltaim tupela bai stap poroman. God i tok: “Man i save lusim papamama na i pas wantaim meri bilong en.” Na 4 tausen yia bihain, Jisas i bin kolim gen dispela lo long ol lain bilong em. Na tu, em i tokaut olsem pasin bilong slip wantaim wanpela i no poroman tru bilong em i no stret.​—⁠Stat 1:​27, 28; 2:24; Matyu 5:​27-30; 19:⁠5.

Olsem Baibel i tok, tupela bikpela samting bilong helpim marit long i stap amamas em taim tupela marit i bihainim pasin sori na tingim narapela. Man i stap het bilong famili, na em i gat wok long bihainim pasin sori na daunim laik bilong em yet na tingim ol samting i helpim meri. Em i mas “bihainim gutpela tingting” na em i no ken “mekim nogut bel bilong [meri].” Meri i gat wok long “stap aninit long man bilong [em].” Sapos tupela i bihainim ol dispela lo, bai ol inap abrusim o daunim planti hevi bilong marit. Na man marit bai i gat laik long stap gut wantaim meri bilong em na meri tu bai i gat laik long mekim olsem.​—⁠1 Pita 3:​1-7; Kolosi 3:​18, 19; Efesus 5:​22-33.

Yu ting pasin bilong stap gut long poroman olsem Baibel i makim em inap helpim marit long stap amamas? Tingim wanpela ripot i kam long Jemani. Ol i bin askim ol manmeri long kamapim ol bikpela samting bilong helpim marit long stap gut. Pasin bilong tupela marit long stap gut long marit bilong ol i wanpela bikpela samting ol i kamapim. Ating yu bai wanbel long dispela tok olsem ol marit i gat bikpela amamas moa taim ol i save poroman bilong ol i stap gut long ol, a?

Olsem Wanem Sapos Hevi i Kamap?

Tasol olsem wanem sapos man na meri marit i no wanbel long sampela ol bikpela samting? Olsem wanem sapos pasin bilong laikim tru narapela i no strong olsem bipo? Sapos kain hevi olsem i kamap, yu ting i gutpela long brukim marit? O yu ting i gutpela long bihainim yet dispela lo bilong Baibel olsem ol marit i mas i stap gut long poroman bilong ol?

Ol man bilong raitim Baibel i save pinis olsem olgeta marit bai i gat sampela hevi, long wanem, olgeta manmeri i gat sin. (1 Korin 7:​28) Tasol ol marit i bihainim stretpela pasin em Baibel i as bilong en, ol i wok strong long lusim rong bilong poroman na tupela i wok wantaim long stretim hevi. Tru, sampela samting inap kamap​—⁠olsem pasin pamuk, o pasin bilong bagarapim skin bilong poroman​—⁠na long kain taim olsem i no gat rong sapos wanpela Kristen i laik katim marit o stap longwe long poroman bilong em. (Matyu 5:32; 19:⁠9) Tasol pasin bilong pinisim nating marit taim i no gat bikpela as long mekim, o ol i mekim bilong kisim narapela poroman tasol, dispela i kamapim klia olsem ol i tingim ol yet tasol. Dispela pasin i no save kamapim bel isi o amamas long i stap bilong ol. Yumi ken stori long wanpela i bin mekim olsem.

Pita i pilim olsem marit bilong em i no gat bikpela amamas long en olsem bipo.a Olsem na em i lusim meri bilong em na go i stap wantaim Monika, em tu i bin lusim poroman. Bihain Pita na Monika i stap olsem wanem? I no longtaim na Pita i tokaut olsem pasin bilong stap wantaim Monika “i gat sampela hatwok long en na em i no bin ting em bai olsem.” Bilong wanem i gat sampela hatwok? Pasin kranki bilong skin i kamapim hevi namel long em na nupela poroman wankain olsem em i bin kamap insait long marit bilong em long bipo. Tasol samting i nogut moa i olsem, pasin bilong em long tingim em yet tasol na hariap mekim ol samting, dispela i bin kamapim bikpela hevi long mani. Na tu, dispela bikpela senis long i stap bilong famili bilong ol i bagarapim tru bel bilong ol pikinini bilong Monika.

Olsem dispela stori i kamapim, taim hevi i kamap, pasin bilong katim marit i no rot bilong pinisim hevi. Tasol taim hevi bilong marit i bikpela, pasin bilong bihainim ol lo bilong Baibel inap helpim marit long abrusim bagarap na kamap gutpela gen. Dispela samting i kamap long Thomas na Doris.

Thomas na Doris i marit inap 30 yia pinis na bihain Thomas i kisim pasin bilong dring planti. Doris i kisim bikpela bel hevi long dispela samting na tupela i toktok long katim marit. Doris i kamapim dispela hevi long wanpela Witnes Bilong Jehova. Dispela Witnes i soim Doris long ol tok bilong Baibel i stori long marit, na em i strongim Doris olsem em i no ken lusim poroman hariap, tasol pastaim em i ken wok wantaim man bilong em long stretim dispela hevi. Doris i mekim olsem. Insait long sampela mun tasol, tupela i no stori moa long katim marit. Thomas na Doris i wok wantaim long stretim ol hevi bilong ol. Wok bilong bihainim ol tok bilong Baibel i bin strongim marit bilong tupela, na dispela i helpim ol long stretim hevi.

Bihainim Stretpela Pasin Long Olgeta Samting

Bilong stap gut long poroman, man o meri i mas i gat pasin bilong stap strong long ol samting i stret na laikim tumas ol lo. Na man i mas i gat wankain pasin bilong helpim em long wokabaut stret nau long taim bilong planti pasin giaman. Baibel i kamapim planti toktok long pasin bilong wokabaut stret. Aposel Pol i tokim ol Kristen bilong Judia olsem: “Mipela i laik wokabaut stret long olgeta taim.” (Hibru 13:18) Wanem insait bilong dispela tok?

Man i wokabaut stret em i save tok tru tasol na i no save mekim sampela pasin giaman. Em i mekim pasin i stret long ol narapela, na em i kamapim stret ol tok, em i gat gutnem, na em i no save mekim sampela pasin bilong trikim narapela. Na tu, man bilong wokabaut stret i save holimpas ol stretpela pasin na em i no save mekim pasin giaman bilong pulim samting bilong narapela man. Ol lain i bihainim pasin bilong wokabaut stret ol i helpim ol narapela long kisim pasin bilong bilip long man na dispela i kamapim gutpela tingting na helpim ol man long pas gut wantaim.

Yu ting ol man bilong wokabaut stret i save stap amamas? Ol i gat as bilong stap olsem. Pasin bilong giaman na paulim samting i stap long olgeta hap, na ating long dispela as na ol man i save litimapim ol lain i save wokabaut stret. Long wanpela ripot i kamapim tingting bilong sampela yangpela, 70 pesen bilong ol i bin tok olsem pasin bilong wokabaut stret i bikpela samting. Na tu, maski yumi gat hamas krismas, yumi laikim ol pren i save tok tru long yumi.

Christine i lain long stil kirap long taim em i gat 12-pela krismas. Inap planti yia em i mekim dispela pasin na kamap savemeri bilong stil. Em i tok: “I gat sampela de mi bin stilim mani inap olsem 5,550 kina.” Tasol ol polis i kisim Christine planti taim liklik, olsem na em i save em inap kalabus long pasin stil bilong em. Taim ol Witnes Bilong Jehova i kamapim ol tok bilong Baibel long pasin bilong wokabaut stret, Christine i laikim ol dispela pasin em Baibel i as bilong en. Em i lain long bihainim dispela tok: “Ol stilman i no ken stil moa.”​—⁠Efesus 4:⁠28.

Taim Christine i laik kamap wanpela Witnes Bilong Jehova na kisim baptais, em i no stil moa. Em i bihainim pasin bilong wokabaut stret, long wanem, dispela pasin wantaim ol narapela pasin Kristen i bikpela samting long ol Witnes. Nius Lausitzer Rundschau i tok: “Pasin bilong wokabaut stret na mekim ol samting long skel na laikim tru ol narapela i bikpela samting long bilip bilong ol Witnes Bilong Jehova.” Christine i gat wanem tingting long dispela senis i bin kamap long em? “Kirap long taim mi lusim pasin bilong stil, mi gat bikpela amamas moa. Mi pilim olsem mi wanpela meri i gat gutpela nem.”

Stretpela Pasin i Helpim Olgeta Lain

Ol manmeri i stap gut long marit bilong ol na ol i bihainim pasin bilong wokabaut stret, ol yet i gat bikpela amamas, na tu ol i save helpim gut ol wanples bilong ol. Ol bosman i laikim moa ol wokman i no save bihainim giaman pasin. Ol lain i sindaun klostu long yumi, yumi laik bai ol i stap olsem lain yumi ken bilip long ol, na yumi laik baim ol samting long ol stua bilong ol stretpela man. Yumi givim biknem long ol man bilong wok politik, ol polis, na ol jas, taim ol i givim baksait long pasin nogut, a? Taim olgeta lain bilong ples i wokabaut stret olsem em i wanpela lo, na i no long taim ol i ting em bai helpim ol tasol, dispela i helpim sindaun bilong ol manmeri bilong dispela ples.

Na tu, ol marit i stap gut long poroman, ol i as bilong ol strongpela famili. Na planti man bai i wanbel long tok bilong wanpela man politik bilong Yurop olsem: “Famili i stap yet olsem nambawan samting bilong helpim ol man long sindaun gut na pilim olsem i stap bilong ol i gat as bilong en.” Famili i stap wanbel i nambawan rot bilong helpim ol man wantaim ol pikinini bilong ol long stap belgut na bel isi. Olsem na ol marit i stap gut long poroman bilong ol i helpim wok bilong kamapim ol lain i save sindaun gut wantaim.

Tingim dispela: Sapos i no gat ol marit em poroman i lusim ol pinis, o ol marit i bruk, o i no gat wok bilong welfe long makim pikinini long stap wantaim papa o mama, em bai gutpela tru, a? Na olsem wanem sapos i no gat moa ol lain bilong stilim mani long man, o stil long stua, o paulim mani long ples wok, o ol bikman i paulim ol samting, o ol saientis i bihainim sampela giaman pasin? Em bai gutpela tru, a? Yu ting dispela em i wanpela driman nating? I no driman nating long ol lain i laikim tru Baibel na ol tok bilong en i stori long ol samting bilong bihain. Baibel i tok promis olsem i no longtaim na Kingdom bilong Jehova long han bilong Jisas bai bosim olgeta manmeri long graun. Olgeta manmeri i stap aninit long dispela Kingdom bai lain long bihainim ol stretpela pasin em Baibel i makim. Long dispela taim, “ol stretpela man bai i kisim graun God i givim ol, na bai ol i stap oltaim long en.”​—⁠Song 37:⁠29.

Stretpela Pasin Bilong Baibel i Win Tru

Planti milion manmeri em ol i bin skelim gut Baibel, ol i save olsem God i as bilong ol gutpela tingting i stap long en, na tingting bilong em i winim tru tingting bilong ol man. Ol i tingim Baibel olsem wanpela buk ol i ken bilip long en, na i gutpela bilong helpim ol manmeri long nau. Ol i save, pasin bilong bihainim Tok Bilong God em i helpim ol.

Olsem na ol i pilim tru dispela tok bilong Baibel: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:​5, 6) Taim ol i larim God i stiaim ol, ol i helpim tru sindaun bilong ol yet, na ol i helpim ol narapela man i stap klostu long ol. Na ol i kisim strongpela bilip long “laip yumi bai kisim bihain,” taim olgeta man bai bihainim ol stretpela pasin em Baibel i makim.​—⁠1 Timoti 4:⁠8.

[Futnot]

[Rait long pes 5]

Taim hevi bilong marit i bikpela, pasin bilong bihainim ol stretpela lo bilong Baibel inap helpim marit long abrusim bagarap na kamap gutpela gen

[Rait long pes 6]

Pasin bilong giaman na paulim mani samting em i stap long olgeta hap, na ating long dispela as na ol man i save litimapim ol lain i save wokabaut stret