Gutnius Bilong Pasin Wanbel i Kamap Long Hailans Bilong Siapas

‘Ol man i holim gan na haitim pes bilong ol long laplap, ol i kilim i dai 45 manmeri i no holim wanpela samting bilong pait, em ol lain bilong wok gaden tasol, na 13 bilong ol em ol liklik pikinini. Kain samting olsem i no bin kamap bipo long provins Siapas.’ Em tok bilong nius “El Universal” long samting i bin kamap long Akteal, Provins Siapas, long Disemba 22, 1997.

SIAPAS em wanpela provins i stap long hap saut long Meksiko, long arere bilong Guatemala. Sampela asples Indian bilong ol Maya, em ol i stap rabis na sot long planti samting inap longpela taim tru, ol i kisim ol samting bilong pait na long Janueri 1994 ol i kirapim pait long gavman. Ol i tok ol i bilong wanpela lain ami bilong helpim ol man long kamap fri (Ejército Zapatista de Liberación Nacional), em ol EZLN. Ol i tromoi bikpela hap taim pinis long stretim dispela hevi long rot bilong toktok tasol. Ol dispela lain na ami bilong gavman i pait, na dispela i mekim na planti man i dai. Olsem na planti man bilong wok gaden long dispela hap ol i ranawe i go long hap ol i ken stap gut long en.

Tasol long dispela hap i gat pait, i gat wanpela lain i save laikim tru pasin bilong stap wanbel, na ol i no insait liklik long dispela wok politik na pait. Ol i wok strong long tokim ol man olsem Kingdom bilong God tasol inap stretim hevi bilong ol man, long Siapas na long olgeta narapela hap. (Daniel 2:​44) Dispela lain ol i husat? Em ol Witnes Bilong Jehova. Ol i bihainim tok bilong Jisas, olsem na ol i wok strong long kisim gutpela tok bilong Kingdom bilong God i go long planti hap long hailans bilong Siapas. (Matyu 24:14) Olsem wanem ol i mekim wok autim tok long dispela taim? Na wanem samting i kamap long rot bilong dispela wok?

“Mi Wanpela Witnes Bilong Jehova”

Adolfo em i yangpela man i nupela long mekim dispela wok bilong autim tok. Na wanpela de em i wok i stap long wanpela redio-stesin long Okosingo na em i kirap nogut taim sampela man i paitim strong dua na kam insait. Laplap i haitim pes bilong ol na ol i putim gan long het bilong Adolfo. Ol i ran i go long rum bilong redio, na ol i putim tokaut long redio olsem ol bai pait long gavman.

Orait nau ol i tokim Adolfo, em i mas insait long lain bilong ol. Maski Adolfo i no baptais yet, em i tok: “Mi wanpela Witnes Bilong Jehova.” Em i tok Kingdom bilong God tasol inap kamapim bel isi, na em i strong long sakim ol klos bilong pait na gan ol i laik givim long em. Taim ol i save em i strong long sakim ol, ol i larim em i go. Adolfo i tingim samting i bin kamap na em i tok olsem: “Dispela i bin strongim tru bilip bilong mi.”

Bihain pait i pinis liklik, tasol ami bilong gavman i wok yet long bosim dispela hap. Tasol maski hevi i stap yet, Adolfo i amamas long ol elda bilong kongrigesen long dispela hap i askim em long wok wantaim wanpela grup bilong ol Kristen i stap longwe long kongrigesen. Ol soldia i wokim ol rot blok long hap em i mas go long en, tasol ol i mekim gutpela pasin long em taim em i tokaut olsem em i wanpela Witnes Bilong Jehova. Bihain em i kisim baptais na em i amamas long lukim dispela grup i kamap wanpela kongrigesen bilong ol Witnes. Adolfo i tok: “Nau mi baptais pinis na mi ken tokaut stret olsem mi wanpela Witnes Bilong Jehova!”

“Jehova i Strongim Mipela”

Bihain liklik long taim ol lain EZLN i tokaut long redio olsem ol bai pait long gavman, ol manmeri bilong taun ol i ranawe. Francisco, em wanpela painia​—⁠olsem man i save autim tok long olgeta de​—⁠em i stori long olsem wanem Jehova i bin strongim em na meri bilong em long ol hevi i painim tupela.

“Mipela wokabaut inap long 3-pela aua bilong kamap long hap mipela pasim tok pinis long hait long en. Wanpela kongrigesen i stap long dispela hap, olsem na mipela inap stap wantaim ol brata. I no longtaim na kibung sekit bilong mipela bai kamap long Pelenke. Mi na meri bilong mi i no laik lusim miting bilong ol painia, tasol mipela i kisim save olsem ol lain EZLN i pasim rot. Olsem na mipela i tingting long wokabaut long bikbus, na insait long 9-pela aua mipela i kamap long Pelenke. Miting bilong ol painia i no kirap yet, olsem na mipela kisim bikpela amamas long insait long dispela miting na long kibung olgeta.

“Taim mipela kam bek, mipela lukim olsem ol i kukim haus bilong mipela pinis na stilim olgeta animal bilong mipela. Wanpela liklik bek klos tasol i stap yet, olgeta narapela samting i pinis. Mipela bel hevi tru long ol samting bilong mipela i lus, tasol ol brata long Okosingo i mekim gut long mipela na kisim mipela i kam i stap wantaim ol. Na tu, ol i lainim mipela long mekim sampela wok, em ol wok mipela ol lain bilong wokim gaden i no bin save long en. Wanpela brata i skulim mi long pasin bilong kisim ol poto, na narapela i skulim mi long wok bilong stretim ol su i gat sampela bagarap long en. Long dispela rot mi na meri bilong mi inap lukautim mipela yet long samting bilong skin na holim yet wok painia. Taim mipela tingim ol samting i bin kamap, mipela i save maski i gat hatwok long sanap strong na karim hevi bilong ol dispela samting, Jehova i bin strongim mipela.”

Wok Autim Tok i Karim Kaikai

Ol Witnes long provins bilong Siapas i no bin larim ol hevi na pret long bagarap i pasim ol long insait long wanpela bikpela wok bilong karim gutnius i go long ol manmeri i stap long hap bilong ol. Olsem: Long Epril na Me bilong 1995, ol i mekim wankain wok ol wanbilip bilong ol long olgeta hap i mekim bilong tilim Kingdom Nius No. 34, het-tok bilong en, Bilong Wanem Yumi Gat Planti Hevi? Dispela het-tok i stret tru long ol man i stap long dispela hap.

Taim ol i wok long tilim dispela nius long Pueblo Nuebo, wanpela painia, em Ciro, em i painim wanpela famili em ol i gat laik long kisim sampela save moa. Tripela de bihain em i go lukim ol gen na kirap stadi wantaim ol long Baibel. Tasol taim Ciro na wanpela poroman i go bek bilong mekim dispela Baibel-stadi, papa bilong ol i no stap. Tasol i gat ol narapela lain man i stap em ol i haitim pes bilong ol long laplap na ol i wetim papa bilong haus bilong bagarapim em. Ol i laik save Ciro na poroman bilong em i kam long painim wanem samting, na ol i toktok long kilim tupela i dai. Tupela i beten long Jehova long tingting na bihain dispela tupela Kristen i no pret long stori olsem ol i bin kam bilong skulim dispela famili long tok bilong Baibel. Taim ol man bilong haitim pes i harim dispela tok, ol i larim tupela i go. Na yumi no save i gat wanem as na papa i no bin kam bek long haus bilong em long dispela de.

Long wanpela de klostu 3-pela yia bihain, Ciro i kirap nogut taim dispela man i kam long haus bilong em. Ciro i amamas tru long kisim save olsem dispela famili olgeta i baptais pinis na ol i bung wantaim wanpela kongrigesen i stap long Guatemala! Na wanpela pikinini meri bilong ol i mekim wok painia.

Amamas Long Ol Kaikai Bilong Spirit

Maski ol hevi i stap yet long Siapas, wanpela wasman distrik i tok ol Witnes long dispela hap i pilim tru olsem pasin bilong bung wantaim i bikpela samting. (Hibru 10:​24, 25) Em i stori long samting i bin kamap long wanpela de kibung i no longtaim ol i bin wokim. Kibung i bilong kirap long moningtaim tru na bai olgeta lain i ken go bek long haus long san yet, taim i no gat planti hevi tumas. Maski planti bilong ol i mas wokabaut long bikbus winim 3-pela aua bilong kamap long ples kibung, long 7 klok moningtaim olgeta i sindaun pinis. I gat 6-pela bilong ol lain EZLN i sindaun na harim gut ol tok na paitim han bilong ol olsem ol i amamas long ol tok bilong program. Ol tu i bin wokabaut inap long 3-pela aua bilong kam long dispela kibung. Na 20 bilong ol i bin kam long Memorial long Haus Kingdom i stap long hap bilong ol bilong tingim indai bilong Krais.

Narapela yangpela man i insait long dispela lain i pait long gavman, em i kisim wok long ol bos bilong em long lukautim wanpela ples insait long bus. Taim em i kamap long dispela ples em i lukim olsem olgeta manmeri bilong dispela hap i ranawe pinis, planti bilong ol em ol Witnes. Olsem na em i sindaun long wanpela haus em ol lain i lusim pinis. Em i no gat ol samting bilong mekim na dispela i kirapim em long ritim ol buk em i lukim long haus. Em ol buk bilong Sosaiti Was Taua ol Witnes i no bin kisim taim ol i lusim haus. Wok bilong stap wanpis i mekim na dispela man i gat bikpela hap taim long tingim tingim ol samting em i wok long ritim. Em i pasim tok long bel long senisim pasin bilong em na lusim wok bilong pait long gavman. Taim em i lusim dispela hap em i hariap na painim ol Witnes na kirap long stadi long Baibel. Insait long 6-pela mun em i autim tok long ol narapela long gutnius. Em yet na 3-pela narapela bilong famili em pastaim ol i wanbel long dispela wok bilong pait long gavman, nau ol i Kristen i baptais pinis.

Ol Gutpela Samting i Kamap

Tru, dispela pait i mekim na ol man i karim bikpela hevi, tasol dispela pait i helpim ol long kisim gutpela tingting long wok bilong autim tok. Wanpela elda i stap long dispela taun stret em hevi i kirap long en, em i tok: “Long 5-pela de samting bihain long dispela pait i kirap, mipela i stretim rot bilong autim tok long taun stret na long ol hap ausait long taun. Ol manmeri i gat laik tru long harim tok bilong mipela. Mipela tilim planti ol nius bilong Baibel na kirapim sampela Baibel-stadi. Long wanpela hap em pastaim ol i save sakim tok i tru, dispela pait i mekim na nau ol i save amamas long harim tok bilong mipela, na stadi long Baibel, na go long ol miting na kibung.”

Maski ol man i no stap isi, ol brata i amamas long ol i no bin larim ol samting i pasim ol long mekim yet ol wok bilong God. Ol ami bilong gavman na ol lain EZLN ol i save ol Witnes i mekim yet ol kibung bilong ol, na ol dispela kibung i wok long strongim ol brata long samting bilong spirit. Wok ol wasman bilong raun i mekim bilong lukim ol brata, dispela tu i strongim bel bilong ol brata long mekim yet wok bilong autim tok. I gat narapela lain tu i strongim bel bilong ol brata, em ol lain i insait long dispela pait, planti taim ol i tokim ol brata long mekim yet wok autim tok bilong ol.

Tru, ol traim na hevi ol manmeri bilong Siapas i karim i no bikpela olsem bipo, tasol i no pinis olgeta. Maski sampela hevi i stap yet, wanpela samting yumi save gut long en i olsem​—⁠tingting bilong ol Witnes Bilong Jehova em bilong mekim yet wok bilong autim gutnius bilong pasin wanbel i stap long Baibel. (Aposel 10:​34-36; Efesus 6:15) Olsem profet Jeremaia i tok, ol tu i save olsem “mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Kingdom bilong God i stap long han bilong Pikinini bilong em Jisas Krais, em dispela samting tasol inap stretim hevi bilong ol pasin i no stret na pasin bilong i stap rabis.​—⁠Matyu 6:⁠10.

[Mep long pes 9]

(Bilong save ol dispela rait i stap we long pes, lukim buk o magasin)

Galf Bilong Meksiko

SIAPAS

GUATEMALA

Solwara Pasifik

[Kredit Lain]

Mountain High Maps® Copyright © 1997 Digital Wisdom, Inc.

[Piksa long pes 9]

Ol Witnes i autim tok long hailans bilong Siapas