Ol i Wok Strong Long Daunim Pasin Bilong i Stap Rabis—Yu Ting Ol Inap Mekim?
OL TURIS i go raun long lukim Yunaitet Nesen long biktaun Nu Yok ol i save lukim wanpela rum (Economic and Social Council Chamber) em ol paip samting i stap ples klia long rup bilong en. Meri i kisim ol turis i go raun, em i tok: “Dispela rup em ‘ol i no pinisim’ i olsem wanpela samting bilong kirapim ol man long tingim olsem ol wok bilong Yunaitet Nesen long ol samting bilong mani na sindaun bilong ol man bai i no inap pinis; long olgeta taim bai i gat sampela samting moa ol inap mekim bilong helpim sindaun bilong ol man i kamap gutpela moa.”
Maski dispela Kaunsil i wok strong long kamapim gutpela sindaun long olgeta man, i luk olsem ol i no inap pinisim dispela wok bilong ol. Taim Jisas Krais i mekim wok bilong em long graun, em i tok: “Spirit bilong Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go bringim gutpela tok bilong en long ol rabisman.” (Luk 4:18) Em wanem “gutpela tok” em i autim? Em tok bilong dispela Kingdom em God Jehova, em i save stap olsem “strongpela ples hait bilong ol rabisman i sot long ol samting,” em bai kamapim na Krais Jisas bai stap King bilong en. Dispela Kingdom bai mekim wanem ol wok? Aisaia i tok profet olsem: “Bikpela I Gat Olgeta Strong bai i redim bikpela kaikai tru. Bai i gat planti gutpela gutpela abus na nambawan wain tru bilong dring. Na ol manmeri bilong olgeta kantri bai i kam bung long dispela kaikai. Em bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.”—Aisaia 25:4-6, 8.
Olsem wanem? Yu laik kisim sampela save moa long olsem wanem Kingdom bilong God bai “helpim sindaun bilong ol man i kamap gutpela moa,” na bai ol man i no sot moa long wanpela samting? Lukim ol tok i stap daunbilo bilong save long olsem wanem wanpela tisa i save gut long mekim wok em i ken kam lukim yu bilong lainim yu long ol tok bilong Baibel long ol dispela samting.