Yu Ting Yu Inap i Stap Amamas Tru?

LONG olgeta taim George i bin lap liklik na pes bilong em i lait taim em i bin tok gude long ol man. Em i tingim laip i olsem wanpela gutpela presen yumi mas amamas long en. Em i gat pasin bilong amamas na ting ol gutpela samting tasol bai kamap​​—⁠ol dispela pasin bilong em i kamap strong moa taim em i karim hevi bilong i go lapun. I go inap long taim George i dai, ol man i save long em olsem em i wanpela man bilong amamas. Olsem wanem? Yu save amamas olsem George? Yu save tingim olgeta nupela de i olsem wanpela presen yu mas amamas long en? O taim yu tingting long nupela de i laik kamap, yu save les na tingting planti? I gat wanpela samting i save tekewe amamas bilong yu?

Dispela tok amamas i makim pasin bilong belgut long olgeta taim. Dispela pasin bilong amamas i save kamapim pasin bilong stap bel gut na bel i stap amamas tru na man i gat bikpela laik long i stap olsem tasol. Olsem wanem? Dispela kain pasin bilong i stap amamas em i stap tru?

Long nau, ol man i strongim dispela tingting olsem ol man bai amamas sapos ol i gat planti samting. Planti milion man i save mekim ol samting hariap hariap, long wanem, ol i laik kisim planti samting. Taim ol i mekim olsem, planti i no save pas gut wantaim ol narapela na ol i no save tingim ol narapela bikpela samting long i stap bilong man. Olsem ol anis i stap long haus bilong ol, long olgeta taim ol man i save hariap hariap long mekim ol wok, na ol i no gat taim long tingim gut ol samting ol i mekim o tingim ol narapela. Olsem na wanpela ripot long nius Los Angeles Times i tok “namba bilong ol man i stap bel hevi i wok long i go bikpela, na planti moa [i bel hevi] taim ol i yangpela tru. . . . Ol marasin bilong daunim bel hevi i stap olsem nambawan marasin ol man i save baim.” Planti milion man i save kisim ol drak nogut o ol i traim long daunim bel hevi bilong ol long rot bilong bia samting. Sampela man i save go baim planti samting taim ol i bel hevi. Wanpela nius (The Guardian) bilong Briten i tok, wanpela lain i skelim tingting bilong ol man na ol i kisim save olsem “ol meri i stap olsem nambawan lain bilong baim planti samting bilong daunim bel hevi bilong ol. Ol meri i gat strongpela tingting moa winim ol man long baim ol samting taim ol i bel hevi.”

Tasol yu no inap painim amamas tru long wanpela stua, bia samting, marasin, sut, o pasbuk. Amamas i no samting bilong baim; em samting i no gat pe long en. Yumi inap painim dispela kain gutpela presen long wanem hap? Bai yumi toktok long dispela samting long stori i kamap bihain long dispela.