Skul Yumi Kisim Long Jisas

Rot Bilong Kisim Amamas

Wanem rot tru bilong i stap amamas?

▪ Long bikpela tok bilong em antap long maunten, Jisas i stori long amamas. Em i tok: “Ol manmeri i save, ol i stap rabis tru long ol samting bilong God, em ol i ken amamas.” (Matyu 5:3) Wanem insait bilong dispela tok bilong Jisas?

Bilong i stap laip yumi mas pulim win, dring, na kaikai, wankain olsem ol animal. Tasol bilong i stap amamas, yumi mas kisim wanpela samting em ol animal i no gat wok long kisim​—yumi mas save gut long as bilong i stap bilong yumi. Man Bilong Wokim yumi, em wanpela tasol i ken givim dispela samting long yumi. Olsem na Jisas i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Matyu 4:4) Ol man i hangre long kisim save long God, ol i stap amamas, long wanem, ol i wok long i go klostu long Jehova, em God bilong “pasin tru bilong amamas.” Na em i givim wanpela samting ol i mas kisim bilong i stap amamas​—em pasin bilong wetim gutpela samting.​—1 Timoti 1:11.

Olsem wanem Jisas i helpim ol long wetim gutpela samting?

▪ Jisas i tok: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5) Long rot bilong oraitim ol sikman, kirapim bek ol man i dai pinis, na tok em i autim long ol, Jisas i helpim ol manmeri long wetim gutpela samting i kamap bihain. Em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Ol man i bihainim tok bilong God, ol inap kisim laip oltaim long graun. Yu inap piksaim long tingting olsem yu yet i stap namel long ol manmeri i gat pasin daun na yu no inap i go lapun? Dispela em i as na Baibel i tok: “Yupela i save bilip na wetim Bikpela i mekim gut long yupela, olsem na yupela i mas amamas.” (Rom 12:12) Na tu, Jisas i toktok long rot bilong kisim amamas long nau.

Jisas i skulim ol man long wanem rot bilong i stap amamas?

▪ Jisas i givim gutpela tok bilong helpim ol man long ol samting bilong pas gut wantaim narapela, marit, pasin daun, na stretpela tingting bilong mani kago samting. (Matyu 5:​21-32; 6:​1-5, 19-34) Sapos yu bihainim tok bilong Jisas, dispela bai helpim yu long kisim amamas.

Pasin bilong givim ol samting long ol narapela i kamapim amamas. (Aposel 20:35) Olsem, Jisas i tok: “Sapos yu mekim bikpela kaikai, orait yu mas singautim ol rabisman na ol man bodi bilong ol i bagarap na ol lek nogut na ol aipas. Ol dispela kain man i no inap bekim kaikai long yu. Olsem na bai yu ken amamas.” (Luk 14:​13, 14) Ol man i tingting long amamasim ol yet tasol, ol bai no inap amamas, tasol ol man i tingting long amamasim ol narapela ol bai amamas.

Wanem as tru bilong amamas?

▪ Taim yumi mekim ol samting bilong helpim ol narapela, dispela inap givim amamas long yumi, tasol taim yumi mekim wok bilong God dispela i givim bikpela amamas moa yet long yumi. Dispela kain amamas i winim amamas em papamama i pilim taim ol i laikim tru pikinini bilong ol. Dispela i kamap ples klia long wanpela taim we Jisas i bin skulim ol manmeri. “Wanpela meri i stap namel long ol em i singaut olsem, ‘Dispela meri i bin karim yu na i givim susu long yu, em i ken amamas.’ Tasol Jisas i tok, ‘Mobeta yumi tok olsem, ol man i harim tok bilong God na i bihainim, em ol i ken amamas.’”​—Luk 11:​27, 28.

Jisas yet i bin kisim pasin bilong belgut na amamas long mekim laik bilong Papa bilong em long heven. God i laik bai ol manmeri i harim gutnius bilong kisim laip oltaim. Wanpela taim Jisas i kamapim dispela tingting long wanpela man, na bihain em i tok: “God i bin salim mi na mi kam, na kaikai bilong mi, em long bihainim laik bilong em.” (Jon 4:​13, 14, 34) Yu tu inap kisim amamas taim yu autim tok i tru bilong Baibel long ol narapela, em wanpela wok God i amamas long en.

Bilong kisim sampela save moa, lukim sapta 1 bilong dispela buk, em ol Witnes Bilong Jehova i wokim.Tru Tru Baibel i Tok Wanem?

[Piksa long pes 16]

Yumi save kisim amamas tru long rot bilong inapim laik bilong yumi long kisim save long as bilong i stap bilong yumi