Wanem Samting Inap Helpim Yu Long Stap Amamas Tru?
PLANTI man i ting sapos ol i bungim planti mani kago samting, ol bai stap amamas. Olsem wanem long yu? Tru ol samting bilong skin inap helpim yumi long painim amamas, tasol ol dispela samting i no helpim yumi long stap amamas tru. Na ol samting bilong helpim sindaun bilong yumi i no helpim yumi long kisim bilip o inapim yumi long ol samting bilong spirit yumi sot long en.
Long tok bilong em antap long maunten, Krais Jisas i tok: “Ol manmeri i save, ol i stap rabis tru long ol samting bilong God, em ol i ken amamas. Ol dispela manmeri bai i kisim ol gutpela samting bilong kingdom bilong heven.” (Matyu 5:3) Na tu Jisas i tok: “Yupela lukaut na was gut. Nogut yupela i mangal long kisim ol kain kain samting. Maski yu yet yu gat planti samting moa, tasol yu no inap kisim laip long ol dispela samting bilong yu.”—Luk 12:15.
Planti man i ting ol bai stap amamas sapos ol i mekim pasin pamuk na ol narapela “pasin bilong olpela bel.” (Galesia 5:19-21) Tasol pasin bilong inapim ol laik nogut bilong skin i no save helpim man long i stap amamas tru na stap amamas inap oltaim. Ol man i save mekim ol dispela pasin ol bai no inap i go insait long Kingdom bilong God.—1 Korin 6:9, 10.
Sampela narapela i ting amamas i stap insait long ol yet, na bilong painim dispela amamas ol i traim long kisim gutpela tingting moa long ol yet. Ol laibreri, na ol stua bilong salim ol buk i gat planti buk bilong helpim ol man em ol i laik mekim pasin bilong ol i kamap gutpela moa, tasol ol dispela buk i no helpim ol man long i stap amamas oltaim. Orait, wanem samting inap helpim yumi long i stap amamas tru?
Bilong stap amamas tru, yumi mas tingim wanpela laik i stap long bel bilong yumi, olsem: Yumi mas kisim ol samting bilong spirit yumi sot long en. Jisas i tok: “Ol manmeri i save, ol i stap rabis tru long ol samting bilong God, em ol i ken amamas.” Tasol sapos yumi save olsem yumi sot long dispela samting na yumi no mekim wanpela samting bilong inapim dispela laik, dispela i no inap helpim yumi liklik. Yumi ken tok piksa olsem: Sapos wanpela man i ran long resis na taim resis i pinis em i no dring wara—maski skin bilong em i laik tru long wara, yu ting wanem samting bai kamap? Ating i no longtaim na olgeta wara long skin bilong em bai pinis na bai i gat sampela narapela bikpela hevi i kamap long skin bilong em. Na i wankain tu sapos yumi no kisim ol kaikai bilong spirit yumi sot long en; bihain bai yumi bagarap long ol samting bilong spirit. Dispela bai mekim na yumi no inap stap belgut o amamas moa.
Jisas i bin tingim tru olsem em i mas kisim ol samting bilong spirit em i sot long en, olsem na long olgeta taim em i bin stadi long ol tok bilong God na tingim gut long bel bilong em. Em i no gat hatwok long painim na kaunim ol tok long buk bilong God, na em i lainim ol narapela tu long mekim olsem. (Luk 4:16-21; skelim wantaim Efesus 4:20, 21.) Na Jisas i tok, mekim laik bilong Papa bilong em long heven i olsem kaikai. Em i kisim bikpela amamas long mekim laik bilong God.—Jon 4:34.
Tru tumas, sapos yumi wok long bungim ol mani kago samting o yumi inapim ol laik nogut bilong skin, dispela i no kamapim amamas tru. Pasin bilong stap amamas tru em samting bilong bel, na man i laik stap olsem i mas bilip tru na i mas stap wanbel wantaim God Jehova. Olsem na dispela singsing bilong Devit, em man bilong raitim Song, i stret: “Ol manmeri i putim Bikpela i stap God bilong ol, ol tu i ken amamas.”—Song 144:15b.
[Piksa long pes 23]
Sapos yu bilip na yu stap wanbel wantaim God, bai yu stap amamas tru