Skulim Ol Pikinini Bilong Yu

As na Jisas i No Hariap

JISAS i kisim save olsem gutpela pren bilong em Lasarus i sik nogut tru. Maria na Marta, em tupela susa bilong Lasarus, ol i bin salim wanpela man long bringim dispela tok i go long Jisas. Dispela man i kam long Betani, em hap we Lasarus na tupela susa bilong em i sindaun long en. Tupela susa i bilip olsem Jisas inap oraitim brata bilong ol, maski ol i stap long hapsait bilong wara Jordan, em longwe long hap Jisas i stap long en. Ol i save olsem, Jisas i oraitim pinis sampela man em ol i bin stap longwe long hap em i bin stap long en.​—Matyu 8:​5-13; Jon 11:​1-3.

Taim dispela man i tokim Jisas olsem Lasarus i sik, Jisas i no mekim wanpela samting. Baibel i tok: “Em i stap tupela de moa long dispela ples em i stap long en.” (Jon 11:6) Yu save long as na Jisas i no hariap i go bilong helpim Lasarus?​—a Orait, nau yumi ken stori long dispela samting.

Jisas i save olsem Lasarus i dai long sik bilong em. Olsem na em i tokim ol aposel bilong em olsem: “Yumi go bek long distrik Judia.” Ol i tok: “Tisa, i no longtaim i go pinis na ol Juda i laik tromoi ston long yu na kilim yu i dai. Na yu laik i go long Judia, a?” Jisas i tok: “Pren bilong yumi Lasarus i slip. Tasol mi bai go na kirapim em.”

Ol aposel i tok: “Bikpela, sapos em i slip, sik bilong en bai i pinis na em bai i kamap orait gen.” Orait nau Jisas i tokim ol: “Lasarus i dai pinis.” Na em i mekim wanpela tok ol i kirap nogut long en: “Mi tingting long yupela na mi amamas long mi no bin i stap wantaim em long dispela taim. . . . Nau yumi go long em.”

Tomas i strongim bel na i tok: “Goan, yumi olgeta i go na i dai wantaim [Jisas].” Tomas i save olsem ol birua i laik kilim i dai Jisas na ol aposel. Tasol maski i olsem, ol i go. Tupela de bihain, ol i kamap long Betani, em ples bilong Lasarus. Dispela taun i stap olsem 3 kilomita longwe long Jerusalem.​—Jon 11:​7-18.

Yu save long as na Jisas i amamas long em i no go kamap hariap?​— Tru, Jisas i bin kirapim bek sampela man paslain long dispela, tasol ol dispela manmeri i bin dai sampela aua tasol na Jisas i bin kirapim bek ol. (Luk 7:​11-17, 22; 8:​49-56) Tasol bodi bilong Lasarus i bin stap long matmat inap sampela de pinis. I no gat wanpela man i ken tok olsem em i no bin dai tru tru!

Taim Marta, susa bilong Lasarus, i harim olsem Jisas i stap klostu long Betani, em i ran i go bilong bungim em. Marta i tok: “Bikpela, sapos yu bin i stap hia, bai brata bilong mi i no inap i dai.” Jisas i tokim em: “Brata bilong yu bai i kirap bek.” Orait, nau Marta i ran i go bek na tok isi long yau bilong Maria olsem: “Tisa i kam i stap, na em i singautim yu.”

Kwiktaim Maria i kirap na i go long Jisas. Tasol ol manmeri i stap wantaim Maria ol i ting em i go long matmat, olsem na ol i bihainim em i go. Taim Jisas i lukim olsem Maria na ol manmeri i stap wantaim em ol i krai, em tu “i krai.” I no longtaim na ol i kamap long matmat, em bikpela ston i pasim ai bilong en. Jisas i tok: “Yupela rausim dispela ston.” Tasol Marta i tok: “Bikpela, nau em i namba 4 de bilong em i stap long matmat. Olsem na smel nogut bai i kamap.”

Ol manmeri i bihainim tok bilong Jisas na ol i rausim ston. Orait nau em i beten na i tok tenkyu long God long strong God bai givim long em bilong kirapim bek Lasarus. Jisas i singaut strong na i tok: “Lasarus, yu kam ausait.” Na Lasarus i kam ausait na “lek na han na pes bilong en ol i bin karamapim long laplap.” Na nau Jisas i tokim ol olsem: “Lusim laplap na larim em i wokabaut.”​—Jon 11:​19-44.

Orait, nau yu save long as na Jisas i no hariap?​— Em i bin save olsem sapos em i wet, em inap litimapim moa yet nem bilong Papa bilong em, Jehova. Em i makim gutpela taim bilong mekim dispela samting, olsem na planti manmeri i kamap bilipman. “Planti bilong ol dispela Juda i bin kam sori wantaim Maria, ol i lukim dispela samting Jisas i mekim, na ol i bilip long em.” (Jon 11:45) Yu ken luksave long skul yumi inap kisim long pasin bilong Jisas?​—

Yu tu inap makim gutpela taim bilong autim tok long ol gutpela samting God i bin mekim na em bai mekim bihain. Ating yu inap stori long ol wanskul na ol tisa bilong yu long ol dispela tok. Long taim bilong klas sampela yangpela i bin autim tok long ol gutpela blesing em Kingdom Bilong God bai kamapim long ol man. Tru, yu no inap kirapim bek ol man i dai pinis, tasol yu inap helpim ol narapela long kisim save long God husat inap kirapim bek ol famili i dai pinis na em bai mekim olsem.

[Futnot]

OL ASKIM:

▪ Bilong wanem Jisas i no hariap i go bilong helpim Lasarus?

▪ Bilong wanem Tomas i tok: “Goan, yumi olgeta i go na i dai wantaim [Jisas]”?

▪ Olsem wanem Jisas inap kirapim bek Lasarus?

▪ Yu inap mekim wanem samting bilong kamapim olsem yu kisim skul long pasin bilong Jisas?