Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w10 8/1 p. 10-13
  • Winim Ol Hevi Bilong Namba Wan Yia Bilong Marit

No gat vidio bilong dispela seksen.

Sori, popaia kamap long lodim vidio.

  • Winim Ol Hevi Bilong Namba Wan Yia Bilong Marit
  • Wastaua i Tokaut Long Kingdom Bilong Jehova—2010
  • Ol Liklik Het Tok
  • Wankain Infomesen
  • Holim Stretpela Tingting
  • Tupela Rot Bilong Helpim Marit Long Stap Longtaim
    Rot Bilong Famili i Ken Stap Amamas
  • Yu Ting Ol Witnes Bilong Jehova i Save Brukim Marit Bilong Ol Man?
    Wastaua i tokaut Long Kingdom Bilong Jehova—2008
  • Hau Bai Famili Bilong Yu Inap Stap Amamas?—Hap 1
    Stap Amamas Oltaim!—Stadi Long Baibel
  • Marit—Presen i Kam Long God
    Rot Bilong Stap Yet Insait Long Laikim Bilong God
Lukim Moa
Wastaua i Tokaut Long Kingdom Bilong Jehova—2010
w10 8/1 p. 10-13

Rot Bilong Famili i Ken Stap Amamas

Winim Ol Hevi Bilong Namba Wan Yia Bilong Marit

Man i tok: “Mi kirap nogut long lukim olsem mitupela meri bilong mi i gat planti pasin i no wankain! Olsem: Mi laik kirap hariap long moning, tasol meri i laik stap inap long biknait. Na mi no kliagut long pasin bilong em i save senis senis​—sampela taim em i amamas na sampela taim em i bel hevi. Na taim mi kukim kaikai, em i save toktok planti long en, na moa yet long pasin bilong mi long klinim han long laplap bilong draim plet.”

Meri i tok: “Man bilong mi i no save toktok tumas. Tasol famili bilong mi, ol i lain bilong toktok, na ol i save toktok moa yet long taim bilong kaikai. Na taim man bilong mi i kukim kaikai, em i yusim wankain laplap bilong klinim han bilong em na bilong draim ol plet! Dispela i save skrapim tru bel bilong mi! I hatwok tru long kliagut long pasin bilong ol man. Olsem wanem ol marit i save mekim marit bilong ol i wok gut?”

SAPOS yu marit nupela, ating ol kain hevi olsem i save painim yu, a? Yu ting wantu tasol poroman bilong yu i kisim ol pasin kranki bihain long yutupela i marit? Yu ken mekim wanem na bai “ol hevi bilong olgeta de i save painim ol marit” i no ken daunim yu?​—1 Korin 7:​28, Today’s English Version.

Namba wan, yu no ken ting, taim yu wantaim meri bilong yu i mekim ol tok promis bilong marit, wantu bai yupela i gat save tru long marit laip. Taim yu singel yet, ating yu bin kisim save long pasin bilong i stap gut wantaim ol narapela, na ating dispela save i kamap gutpela moa long taim yutupela i pren wantaim. Tasol marit bai traim ol dispela save yu bin kisim na ating bai yu mas kisim sampela nupela save moa long dispela samting. Yu ting bai yu mekim sampela popaia? Yes, bai yu mekim. Na yu ting yu inap kisim ol save bilong mekim marit bilong yu i wok gut? Yes, yu inap!

Nambawan rot bilong mekim dispela save i kamap gutpela moa, em yu ken askim wanpela husat i gat gutpela save long sindaun bilong marit, na nau yu ken bihainim ol tok em i givim long yu. Nambawan man husat i gat gutpela save tru long sindaun bilong marit, em God Jehova. Em yet i bin wokim yumi na i putim laik bilong marit long bel bilong yumi. (Stat 2:​22-24) Tok bilong em, Baibel, inap helpim yu long winim ol hevi bilong marit na kisim save yu mas i gat bilong mekim marit bilong yu i stap longpela taim moa, winim namba wan yia bilong en.

SAVE NAMBA 1. LAIN LONG KISIM TINGTING BILONG NARAPELA

Wanem ol hatwok bilong en? Keiji,a em i wanpela man marit long Japan, sampela taim em i lusim tingting olsem ol disisen em i mekim i givim hatwok long meri bilong em. Em i tok: “Taim ol narapela i singautim mipela, mi save tok orait tasol na mi no kisim tingting bilong meri bilong mi pastaim. Bihain mi lukim olsem em i hatwok long mekim samting mi bin pasim tok long mekim.” Allen, em wanpela man marit long Australia, em i tok: “Mi bin ting, mi no man tru sapos mi kisim tingting bilong meri bilong mi long ol samting mi laik mekim.” Sindaun em i kamap bikpela long en i mekim na em i gat dispela hatwok. Na i wankain tu long Dianne, em i stap long Inglan. Em i tok: “Mi lain pinis long askim famili bilong mi long givim tingting long mi. Olsem na taim mi marit nupela mi save askim tingting bilong ol long disisen mi laik mekim, na mi no askim man bilong mi.”

Wanem rot bilong stretim? Yu no ken lusim tingting olsem God Jehova i save tingim tupela marit i olsem “wanpela bodi tasol.” (Matyu 19:​3-6) Long ai bilong em, pasin i stap namel long tupela marit em i bikpela samting tru! Bilong strongim dispela pasin, pasin bilong toktok gut wantaim i bikpela samting.

Tupela marit inap lain long planti samting taim ol i skelim pasin bilong God Jehova long toktok wantaim Abraham. Plis ritim tok i stap long Stat 18:​17-33. God i soim rispek long Abraham long 3-pela rot. (1) Jehova i tokaut klia long ol samting em i gat laik long mekim. (2) Em i putim gut yau taim Abraham i kamapim tingting bilong em. (3) Inap long mak i stret long mekim, Jehova i senisim samting em i laik mekim bambai i stret wantaim laik bilong Abraham. Olsem wanem yu inap bihainim dispela pasin taim yu laik kisim tingting bilong poroman marit?

TRAIM MEKIM OLSEM: Taim yu toktok wantaim poroman marit bilong yu long ol samting em tu i mas save long en, (1) tokim em long ol samting yu laik mekim, tasol tokim em olsem yu kamapim tasol tingting bilong yu, na i no olsem yu wokim pinis disisen o em i mas bihainim tasol tok bilong yu; (2) askim poroman long kamapim tingting bilong em, na tokaut olsem em i gat rait long holim narapela tingting; na (3) ‘yu mas isi’ long poroman, na sapos inap, yu ken mekim samting em i laikim.​—Filipai 4:5.

SAVE NAMBA 2. LAIN LONG TINGTING GUT NA TOKTOK

Wanem hatwok bilong en? Ating pasin bilong famili o ples yu kamap bikpela long en i mekim na yu gat pasin bilong kamapim strong tingting bilong yu, o yu no tingting gut na toktok. Olsem: Liam i stap long Yurop, em i tok: “Long ples mi kam long en planti man i no save tingting gut na toktok. Kain pasin olsem bilong mi long toktok i save bagarapim bel bilong meri bilong mi planti taim. Olsem na mi mas lain long mekim tok isi.”

Wanem rot bilong stretim? Yu no ken ting olsem poroman i laik bai yu toktok long em long pasin yu lain pinis long en. (Filipai 2:​3, 4) Tok aposel Pol i bin givim long wanpela misineri em inap helpim tu ol nupela marit. Em i tok: “Wokman bilong Bikpela i no ken tok pait na tok kros. Nogat. Em i mas mekim gutpela pasin.” Long tok Grik bilong pastaim, dispela tok “gutpela pasin” ol inap tanim tu olsem “tingting gut na toktok.” (2 Timoti 2:24) Man i gat pasin bilong tingting gut na toktok em i save skelim gut ol samting i kamap, na em i mekim gutpela pasin na i no save mekim tok i sutim bel bilong man.

TRAIM MEKIM OLSEM: Sapos yu no amamas long poroman marit bilong yu na yu laik toktok long em, orait tingim olsem yu toktok wantaim wanpela gutpela pren o bos bilong yu. Bai yu tok kros long ol? Nogat, a? Orait nau tingting long sampela as na yu mas toktok long poroman long pasin rispek na mekim ol gutpela tok, winim tok yu bai mekim long pren o bos bilong yu.​—Kolosi 4:6.

SAVE NAMBA 3. LAIN LONG MEKIM WOK BILONG YU OLSEM POROMAN MARIT

Wanem hatwok bilong en? Ating pastaim man marit bai mekim wok bos long pasin i skrapim bel bilong meri, o meri i no bin lain long tingting gut na toktok. Olsem: Antonio, em wanpela man marit long Itali, em i tok: “Taim papa bilong mi i wokim disisen long ol samting bilong famili, em i no save kisim tingting bilong mama. Olsem na pastaim mi mekim wok bos long famili bilong mi olsem mi wanpela king.” Debbie, em wanpela meri marit long Kanada, em i tok: “Mi strong long man bilong mi i mas putim gut ol klos samting na no ken putim nabaut. Tasol pasin bilong mi long bosim em i mekim na em i strong moa long bihainim pasin bilong em.”

Man marit i ken mekim wanem? Sampela man marit i ting tok em Baibel i mekim long meri i mas daun long man bilong en i wankain olsem tok Baibel i mekim long pikinini i mas bihainim tok bilong papamama. (Kolosi 3:20; 1 Pita 3:1) Tasol Baibel i tok man marit i mas “pas wantaim meri bilong en, na tupela i kamap wanpela bodi,” Baibel i no tok olsem long papa na pikinini, nogat. (Matyu 19:5) Jehova i tok meri i olsem poroman, o helpim, bilong man bilong em. (Stat 2:18) Em i no tok pikinini i olsem poroman, o helpim, bilong papa, nogat. Yu ting wanem? Sapos man i mekim pasin long meri olsem em i wanpela pikinini, yu ting em i givim ona long marit em Jehova i bin kamapim?

Baibel i tok yu mas mekim pasin long meri bilong yu olsem Jisas i mekim long kongrigesen Kristen. Meri bai no hatwok long tingim yu olsem het bilong em sapos (1) yu no ting wantu tasol em i mas mekim pasin olsem em i daun tru long yu, na (2) yu laikim em tumas olsem yu laikim bodi bilong yu yet, maski sampela taim hevi i kamap.​—Efesus 5:​25-29.

Meri marit i ken mekim wanem? Save olsem nau man bilong yu em i het bilong yu, em God yet i bin makim. (1 Korin 11:3) Sapos yu givim ona long man bilong yu, orait yu givim ona long God. Sapos yu sakim wok bos bilong man bilong yu, dispela i kamapim klia tingting bilong yu long em na long God na ol samting God i laik bai yu mas mekim.​—Kolosi 3:18.

Taim yutupela i toktok long sampela bikpela hevi bilong yupela, no ken sutim tok long pasin bilong man bilong yu​—lain long stretim hevi. Tingim Kwin Esta, em i laik bai man bilong em, King Serksis, i stretim wanpela pasin i no stret i bin kamap. Tasol em i no sutim tok long man bilong em, nogat​—em i tingting gut na toktok. Man bilong em i harim tok bilong em na bihain em i mekim samting i stret long mekim. (Esta 7:​1-4; 8:​3-8) Man bilong yu bai lain long laikim yu tumas sapos (1) yu larim em i lain long nupela wok bilong em olsem het bilong famili na (2) yu rispek long em, na yu mekim olsem yet long taim em i mekim sampela popaia.​—Efesus 5:33.

TRAIM MEKIM OLSEM: No ken tingim tumas ol pasin yu ting poroman bilong yu i mas senisim​—mobeta yu wokim lista bilong ol pasin yu yet i mas senisim. Ol man marit: Taim meri i bel hevi long pasin yu mekim olsem het bilong famili, askim em long olsem wanem yu ken mekim gut wok bos bilong yu, na raitim ol tok em i kamapim. Ol meri marit: Taim man i ting yu no soim rispek long em, askim em long olsem wanem yu ken kamap gutpela moa long dispela pasin, na raitim ol tok em i kamapim.

Holim Stretpela Tingting

Pasin bilong lain long i stap gut na stap amamas wantaim poroman marit i kain olsem pasin bilong lain long raun long baiskol. Yu save sampela taim bai yu pundaun taim yu wok long lain long raun long baiskol. Na olsem tasol, yu mas save olsem sampela taim bai yu popaia taim yu lain long mekim marit bilong yu i wok gut.

Holim pasin bilong lap na amamas. Tingim gut ol samting poroman i tingting planti long en, tasol lain long lap long ol popaia bilong yu yet. Painim ol rot bilong amamasim poroman insait long namba wan yia yupela i marit. (Lo 24:5) Na bikpela samting moa, larim Tok Bilong God i stiaim marit bilong yupela. Sapos yupela i mekim olsem, bai marit bilong yupela i wok long kamap strong moa long olgeta yia.

[Futnot]

a Mipela i senisim sampela nem.

ASKIM YU YET . . .

▪ Mi save kamapim olgeta tingting na wari bilong mi long poroman, o mi save go askim ol narapela long tingting bilong ol?

▪ Insait long 24 aua i go pinis, mi bin mekim wanem samting i soim olsem mi save laikim tru na rispektim poroman bilong mi?

[Blok/Ol Piksa long pes 11]

Baibel i Helpim Mipela na Marit i No Bruk

Taim Toru na Akiko i marit nupela yet, narapela i laikim tumas narapela. Tasol 8-pela mun bihain, dispela tupela marit bilong Japan i pasim tok long divos. Tupela i stori long samting i bin kamap.

Toru: “Mi lukim olsem mi na meri bilong mi i no gat wankain laik na tingting olsem mi bin ting. Olsem: Taim mitupela i lukim TV, mi laik lukim spot, tasol em i laik lukim ol muvi. Mi laik go aut na mekim ol samting, tasol em i laik stap long haus.”

Akiko: “Toru i save mekim olgeta samting famili bilong em i laikim, tasol em i no save kisim tingting bilong mi. Mi askim em: ‘Husat i bikpela samting long yu, mi o mama bilong yu?’ Na tu, mi kirap nogut long Toru i no save tok giaman. Mi tokim em, wanpela tok giaman bai kirapim yu long mekim narapela tok giaman bilong sapotim namba wan tok giaman, na sapos yu no lusim dispela pasin, marit bilong yumi bai pinis.”

Toru: “Mi les tru na mi go askim wanpela wanwok long givim gutpela tingting long samting mi ken mekim long meri bilong mi. Em i tok: ‘Tokim em long pasim maus. Sapos em i toktok planti, paitim em.’ Wanpela taim mi solapim pes bilong Akiko na kapsaitim tebol. Bikpela pait i kirap na Akiko i lusim haus. Em i go stap long wanpela hotel long Tokyo na mi mas i go na bringim em i kam bek. Bihain, mipela i pasim tok long divos. Taim mi lusim haus long moningtaim bilong i go long ofis, meri bilong mi i kirap bungim ol samting bilong em.”

Akiko: “Mi wok long karim ol beg bilong mi i go long dua na wanpela i paitim dua. Wanpela meri i sanap i stap. Em i wanpela Witnes Bilong Jehova. Mi tokim em long kam insait.”

Toru: “Taim mi kamap long ofis, mi gat tupela tingting long divos, olsem na mi hariap i go bek long haus. Taim mi kamap pinis, mi lukim Akiko i toktok wantaim dispela meri. Meri i tokim mi: ‘Yutupela i nidim wanpela samting yupela i ken mekim wantaim. Yu laik stadi long Baibel?’ Mi tok: ‘Yes. Mi redi long mekim wanem wanem samting em inap helpim mipela na marit i no ken bruk!’”

Akiko: “Meri hia i stretim rot bambai mipela i ken stadi long Baibel. Senis i kamap long mipela taim mipela i ritim tok bilong Baibel long marit. Em i tok: ‘Olsem na . . . man i save lusim papamama na i pas wantaim meri bilong en, na tupela i kamap wanpela bodi tasol.’”​—Stat 2:24.

Toru: “Wantu mi kisim gut dispela tok. Mi tokim papamama, ‘Kirap long nau, bai mi toktok wantaim meri bilong mi paslain long mi wokim disisen.’ Na tu, mi lusim pasin bilong dring planti. Na taim mi kisim save olsem God i nolaik tru long pasin bilong tok giaman, mi wok strong long mekim tok tru tasol.”

Akiko: “Pasin bilong mi tu i senis. Olsem: Pastaim mi bin sakim tok bilong Toru. Tasol taim mi lukim em i bihainim ol stiatok bilong Baibel, mi kirap wok gut wantaim em. (Efesus 5:​22-24) Mitupela i marit inap 28 yia pinis na mipela i stap amamas. Mipela inap winim ol hevi bilong mipela long rot bilong save gut long narapela narapela na bihainim ol gutpela tok bilong Baibel.”

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim