“Samting i Stap Hait na i Bagarapim Man”
WANPELA lain i kisim save olsem long olgeta bikpela man i save mekim wok long kompiuta long Amerika, inap 200,000 ol i save lukim ol program bilong ol piksa nogut bilong pasin sem long Intenet. Planti man moa ol i wok long inapim laik bilong ol long maritpasin samting long rot bilong Intenet. Dokta Al Cooper, em wanpela saveman i go pas long skelim tingting bilong ol dispela lain, em i tok: “Dispela i wanpela samting i stap hait na i bagarapim man, long wanem, wan wan man tasol i luksave olsem dispela samting inap bagarapim em.”
Wanem lain i save lusim bikpela hap taim moa long lukim ol dispela kain program? Dokta Cooper i tok: ‘Em ol lain i no gat rot long inapim laik bilong mekim maritpasin inap longpela taim, tasol nau ol i gat rot long inapim laik bilong ol’ long rot bilong Intenet.
Tasol planti manmeri bilong dispela lain, ol i ting dispela pasin i no inap nogutim ol. Yu ting dispela tingting i stret? Wankain olsem skin bilong wanpela man i kalabus long ol drak i lain pinis long kisim drak, olsem tasol planti man i kalabus long lukim ol dispela program long Intenet ol i laik lukim moa yet ol piksa nogut bilong inapim laik bilong ol. Tasol dispela samting inap mekim na ol i lusim wok mani bilong ol na marit bilong ol inap bagarap!
Tasol ol man i laik mekim ol samting God i laikim, ol i gat narapela as na ol i mas abrusim ol program bilong ol piksa nogut bilong pasin sem long Intenet. Baibel i tok: “Olsem na yupela i mas kilim i dai olgeta pasin bilong dispela graun i stap long bel bilong yupela. Mi tok long olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man. Dispela pasin bilong mangal em i wankain olsem pasin bilong lotu long giaman god. God i redim pinis pe nogut bilong givim long olgeta man i save mekim ol dispela kain pasin, em ol man i save sakim tok bilong en.” (Kolosi 3:5, 6) Bilong ‘kilim i dai’ ol laik nogut bilong bel, man i mas wok long kisim pasin bilong laikim tru God Jehova. (Song 97:10) Sapos dispela samting nogut i pulim em, em i mas strongim pasin bilong em long laikim tumas Jehova long rot bilong stadi long Baibel. Pasin bilong bung wantaim ol Witnes Bilong Jehova long Haus Kingdom inap tru long strongim tingting bilong man long mekim God i amamas.