Wanpela Oganaisesen i Stap Long Olgeta Hap i Tingim Tru Ol Narapela
MAN! I go inap longwe tru, ai bilong yumi inap lukim ol man. Planti ol i lapun, na sampela bilong ol i bagarap tru na klostu ol i no inap long wokabaut. Sampela meri ol i gat bel na ol yangpela marit i gat planti liklik pikinini. Olgeta i refyuji—ol man, na meri, na pikinini—na pait bilong kantri, ol bagarap bilong graun, na ol narapela samting i mekim na ol i mas lusim ol ples bilong ol na go long wanpela kantri i stap klostu bilong kisim helpim. Sampela bilong ol em planti taim ol i mas lusim ples bilong ol. Taim ol i lukim namba wan samting i makim olsem pait i laik kamap insait long kantri o bagarap bilong graun i laik kamap, ol i save kisim wan wan samting bilong haus, na kisim ol pikinini, na ol i go painim wanpela gutpela hap ol inap sindaun long en. Bihain, taim ol dispela hevi i pinis, planti refyuji i save go bek gen long as ples bilong ol na stretim gen sindaun bilong ol.
Insait long planti yia i go pinis, Ripablik Bilong Sentral Afrika i orait long ol refyuji bilong planti kantri ol i kam sindaun long hap bilong ol. I no longtaim i go pinis na pait i kamap long Ripablik Demokratik Bilong Kongo, olsem na planti tausen manmeri, na planti Witnes Bilong Jehova tu, ol i mas lusim dispela kantri na ranawe i go long Ripablik Bilong Sentral Afrika.
Ol Brata i Helpim Ol Refyuji
Ol Witnes long Ripablik Bilong Sentral Afrika ol i amamas long stretim wok bilong helpim ol dispela refyuji. Ol i stretim sampela hap ol dispela brata Kristen i ken stap long en. Pastaim ol brata i givim ol rum long haus bilong ol yet, tasol taim planti refyuji moa i kam, ol i mas stretim ol narapela rot bilong helpim ol. Ol i stretim sampela Haus Kingdom i kamap olsem ol rum slip. Ol Witnes long dispela hap ol i kirap mekim ol wok bilong putim ol lait, stretim ol paip bilong kisim wara, na putim simen long plua bambai ol brata i ken stap long gutpela hap. Ol dispela refyuji tu ol i wok wantaim ol brata long wokim ol dispela rum slip bilong ol. Ol i stretim rot bilong mekim olgeta miting long tok Lingala bambai ol brata refyuji ol i ken kisim ol kaikai bilong spirit bilong strongim ol. Pasin bilong wok gut wantaim i stap namel long ol Witnes bilong Ripablik Bilong Sentral Afrika na ol Witnes refyuji, na dispela i kamapim olsem ol i stap olsem wanpela bikpela lain brata i stap long olgeta hap.
Planti famili refyuji ol i bruk bruk na ol i no save kamap wantaim. Sampela taim, ol dispela famili ol i save bung gen taim ol i kamap long hap ol i go long en. Long olgeta Haus Kingdom i gat wanpela lista bilong olgeta brata i kamap gut long dispela hap. Ol i save stretim rot bilong painim ol narapela em ol i no kamap yet. Brens-ofis i bosim wok bilong ol Witnes Bilong Jehova long dispela kantri i bin salim 3-pela ka long olgeta de bilong kisim ol brata i kam yet long rot na bilong painim sampela i lus. Ol i makim ol dispela ka wantaim wanpela bikpela rait i tok, “WAS TAUA—Ol Witnes Bilong Jehova.”
Tingim bikpela amamas bilong 7-pela pikinini refyuji taim ol i lukim wanpela bilong ol dispela ka bilong ol Witnes Bilong Jehova. Ol dispela pikinini i bin lus long papamama bilong ol. Wantu ol i ran i go long dispela ka na tokaut olsem ol i Witnes. Ol brata i putim ol i go insait long ka na kisim ol i go long wanpela Haus Kingdom, na bihain ol i bung gen wantaim ol famili bilong ol.
Wanem samting i strongim ol dispela Kristen long karim ol dispela hevi, na i no wanpela taim tasol, nogat, long planti taim? Ol i bilip tru olsem yumi stap long taim bilong las de olsem Baibel i tok profet long en.—2 Timoti 3:1-5; KTH 6:3-8.
Olsem na ol i save, inap liklik taim na God Jehova bai pinisim ol pait, na pasin bilong bel nogut long narapela lain, na pasin bilong bagarapim man na mekim nogut long em. Dispela hevi bilong ol refyuji bai kamap olsem samting bilong bipo. Long nau, ol Witnes Bilong Jehova i bihainim tok bilong aposel Pol long 1 Korin 12:14-26, na ol i save wok strong long narapela i lukautim gut narapela. Maski ol wara na boda na tok ples i brukim ol na ol ples bilong ol i stap longwe longwe, narapela i save tingim tru narapela, olsem na ol i save kirap kwik long helpim ol narapela taim ol i gat hevi.—Jems 1:22-27.
[Mep long pes 30]
(Bilong save ol dispela rait i stap we long pes, lukim buk o magasin)
AFRIKA
Ripablik Bilong Sentral Afrika
Ripablik Demokratik Bilong Kongo
[Kredit Lain]
Mountain High Maps® Copyright © 1997 Digital Wisdom, Inc.
[Ol Piksa long pes 30]
Ol i mekim wok long 3-pela Haus Kingdom olsem ples bilong bungim ol brata
[Piksa long pes 31]
Ol i redim kwik ol samting bilong haus kuk
[Piksa long pes 31]
Planti refyuji moa i kam
[Ol Piksa long pes 31]
Ol nupela bebi i kamap na ol i refyuji pinis