Stori Bilong Wanpela Man
Mipela Bilip Long Jehova
STORI BILONG PAUL SCRIBNER
“Moning tru Misis Stackhouse. Nau moning mi kisim oda bilong ol kek bilong Ista, na mi save bai yu laikim wanpela bilong famili bilong yu.” Mi mekim dispela tok long mun Mas 1938, long Atco, New Jersey, Amerika. Mi toktok wantaim wanpela gutpela kastama tru i stap long hap mi save raun long en bilong salim ol samting bilong wanpela haus bret (General Baking Company). Mi kirap nogut taim Misis Stackhouse i tok nogat long dispela kek.
EM I TOK: “Mi no laik putim oda long kek. Mipela i no save mekim ol samting bilong Ista.”
Nau mi paul long tok bilong em olsem ol i no save mekim Ista. Mi tingim namba wan bikpela lo bilong wok bilong salim samting, olsem oltaim tok bilong kastama i stret. Olsem na bai mi mekim wanem? Mi tokim meri: “Tasol kek em i gutpela, na mi save pinis olsem yu save laikim ol samting mipela wokim. Yu ting famili bilong yu bai laikim maski yupela i no mekim Ista?”
Meri i tok: “Mi no ting, tasol mi bin i gat laik long tokim yu long wanpela samting Mista Scribner, na ating nau em i gutpela taim long mekim.” Man! Tok em i laik mekim bai senisim tru laip bilong mi! Misis Stackhouse, em i bilong kongrigesen bilong Berlin, New Jersey, bilong ol Witnes Bilong Jehova. Na em i stori olsem wanem Ista i bin kamap na em i givim 3-pela buklet long mi. Nem bilong ol i olsem, Safety, Uncovered, na Protection. Mi kisim ol dispela buklet na go long haus. Mi laik save long ol tok bilong ol dispela nius, tasol mi tingting planti tu. Tok bilong Misis Stackhouse i kirapim mi long tingim sampela tok mi bin harim bipo, taim mi pikinini yet.
Namba Wan Taim Mi Bungim Ol Sumatin Bilong Baibel
Mama i karim mi long Janueri 31, 1907, na long 1915, taim mi gat 8-pela krismas, papa i dai long sik kensa. Dispela i mekim na mi tupela mama i go sindaun wantaim papamama bilong em long wanpela bikpela haus long Malden, Massachusetts. Benjamin Ransom em i ankol bilong mi long sait bilong mama, na em wantaim meri bilong em ol i stap long namba 3 plua bilong dispela haus. Paslain liklik long 1900, Ankol Ben i kirap na bung wantaim ol Intenesenel Sumatin Bilong Baibel, em nem bilong ol Witnes Bilong Jehova long bipo. Mi laikim tru Ankol Ben, tasol ol narapela long famili bilong mama, em ol i bilong misin Metodis, ol i ting ankol em i longlong liklik. Planti yia bihain, paslain long meri bilong em i katim marit, bilip bilong ankol long lotu i as na meri i tokim ol dokta long putim ankol long wanpela haus bilong ol man i gat sik longlong! Tasol wantu ol dokta bilong dispela haus sik i luksave olsem Ankol Ben i no gat sik long tingting, ol i tok sori long em na larim em i go.
Ankol Ben i save kisim mi i go wantaim em long sampela miting bilong ol Intenesenel Sumatin Bilong Baibel long Boston, na taim i gat ol bikpela bung o man bilong narapela ples i kam bilong mekim toktok, mi save go wantaim em. Wanpela taim man i kam mekim toktok, em Charles Taze Russell, em i bin lukautim wok bilong autim tok long dispela taim. Narapela taim, ol i mekim bung bilong lukim piksa “Photo-Drama of Creation.” Maski ol dispela samting i bin kamap long 1915, inap long nau mi ken tingim yet piksa ol i wokim bilong Abraham taim em i kisim Aisak i go antap long maunten bilong givim em olsem ofa long God. (Stat, sapta 22) I olsem mi inap lukim yet piksa bilong Abraham na pasin bilong em long bilip tru long Jehova taim em na Aisak i hatwok long go antap long maunten wantaim ol diwai bilong wokim paia. Mi wanpela pikinini i no gat papa, olsem na mi pilim tru dispela samting.
Bihain, ankol wantaim meri bilong em ol i go sindaun long Maine, na mama i marit gen na kisim mipela i go long New Jersey. Olsem na inap longpela taim mi no lukim ankol. Long New Jersey taim mi bikpela manki, mi bungim Marion Neff. Mi save amamas long bung wantaim famili bilong em, em i gat 7-pela brata sista na famili olgeta i bilong lotu Presbitirian. Long planti Sande, long apinun tru, mi save bung wantaim dispela famili na yut-grup bilong lotu bilong ol, olsem na mi kamap wanpela Presbitirian. Tasol, sampela save mi bin kisim taim mi bin bung wantaim ol Sumatin Bilong Baibel i stap yet long tingting bilong mi. Mi na Marion i marit long 1928, na long 1935 na 1938 mipela i kamapim tupela pikinini meri, em Doris na Louise. Taim wanpela pikinini i liklik yet na narapela em i nupela bebi, mipela i pilim olsem mipela mas i gat lotu bilong helpim mipela long mekim bikpela long famili.
Mi Painim Tok i Tru Long Ol Dispela Buklet
Mi na Marion i laik joinim wanpela lotu, olsem na mipela i stretim rot bilong mekim olsem. Long olgeta Sande, wanpela bilong mipela i stap long haus wantaim tupela pikinini, na narapela i go long wanpela lotu. Long wanpela Sande, em taim bilong Marion long stap long haus, tasol mi tokim em olsem mi ken i stap na lukautim ol pikinini, na bai mi inap ritim buklet Safety, em i namba wan buklet bilong dispela 3-pela mi bin kisim long Misis Stackhouse. Taim mi stat long ritim dispela buklet, mi no inap lusim! Tingting bilong mi i kamap strong tru olsem mi painim samting mi no inap painim long narapela lotu. Long Sande bihain mi mekim wankain samting gen, na mi amamas long stap na lukautim pikinini na ritim namba 2 buklet, Uncovered. I olsem samting mi ritim i no nupela long mi. Olsem wanem? Em ol samting Ankol Ben i bilip long en? Famili bilong mi i bin ting lotu bilong em i bilong ol longlong lain. Marion bai i gat wanem tingting? Tasol mi wari nating. Inap sampela de bihain long mi bin ritim buklet Uncovered, mi lusim wok na kam long haus na mi kirap nogut taim Marion i tok: “Mi ritim pinis ol dispela buklet yu karim i kam long haus. Stori bilong ol i kirapim tru tingting bilong mi.” Em nau, liklik wari bilong mi i pinis!
Baksait long wanpela buklet i stori long nupela buk Enemies, na buk i kamapim klia bilip kranki bilong lotu giaman. Mipela laik kisim dispela buk. Tasol paslain long mipela postim toksave, wanpela Witnes i raun long ol haus i kam na soim dispela buk long mipela. Buk i helpim tru mipela! Mipela no go moa long ol narapela narapela lotu, na mipela kirap na go long ol miting bilong kongrigesen bilong ol Witnes Bilong Jehova i stap long Camden, New Jersey. Sampela mun bihain, em long Sande, Julai 31, 1938, klostu 50 bilong mipela i bung ausait long haus bilong Sista Stackhouse, em long dispela haus mi bin traim salim ol kek bilong Ista bipo. Mipela putim yau long tok bilong Jas Rutherford i stori long baptais, em ol i bin rekodim. Taim tok i pinis, mipela senisim klos bilong mipela insait long haus, na 19 bilong mipela i kisim baptais long wanpela wara i stap klostu.
Strongpela Laik Long Mekim Wok Painia
Bihain liklik long mi baptais, wanpela sista long kongrigesen i tokim mi long lain i holim nem painia, na wok autim tok em i nambawan wok bilong ol. Wantu mi laik harim sampela stori moa, na i no longtaim mi prenim wanpela famili, em olgeta i painia. Man i lapun liklik, em Brata Konig, na meri bilong em, na pikinini meri bilong ol i bikpela pinis, olgeta i mekim wok painia long wanpela kongrigesen i stap klostu. Mi wanpela papa na tupela pikinini bilong mi i liklik yet, na mi tingim tru bikpela amamas famili bilong Konig i kisim long wok autim tok bilong ol. Planti taim mi bin go long haus bilong ol, lusim ka bilong haus bret, na wok wantaim ol long autim tok. I no longtaim na mi tu laik mekim wok painia. Tasol olsem wanem? Mi na Marion i gat tupela liklik pikinini, na wok mani i save pulim bikpela hap taim bilong mi. Stat long taim Namba Tu Pait i kirap long Yurop, planti yangpela man moa i go insait long ami bilong Amerika, olsem na wok bilong mipela ol man i no insait long ami i go bikpela moa. Bos i laik bai mi raun long sampela hap moa, na mi save bai mi no inap tru mekim wok painia sapos mi mekim olsem.
Taim mi tokim Brata Konig long laik bilong mi long painia, em i tok: “Givim bel long wok bilong Jehova, na oltaim tokim Em long mak yu laik winim taim yu beten. Em bai i helpim yu long winim dispela mak.” Winim wanpela yia mi bin mekim olsem. Planti taim mi tingim sampela skripsa olsem Matyu 6:8, em i helpim yumi long save olsem paslain long yumi tokim Jehova long samting yumi sot long en, Em i save pinis long dispela samting. Na mi traim long bihainim tok bilong Matyu 6:33, olsem wok pastaim long painim Kingdom bilong God wantaim stretpela pasin bilong em. Wasman sekit, em Brata Melvin Winchester, em tu i bin strongim mi.
Mi tokim Marion long ol mak mi laik winim. Mipela stori long tok bilong Malakai 3:10, em i kirapim yumi long traim Jehova na wetim em long givim blesing long yumi. Mi amamas long bekim bilong Marion, em i tok: “Sapos yu laik painia, mi no laik pasim yu. Mi inap lukautim tupela pikinini meri taim yu mekim wok painia. Na yumi no gat wok long planti samting bilong skin.” Mi na Marion i marit 12-pela yia pinis, na mi save pinis olsem em i meri bilong bosim gut mani na lukautim gut ol samting bilong haus. I kam inap long nau Marion em i gutpela poroman tru bilong wok painia, na wanpela bikpela samting i helpim mipela stap gut long dispela fultaim sevis klostu 60 yia pinis, em pasin bilong Marion long amamas long liklik samting bilong skin em i holim na tingim olsem em i planti samting.
Inap planti mun mipela i beten na stretim gut ol samting na bungim mani, olsem na long 1941 long taim bilong san, mi na Marion i baim wanpela haus ka bilong mipela long pulim raun, longpela bilong em i olsem 5.5 mita. Mi lusim wok mani bilong mi, na kamap painia oltaim long Julai 1941, na i kam inap long nau mi no lusim dispela wok. Namba wan asainmen bilong mi em 10-pela narapela narapela hap i stap long haiwe-rot namba 50 namel long New Jersey na St. Louis, Missouri, em long dispela hap mipela bai i gat kibung long kirap bilong mun Ogas. Ol i salim nem na atres bilong ol brata i stap long dispela rot, olsem na mi bin rait na tokim ol long wanem taim mi bai kam. Taim mipela kamap long ples kibung, mi mas lukim ol lain i lukautim wok bilong ol painia na kisim narapela asainmen.
“Bai Mi Traim Tok Bilong Jehova”
Mipela hipim ol buk i go long liklik haus ka bilong mipela na go long laspela miting bilong mipela long Camden na tok gutbai long ol brata. Mipela gat tupela liklik pikinini meri bilong lukautim na bihain long kibung mipela i no save wanem hap mipela bai go long en. Ating sampela brata i ting mipela i no bihainim gutpela tingting, na planti liklik i bin tok: “I no longtaim na yu bai kam bek.” Mi tingim yet bekim bilong mi. Mi bin tok: “Bai mi no tok olsem mi no inap kam bek. Jehova i tok em bai lukautim mi, olsem na bai mi traim tok bilong Jehova.”
Inap 60 yia mipela mekim wok painia long 20 narapela narapela taun i stap namel long Massachusetts i go inap long Mississippi, na mipela ken tok Jehova i truim tok bilong em. Ol blesing em i givim long Marion, mi yet, na tupela pikinini meri bilong mipela i antap moa yet long ol samting mi bin ting em bai mekim taim mi kirapim wok long 1941. Ol blesing mipela kisim i olsem, tupela pikinini meri i mekim wok painia long kongrigesen bilong ol i stap klostu long mipela, na mipela i gat wan handet samting pikinini man na meri bilong spirit (las taim mi bin kaunim) i stap long ol narapela narapela hap bilong Is Kos bilong Yunaitet Stets. Mi mekim stadi wantaim 52 manmeri ol i bin dediketim laip bilong ol long God Jehova, na 48 bilong ol stadi bilong Marion i bin mekim olsem.
Long Ogas 1941, mipela kamap long St. Louis, na long dispela hap mi bungim Brata T. J. Sullivan bilong Betel. Em i holim pas bilong Sosaiti i tokaut olsem mi wokman bilong lotu. Mi mas i gat kain pas olsem, long wanem, pait i wok long go bikpela, na i gat lo olsem ol man i mas insait long ami. Mi tokim Brata Sullivan olsem meri bilong mi i save autim tok planti aua olsem mi yet na em i laik wok painia wantaim mi. Dipatmen bilong kibung bilong lukautim wok painia i no op yet, tasol wantu Brata Sullivan i putim nem bilong Marion long lista bilong ol painia, na em i askim mipela: “Yupela bai mekim wok painia long wanem hap bihain long kibung?” Mipela i no save. Olsem na em i tok: “No ken tingting planti. Yu bai bungim sampela long kibung ol i kam long hap i sot long ol painia, na ol samting bai orait. Tasol rait na toksave long mipela long hap yu bai stap long en, na mipela bai i makim dispela olsem asainmen bilong yu.” Mipela i mekim olsem. Mipela bungim wasman sekit bilong mipela long bipo, em Brata Jack DeWitt, na em i save long sampela i stap long New Market, Virginia, ol i gat wanpela haus painia na ol i laikim sampela painia moa. Olsem na bihain long kibung, mipela go long New Market.
Gutpela samting i painim mipela long New Market. Yu ting husat i kam long Philadelphia bilong wok painia wantaim mipela? Benjamin Ransom! Em nau, em Ankol Ben tasol. Mi kisim bikpela amamas long wok autim tok wantaim em 25 yia bihain long em i bin planim tok i tru long bel bilong mi long Boston! Maski inap planti yia ol famili i les long em, na tok bilas long em, na birua long em, Ankol Ben i no bin lusim pasin bilong laikim tumas Jehova na wok autim tok.
Mipela amamas long 8-pela mun mipela i bin stap long haus painia bilong New Market. Insait long dispela hap taim, mipela lainim kain kain samting, olsem pasin bilong kisim kakaruk o sampela kiau olsem senis bilong buk o nius mipela lusim long haus. Bihain long dispela 8-pela mun, Ankol Ben, mi na Marion, wantaim tripela narapela, mipela kisim asainmen bilong mekim wok painia salim long Hanover, Pennsylvania—dispela em i namba wan bilong ol 6-pela asainmen mipela bai kisim long Pennsylvania, kirap long 1942 i go inap long 1945.
Wok Painia Salim Long Taim Bilong Namba Tu Pait
Long taim bilong Namba Tu Pait mipela i kisim sampela hevi long ol manmeri i birua long mipela, long wanem, mipela i no insait long ol samting bilong pait, tasol oltaim Jehova i givim strong long mipela. Wanpela taim long Provincetown, Massachusetts, olpela ka bilong mipela i bagarap long rot, na bilong mekim wanpela gobek mi mas wokabaut inap sampela kilomita namel long hap bilong ol Katolik i save mekim hatpela pasin long mipela. Taim mi abrusim sampela hambak manki long rot, ol i luksave long mi na kirap bikmaus long mi. Ol ston ol i tromoi i abrus long mi taim mi hariap i go. Mi no laik bai ol i bihainim mi. Mi kamap pinis long haus bilong man i laik harim tok, na mi stap orait. Tasol man bilong haus, em i memba bilong wanpela lain i save litimapim kantri (American Legion), em i tok sori, na em i tok: “Mi no inap stori wantaim yu nau nait, long wanem, mi lusim tingting olsem mi bin pasim tok pinis long go long taun na lukim piksa wokabaut.” Nau pret i kisim mi taim mi tingim ol dispela manki i tromoi ston ol i wetim mi long kam bek. Tasol mi amamas taim man bilong haus i tok: “Yu ting yu inap wokabaut wantaim mipela? Yumi inap toktok long rot.” Olsem na mi autim tok long em, na mi no kisim hevi taim mipela abrusim ol dispela manki.
Lukautim Gut Famili na Wok Autim Tok
Bihain long pait, mipela i bin i gat ol narapela narapela asainmen long Virginia. Long wanpela asainmen, mipela stap 8-pela yia long Charlottesville na mekim wok painia salim na painia oltaim. Long 1956 tupela pikinini i bikpela pinis na ol i marit. Mi na Marion i raun yet na mekim wok painia long Harrisonburg, Virginia, na wok painia salim long Lincolnton, North Carolina.
Long 1966, ol i makim mi long mekim wok sekit, na mi raun na lukim ol narapela narapela kongrigesen na strongim ol brata, kain olsem Brata Winchester i bin strongim mi long New Jersey long 1930 samting. Inap tupela yia mi lukautim ol kongrigesen bilong wanpela sekit long Tennessee. Bihain long dispela ol i askim mi na Marion long mekim gen wok em i olsem namba wan wok mipela laikim tumas, em wok painia salim. Long 1968 i go inap long 1977, mipela mekim wok painia salim long hap saut bilong Amerika, long sampela narapela narapela hap bilong Georgia na Mississippi.
Long Eastman, Georgia, ol i makim mi long stap wasman siaman bilong kongrigesen, na mi bai kisim ples bilong Brata Powell Kirkland. Em i wanpela gutpela lapun brata, em i bin mekim wok sekit inap planti yia, tasol nau skin bilong em i no gat strong olsem bipo. Em i amamas tru mi mekim dispela wok, na em i helpim mi. Helpim bilong em i bikpela samting, long wanem, i gat sampela kros insait long kongrigesen na sampela i gat namba ol i insait long dispela. Kros i go bikpela na mi tromoi bikpela hap taim bilong beten long Jehova. Mi tingim sampela tok bilong Baibel olsem Sindaun 3:5, 6, em i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Long rot bilong toktok gut wantaim, mipela i helpim kongrigesen long kamap wanbel, na dispela i helpim olgeta.
Long 1977 mipela i pilim hevi bilong bikpela krismas, na ol i makim mipela long stap gen long hap bilong Charlottesville, em tupela pikinini meri wantaim famili bilong ol i stap long dispela hap. Insait long 23 yia i go pinis, mipela kisim amamas long wok long dispela hap, na helpim wok bilong kamapim kongrigesen long Ruckersville, Virginia, na long lukim ol pikinini na bubu pikinini bilong ol Baibel-stadi bilong mipela bilong pastaim ol i go bikpela na kamap elda bilong kongrigesen, na painia, na wok long Betel. Mi na Marion inap bihainim yet gutpela sediul bilong autim tok, na mi mekim wok elda long kongrigesen long Is Charlottesville, na mi save lukautim wanpela Buk-Stadi na mekim sampela pablik-tok.
Planti yia i kam na i go pinis, na insait long dispela hap taim mipela i bin i gat sampela hevi, olsem ol narapela tu i gat. Olsem: Maski mipela bin wok strong, Doris i no strong long samting bilong spirit taim em i gat 17 i go inap long 19 krismas samting, na em i maritim wanpela man i no Witnes. Tasol em i no bin lusim olgeta pasin bilong laikim tru Jehova, na long nau pikinini man bilong em, Bill, em i wok long Betel long Wallkill, New York, inap 15 yia pinis. Doris na Louise, nau man bilong tupela i dai pinis, tasol ol i stap klostu long mipela na ol i amamas long mekim wok painia oltaim.
Skul Mipela Kisim Insait Long Planti Yia
Mi lainim sampela samting i helpim mipela long mekim gut wok bilong Jehova: No ken ting yu mas holim planti samting bilong skin. Stap gutpela piksa long olgeta samting yu mekim, na dispela i makim tu ol samting yu mekim taim yu no stap long ai bilong ol man. Bihainim tok bilong “wokboi i gat gutpela tingting.”—Matyu 24:45.
Marion i wokim sotpela lista bilong helpim husat i laik mekim wok painia taim ol i gat ol liklik pikinini: Wokim na bihainim gutpela sediul. Tingim wok painia i olsem wanpela wok yu tingting long mekim oltaim. Kisim gutpela kaikai. Kisim gut slip. No ken mekim planti samting tumas bilong amamas. Oltaim mekim tok i tru, wantaim olgeta hap wok bilong autim tok, olsem samting ol pikinini bai amamas long insait long en. Mekim ol samting na bai pikinini i no ken pilim les long taim bilong autim tok.
Nau mitupela wantaim i winim 90 krismas. Long 62 yia i go pinis mipela bin harim tok bilong baptais bilong mipela ausait long haus bilong famili Stackhouse, na mipela insait long fultaim sevis inap 60 yia pinis. Tasol mi na Marion i tok tru olsem mipela pilim bikpela amamas long bel long i stap bilong mipela. Mi tenkyu tru long gutpela tok mi bin kisim taim mi stap nupela papa, olsem mi mas tingim ol mak bilong spirit mi laik winim pastaim na wok long winim ol, na mi tenkyu tru long gutpela meri bilong mi, Marion, na long tupela pikinini meri long ol samting ol i mekim inap planti yia bilong helpim mipela. Mipela i no holim planti samting bilong skin, tasol planti taim mi tingim olsem tok bilong Saveman 2:25 (NW ) i makim mi yet, em i tok: “Husat i save kisim gutpela kaikai na dring olsem mi?”
Tru tumas, long mipela yet, Jehova i bin truim tok promis bilong em long Malakai 3:10. Em i bin ‘givim planti samting long mipela na mipela i no sot’!
[Blok/Piksa long pes 29]
LONG TAIM BILONG PAIT
Long nau em klostu 60 yia bihain long pait, tasol famili olgeta i ken tingim gut ol samting i painim ol long dispela taim.
Doris i tok: “Pensilvenia inap stap ples kol tru.” Louise i tok: “Wanpela nait i kol nogut tru—i olsem ais i holim skin bilong mipela. Taim mipela stap baksait long olpela ka bilong mipela, mi sindaun antap long lek daunbilo bilong Doris bilong pasim kol, na em i mekim olsem long mi.”
Doris i tok: “Tasol i no gat wanpela taim mipela pilim olsem mipela sot long ol samting mipela mas i gat. Mipela i save, mipela i raun long planti hap, winim planti narapela manmeri, tasol oltaim mipela i kaikai gut, na mipela gat ol gutpela klos ol pren long Ohaio i givim mipela, em ol i gat ol pikinini meri em krismas bilong ol i bikpela liklik long mipela.”
Louise i tok: “Oltaim papa na mama i kamapim klia ol i laikim mipela tru, na amamas long mipela. Na planti taim mipela i raun wantaim ol long wok autim tok. Dispela i mekim na mipela i pilim olsem mipela i bikpela samting long ol, na mipela pas tru wantaim ol.”
Paul i tok: “Ka bilong mipela i bilong 1936. Na ol dispela ka i gat hevi olsem hap i tanim wil i save bruk olgeta taim. Ating ensin i gat bikpela strong tumas winim strong bilong ka yet. I luk olsem oltaim dispela samting bilong tanim wil i save bruk long nait i kol nogut tru. Na mi mas go long hap ol rabis-ka i stap long en bilong painim samting bilong stretim. Mi kamap saveman stret bilong mekim dispela wok.”
Marion i tok: “No ken lusim tingting long taim bilong pait, olgeta man i mas kisim kat bilong gavman i makim hamas bilong ol samting yumi inap baim. Ol i putim mak long olgeta samting—abus, bensin, taia bilong ka, olgeta samting. Na olgeta taim mipela kisim nupela asainmen, mipela mas go long ofis bilong gavman i stap long dispela nupela hap na wokim ol pepa bilong kisim nupela kat. Sampela taim mipela mas wet planti mun bilong kisim nupela kat. Long tingting bilong mi i olsem taim nupela kat i kam, mipela bai kisim nupela asainmen gen, na mipela mas mekim olgeta samting gen bilong kisim kat. Tasol oltaim Jehova i bin lukautim mipela.”
[Piksa]
Mi na Marion wantaim Doris (han kais) na Louise, yia 2000
[Piksa long pes 25]
Mi wantaim mama long 1918, taim mi gat 11-pela krismas
[Piksa long pes 26]
Mi na Louise, Marion, na Doris long 1948 taim tupela pikinini meri i kisim baptais
[Piksa long pes 26]
Piksa bilong marit bilong mipela, Oktoba 1928
[Piksa long pes 26]
Tupela pikinini meri bilong mi (han sut tru na han kais tru) na mi yet long Yanki Stediam, 1955