Ol i Tingim Yet Ol Samting Ol i Lukim

LONG olgeta yia, ol Witnes Bilong Jehova i save bung wantaim long ol bung bilong ol Kristen na ol kibung ol i kamapim long wan wan kantri ol i stap long en. Ol i mekim olsem bilong kisim ol gutpela tok bilong strongim ol long ol samting bilong spirit na bilong poroman wantaim. Tasol i gat ol narapela samting tu bilong ol dispela bung em ol man i kam nupela ol i save pilim tru.

Olsem, long Julai 1999, planti tausen Witnes long Mosambik ol i bin bung wantaim inap 3-pela de long “Tok Profet Bilong God” Kibung Distrik. Planti man i stap long dispela kibung em i namba wan taim bilong ol long kam. Ol i pilim tru ol tok ol i harim na ol samting ol i lukim.

Wanpela meri i bin go long bung long Haus Kibung bilong Maputo na tok: “I no gat wanpela taim mi bin lukim wanpela hap i naispela tru olsem! Ol toilet na ples waswas i klin na i gat ol sop na glas bilong lukluk. Dispela hap i gutpela tru na i no gat nois bilong ol pikinini i pait nabaut. Na ol manmeri i no pas pas na subim narapela! Mi lukim ol yangpela i amamas na ol i toktok gut wantaim ol narapela. Na tu, mi kirap nogut long pasin bilong olgeta long bilas gut tru. Narapela taim, mi bai kisim ol pikinini bilong mi i kam na bai mi kirapim man bilong mi olsem mipela famili olgeta i mas i go long kibung.”

Yes, ol man i save tingim stretpela pasin bilong ol Witnes Bilong Jehova, na pasin bilong ol long holimpas bilip, na i stap klin long skin. I gat wanem as na ol Witnes i narapela kain? Long wanem, ol i save wok strong tru long bihainim ol samting ol i lainim long Baibel. Olsem wanem? Yu laik bung wantaim ol long bikpela kibung bilong ol long dispela yia, o long ol miting bilong ol long olgeta wik long Haus Kingdom i stap klostu na yu yet inap lukim pasin bilong ol?

[Piksa long pes 32]

SAMBIA

[Piksa long pes 32]

KENYA

[Piksa long pes 32]

MOSAMBIK