Em i Stap Strong Inap Long Em i Dai

LONG wanpela video bilong 1993 ol i soim long ol nupela lain i kam wok long nambawan ofis bilong ol Witnes Bilong Jehova, Lyman Alexander Swingle i kamapim tingting bilong em long wok bilong Jehova yumi mas mekim, na em i tok: “Larim su bilong yu i stap long lek i go inap long yu dai!”a

Brata Swingle i gat 90 krismas na em yet i bin mekim dispela samting em i bin kirapim ol narapela long mekim. Em i “stap strong i go inap long [em i dai.]” (Matyu 24:13) Maski em i sik, tasol em i bin go long wanpela miting bilong Gavening Bodi Bilong Ol Witnes Bilong Jehova long Trinde, Mas 7. Em i wanpela bilong dispela lain. Long Tunde, long wik bihain, sik bilong em i go bikpela, na long Mas 14, long 4:26 long moningtaim, dokta bilong em i toksave olsem em i dai pinis.

Lyman Swingle i kirap wok long nambawan ofis bilong ol Witnes Bilong Jehova long Brooklyn, New York, long Epril 5, 1930. Em i wok long dispela hap inap 71 yia samting. Pastaim Lyman i wok long ples bilong pasim skin bilong ol buk, bihain em i wok long rum bilong prinim ol buk, na tu em i helpim long wokim ol ing. Brata Swingle i bin wok 25 yia long rum bilong wokim ol ing. Em i wok tu long Dipatmen Bilong Raitim Tok inap 20 yia samting. Long ol laspela 17 yia bilong em i stap laip, em i wok long ofis bilong lukautim mani samting.

Lyman i man bilong strong long tokaut long Kingdom bilong God na i no pret. Long bipo long taim em i stap long Brooklyn, em na wanrum bilong em, Arthur Worsley, ol i save raun long wanpela bot bilong ol Witnes i go antap long het bilong wara Hudson. Long planti wiken ol i mekim wok long ol saun na maikrofon samting bilong kamapim ol tok bilong Kingdom long ol ples i stap arere long wara.

Mama i karim Brata Swingle long Novemba 6, 1910, long Lincoln, Nebraska, tasol i no longtaim bihain famili i go sindaun long biktaun Salt Lake, Utah. Long 1913, taim ol i stap long dispela hap, papamama bilong em i kamap ol Sumatin Bilong Baibel, long nau ol i kolim ol Witnes Bilong Jehova. Long planti yia, famili Swingle i bin singautim planti lain bilong nambawan ofis long Brooklyn i bin kam bilong mekim ol tok long i kam long haus bilong ol, na dispela i bin helpim Lyman. Long 1923, long taim em i gat 12 krismas, em i kisim baptais bilong makim dediket bilong em long God.

Lyman i mekim wok long Brooklyn olsem man singel inap 26 yia, na bihain em i maritim Crystal Zircher long Jun 8, 1956, na dispela i bin helpim em tru. Tupela i pas gut tru wantaim, na ol i save autim tok wantaim i kam inap long Crystal i dai long 1998. Tripela yia paslain long Crystal i dai em i bin kisim sik strok na dispela sik i bin mekim na em i no inap wokabaut. Ol samting Lyman i mekim bilong lukautim Crystal i makim em i stap olsem gutpela piksa long pasin bilong givim bel, na sampela i bin lukim em i mekim pasin sori na subim Crystal long wilsia long ol rot bilong wokabaut na bai em i tilim ol Wastaua na Kirap! long ol man i wokabaut i go i kam, dispela i bin kirapim ol tru.

Brata Swingle i gat gutpela pasin, na em i gat pasin pren na ol man i save long em ol i laikim em tru. Olsem papa na mama bilong em, em i gat tingting long stap wantaim Jisas Krais long Kingdom bilong God long heven, em samting Baibel i toktok long en, na mipela i bilip olsem nau em i kisim.​—⁠1 Tesalonaika 4:​15-18; KTH 14:⁠13.

[Futnot]

[Piksa long pes 31]

Brata Swingle i wok long rum bilong wokim ing inap 25 yia

[Piksa long pes 31]

Lyman na Crystal i pas gut tru wantaim