Ol i Winim Bikpela Kot

OL WITNES BILONG JEHOVA long Jemani i winim kot i bin kamap long nambawan bikpela kot (Federal Constitutional Court) long Karlsruhe. Dispela i mekim bikpela wok bilong kirapim gavman long orait long ol.

Inap planti yia tru, winim 100, ol Witnes Bilong Jehova i bin autim tok long Jemani. Ol i stap yet, maski tupela gavman dikteta long taim bilong yumi​—⁠gavman Natsi na gavman Komiunis​—⁠i bin mekim nogut tru long ol. Kirap long 1990 i kam inap nau, ol Witnes i bin mekim wok na bai gavman i ken orait long ol olsem wanpela koporesen bilong pablik-lo. Ol i winim tupela kot na lus long wanpela kot, na bihain ol i apil long Federal Constitutional Court. Long Disemba 19, 2000, ol jas i tokaut long tok em kot i pasim.

Olgeta Jas i Wanbel

Olgeta 7-pela jas bilong kot ol i tok ol Witnes i winim kot. Ol jas i senisim tok em narapela kot (Federal Administrative Court) i bin pasim long 1997, na ol i tokim dispela kot long tingim gen aplikesen ol Witnes i putim.

Long dispela taim, nambawan bikpela kot (Federal Constitutional Court) i tokaut long Gavman i mas i stap olsem wanem long ol lain bilong lotu. Kot i tok, taim Gavman i tingim namba em bai givim long wanpela lotu, em i no save skelim ‘ol bilip bilong en, nogat​—⁠em i skelim pasin bilong en.’

Na kot i tok taim ol Witnes i bihainim ‘lo Kristen na ol i no insait long wok politik,’ ol i ‘no pait long lo demokratik’ na ‘mekim na bai narapela kain gavman i ken senisim gavman demokratik,’ nogat. Olsem na kot i no ken tingim pasin bilong ol Witnes, olsem ol i no vot long taim bilong eleksen, na larim dispela i mekim na bai gavman i no ken orait long ol, nogat.​​—⁠Jon 18:36; Rom 13:⁠1.

Na kot i tok moa olsem ol bilipman​—⁠maski ol i Witnes o ol i bilong narapela lotu​—⁠ol inap lukim olsem sampela taim ol bilip bilong ol i pait wantaim lo bilong Gavman. Sapos bilipman i bihainim maus bilong bel na “bihainim ol bilip bilong lotu na putim i go pas long lo bilong gavman,” ating Gavman i ken tingim olsem dispela i insait long pasin bilong i stap fri long mekim lotu.​​—⁠Aposel 5:​29.

Tok kot i pasim i kamap long nius long namba wan pes. Ating olgeta nius long Jemani i stori long dispela kot. Olgeta bikpela stesin bilong televisen na redio ol i kamapim ol stori na ol inteviu bilong dispela samting. I no gat wanpela taim bipo long Jemani ol nius na redio samting i kamapim nem bilong Jehova long planti man olsem nau ol i bin mekim.

[Piksa Kredit Lain long pes 8]

AP Photo/Daniel Maurer