“Wanem Samting i Kamap Long Frans?”

“Stap fri, em gutpela samting tru.” Em tok bilong “La Marseillaise,” em singsing bilong litimapim kantri long Frans. Tru tumas, pasin bilong i stap fri em i bikpela samting long planti man. Tasol ol samting i wok long kamap long Frans long nau i mekim na yumi tingting planti long pasin bilong i stap fri. Olsem na long Fraide, Novemba 3, 2000, inap planti tausen Witnes Bilong Jehova i tilim 12 milion liklik nius, nem bilong en “Wanem Samting i Kamap Long Frans? Ol i Laik Lusim Pasin Bilong i Stap Fri?”

INAP sampela yia pinis, sampela man politik na ol lain i birua long ol liklik lotu ol i sutim tok long ol Witnes Bilong Jehova long Frans. Dispela i givim hevi long sampela Witnes, na long ol kongrigesen bilong ol, na long wok bilong ol Witnes long kantri olgeta. Tasol long Jun 23, 2000, nambawan kot (Conseil d’État) bilong Frans i pasim wanpela tok i strongim tingting bilong 31 narapela kot long 1,100 kot i kamap pinis. Nambawan kot i kamapim olsem pasin bilong mekim lotu bilong ol Witnes Bilong Jehova i stret tru wantaim lo bilong Frans, na ol Haus Kingdom bilong ol i no gat wok long tromoi takis, olsem ol narapela lotu i no save tromoi takis.

Tasol wanpela lain bilong gavman (French Ministry of Finance) i sakim tru dispela tok, na ol i no orait long ol Witnes Bilong Jehova i no ken tromoi takis, olsem lo i tokaut long ol lain lotu i no gat wok long tromoi takis. Dispela lain bilong gavman i tok, ol Witnes i mas givim 60 pesen takis long ol kontribiusen ol i kisim long ol Witnes na ol pren bilong ol i stap long 1,500 kongrigesen long Frans. Long nau kot i wok long skelim yet dispela samting.

Ol Witnes i tilim ol dispela liklik nius bambai ol i ken tokaut long dispela narakain pasin gavman i mekim, na ol i laik kamapim long ples klia ol hevi inap kamap long dispela pasin bilong singautim nating takis, na ol nupela lo gavman i laik kamapim bai pasim ol man long i stap fri long lotu.a

Wanpela Longpela De

Long 2 klok moningtaim, ol Witnes long sampela kongrigesen i kirap tilim ol liklik nius long ol ples bilong kisim tren na ol faktori, na bihain liklik long ol ples balus. Long 6 klok moningtaim, ol manmeri long Paris i kirap raun long taun. Inap 6,000 Witnes i sanap long ol ples em planti man i save raun long en na ol i tilim ol dispela nius long ol man i go long ples wok bilong ol. Wanpela yangpela meri i tok: “Samting yupela i mekim long pasin bilong i stap fri long ol samting bilong lotu, dispela em i gutpela samting. Dispela i no helpim ol Witnes Bilong Jehova tasol.” Long Marseilles, winim 350 Witnes i tilim ol nius long ol ples bilong kisim tren na long ol rot. Bihain long wanpela aua tasol redio i tokaut long dispela wok, na ol i tokim ol man long ol i no ken kirap nogut sapos wanpela Witnes Bilong Jehova i toktok long ol. Long Strasbourg, em taun lain Yuropian Kot ov Human Raits i stap long en, ol man i kam long ples bilong kisim tren samting ol i sanap long lain na wetim taim bilong ol long kisim liklik nius. Wanpela loya i tok, em i no bihainim ol bilip bilong ol Witnes, tasol em i wok long skelim ol samting i painim ol, long wanem, samting ol Witnes i tokaut long en i bikpela samting na i stret long mekim.

Long 8 klok moningtaim, maski i gat bikpela ren, inap 507 Witnes long taun Grenoble long hap bilong ol maunten Alp, ol i tilim ol liklik nius long ol rot na ol i putim ol i go insait long ol bokis bilong kisim pas. Sampela draiva bilong ka na ol liklik tren, ol i lukim olsem sampela samting i wok long kamap na ol i stopim ka samting na askim ol Witnes long givim wanpela nius long ol. Long Poitiers, long hap wes bilong Frans, ol man i raun long tren na i kamap long 9 klok moningtaim ol i kisim pinis liklik nius long hap ol i bin kalap long tren. Long Mulhouse, klostu long boda bilong Jemani, ol Witnes i tilim pinis 40,000 liklik nius.

Long 10 klok moningtaim, planti kongrigesen i tilim pinis planti liklik nius bilong ol, olsem 50 pesen. Ol Witnes i wok i go i go na klostu long belo ol i lukim olsem i no gat planti man i sakim nius, na ol inap toktok gut wantaim sampela man. Long Besançon, inap 80 kilomita longwe long boda bilong Swiselan, wanpela yangpela man i laik save long ol tok bilong Baibel na em i askim ol Witnes long as na God i larim pen na hevi i stap. Witnes i singautim em long kam long Haus Kingdom i stap klostu na ol i ken toktok moa long dispela samting, na long dispela taim yet Witnes i kirap stadi long Baibel wantaim dispela man long buklet God i Laik Yumi Mas Mekim Wanem?

Long belo long taim bilong ol long malolo planti Witnes i autim tok inap wanpela o 2-pela aua. Long apinun wok bilong tilim nius i go yet, na planti kongrigesen i pinisim wok bilong ol long 3 o 4 klok apinun. Long taun Reims, sampela manmeri em ol i bin stadi o bung wantaim ol Witnes Bilong Jehova long bipo, ol i kamapim laik bilong ol long bung gen wantaim kongrigesen. Long Bordeaux ol Witnes i kirapim 3-pela Baibel-stadi. Long dispela taun yet, wanpela Witnes i go long wanpela stua bilong baim nius na em i lukim planti liklik nius long tebol. Stuakipa, bipo em i wanpela Witnes, em i kisim dispela liklik nius na lukim olsem em i bikpela samting, olsem na em i mekim planti kopi long en bilong givim long ol man.

Long Le Havre, long hap bilong Normandy, wanpela meri Talatala i kirap nogut tru taim em i harim long redio olsem ol Witnes Bilong Jehova i mas givim takis long ol kontribiusen ol i kisim. Em i amamas long kisim liklik nius na em i tok i gutpela long ol Witnes i tokaut long dispela pasin i no stret. Long 7:20 long apinun, nius long televisen long Lyons i stori long wok bilong ol Witnes long tilim dispela nius, na ol i tok: “Long dispela moningtaim em i isi moa long abrusim ol liklik hap ren, tasol yu no inap abrusim ol liklik nius bilong ol Witnes Bilong Jehova.” Ol niusman i toktok wantaim tupela Witnes na ol i kamapim as na ol Witnes i mekim dispela wok.

Sampela Witnes i laik insait long dispela wok bihain long wok mani bilong ol na ol i tilim dispela nius long ol man i kam bek long wok na ol i putim ol nius long ol bokis bilong kisim pas samting. Long taun Brest na Limoges ol man i lusim haus piksa long 11 klok nait, ol i laspela manmeri i kisim liklik nius. Ol liklik nius i stap yet, ol Witnes i bungim ol na tilim long moningtaim bihain.

Ol Samting i Kamap Long En

Wanpela Witnes i tok: “Ol birua bilong yumi i ting ol i mekim ol samting bilong daunim yumi. Tasol em i no olsem, pasin bilong ol i mekim na yumi kamap strong moa.” Long planti kongrigesen, winim 75 pesen bilong ol Witnes i bin insait long tilim dispela nius long dispela de, na sampela i bin mekim dispela wok inap 10, o 12, o 14 aua. Long Hem, long hap not bilong Frans, bihain long mekim wok mani long nait, wanpela Witnes i tilim dispela nius kirap long 5 klok moningtaim i go inap long 3 klok apinun. Long wanpela taun i stap klostu, long Denain​—⁠long dispela taun kongrigesen i kamap long 1906​—⁠inap 75 Witnes i bin tilim dispela nius insait long 200 aua long Fraide. Sampela Witnes, maski ol i lapun pinis, o skin i no strong, na i gat ren na strongpela win, ol i strong tru long insait long dispela wok. Olsem: Long Le Mans, inap 2-pela aua 3-pela sista i winim pinis 80 krismas ol i putim ol liklik nius long ol bokis bilong kisim pas, na wanpela Witnes i sindaun long wilsia i tilim ol nius long ai bilong haus bilong kisim tren. Na bel bilong yumi i kirap tru taim yumi lukim planti Witnes, em bipo ol i bin lusim wok autim tok, nau ol i insait long dispela bikpela wok!

Tru tumas, long rot bilong dispela wok bilong tilim liklik nius planti man i kisim save. Ol man bilong kain kain sindaun i kisim dispela nius, planti bilong ol em ol Witnes i no save bungim long haus bilong ol. Planti man i ting dispela wok i helpim ol Witnes long daunim hevi bilong ol, na em i mekim ol narapela samting moa. Planti i ting dispela wok i helpim olgeta manmeri bilong Frans long holimpas pasin bilong i stap fri long bihainim maus bilong bel na lotu. Bilong kamapim klia dispela samting, planti manmeri i askim ol Witnes long kisim sampela nius moa bilong givim long ol pren, na wanwok, na famili bilong ol.

Tru tumas, ol Witnes Bilong Jehova long Frans ol i amamas long autim nem bilong Jehova na sambai long wok bilong Kingdom. (1 Pita 3:15) Ol i gat laik tru long ol i “ken sindaun gut na i stap bel isi, na [ol i] ken bihainim tru olgeta pasin God i laikim,” na ol i laik bai planti tausen moa ol i ken bung wantaim ol bilong litimapim nem bilong Papa bilong ol long heven, em Jehova.​​—⁠1 Timoti 2:⁠2.

[Futnot]