Diwai Pam i Lainim Yumi

‘EM I luk naispela tru.’ Wanpela dikseneri bilong Baibel i mekim dispela tok long diwai det. Long taim bilong ol man i bin raitim Baibel na long nau tu, ol diwai det i save bilasim ples daun bilong Nail long kantri Isip, na long hap bilong ol liklik raunwara long ples drai Negev ol dispela diwai i save haitim hatpela san na ples i kol.

Diwai det em i wanpela kain diwai pam, olsem limbum samting, na wankain olsem planti diwai pam, em i save sanap stret. Longpela bilong sampela i olsem 30 mita na ol i wok long karim kaikai i go inap 150 yia. Na diwai det i gutpela tru bilong lukim na i save karim planti kaikai. Long olgeta wan wan yia, diwai i save kamapim planti rop det. Ol wan wan rop inap karim 1,000 det. Wanpela saveman i stori long prut det olsem: ‘Det i nupela em i swit moa yet, winim tru det ol i bin mekim drai na salim long stua.’

Olsem na Baibel i tok sampela man i kain olsem diwai pam. Bilong God i ken amamas long wanpela man, orait kain olsem wanpela diwai pam i karim planti kaikai, man i mas bihainim pasin i stret na em i mas wok long kamapim ol gutpela wok. (Matyu 7:​17-​20) Long dispela as, ol i bin wokim ol piksa bilong diwai pam bilong bilasim tempel bilong Solomon na tempel Esekiel i bin lukim long driman. (1 King 6:​29, 32, 35; Esekiel 40:​14-​16, 20, 22) Olsem na bilong God i ken orait long pasin bilong yumi long lotuim em, yumi mas kamapim ol pasin i kain olsem bilong diwai det. Baibel i tok: “Ol stretpela manmeri bai i kamap gutpela tru olsem diwai [“pam,”NW ] i karim gutpela kaikai.”​​—⁠Song 92:⁠12.