Yu Ting Yu Inap Mekim Graun i Kamap Gutpela Ples?

Yu Ting Yu Inap Mekim Graun i Kamap Gutpela Ples?

“Wok politik i no inap stretim pasin na sindaun bilong ol lain man. Ol i no inap kamapim gen bilip bilong ol tumbuna long ol samting bilong stretpela pasin na marit. Maski ol i pasim ol gutpela tok, dispela i no inap kirapim ol man long bihainim gen ol stretpela lo bilong marit, o kirapim ol papa long tingim wok bilong ol long lukautim ol pikinini, o mekim ol man i kirap nogut o sem long sampela pasin em bipo ol i bin kirap nogut o sem long en . . . Maski ol i kamapim ol lo, ol dispela lo i no inap pinisim hevi bilong ol pasin nogut ol man i mekim.”

OLSEM WANEM? Yu wanbel long ol dispela tok bilong wanpela bikman bilong gavman bilong Amerika long bipo? Sapos olsem, orait yu ting i gat wanem gutpela rot bilong pinisim ol hevi bilong nau em ol dispela pasin i as bilong en, olsem mangal, no gat pasin sori insait long famili, pamuk, no gat save long narapela lain, na ol narapela pasin olsem? Sampela man i ting i no gat rot bilong stretim ol dispela hevi, olsem na ol i tingting tasol long i stap bilong ol yet. Na sampela i wetim wanpela man i kamap na em i gat save tru long go pas long ol man—⁠olsem wanpela bikman bilong lotu—⁠na em bai soim rot long ol.

Inap tu tausen yia i go pinis, ol man i laik mekim Jisas Krais i kamap king bilong ol, long wanem, ol i save God i bin salim em i kam na em bai inap tru long bosim ol. Tasol taim Jisas i save long tingting bilong ol, kwiktaim em i lusim ol na i go. (Jon 6:14, 15) Bihain em i tokim gavena bilong Rom: “Kingdom bilong mi em i no bilong dispela graun.” (Jon 18:36) Tasol long nau, i no planti man i save bihainim pasin Jisas i bin mekim—⁠sampela bikman bilong lotu i tok ol i bihainim Jisas, ol tu i no mekim olsem. Sampela bilong ol i bin traim long mekim graun i kamap gutpela ples, olsem na ol i wok long givim tingting long ol bikman bilong gavman, o ol yet i insait long wok politik. Yumi ken tingim ol samting i bin kamap namel long yia 1965 na 1975 samting.

Ol Lotu i Laik Stretim Graun

Long 1968 samting, sampela tisa bilong lotu long Latin-Amerika, ol i kirapim wok bilong helpim ol man i stap rabis na ol man i daunim ol. Bilong mekim olsem, ol i kamapim wanpela tok olsem ol man i mas kamap fri, na ol i tok, tru Krais i man bilong kisim bek ol man olsem Baibel i makim, na tu, em i man bilong kisim bek ol man long ol hevi bilong wok politik na mani. Long Amerika, sampela bikman bilong lotu ol i tingting planti long stretpela pasin i wok long pinis, olsem na ol i kamapim lain ol i kolim Moral Majority. Wok bilong ol em long putim ol man i go insait long wok politik em ol bai wokim sampela lo bilong helpim ol famili long sindaun gut wantaim. Long planti hap bilong ol Muslim, planti lain i bin traim long daunim ol pasin nogut long rot bilong kirapim ol man long bihainim gut ol tok bilong Koran.

Yu ting ol dispela wok i mekim na graun i kamap gutpela ples? Ol samting i kamap i soim olsem stretpela pasin i wok long pinis, na ol man i gat planti samting ol i wok long kisim planti samting moa yet, na ol rabisman i wok long kamap rabis moa yet. Dispela hevi i kamap tu long ol kantri i bin wok strong long helpim ol man long kamap fri.

Lain Moral Majority i no inap kamapim ol samting ol i tingting long kamapim long Amerika, olsem na long 1989, man i kamapim dispela lain, em Jerry Falwell, i pinisim dispela oganaisesen. Sampela oganaisesen i kirap mekim wok em lain Moral Majority i lusim. Tasol Paul Weyrich, em man i bin kamapim dispela tok “moral majority,” em i raitim tok long wanpela nius (Christianity Today), olsem: “Maski ol man mipela i makim ol i go insait long wok politik, dispela i no kamapim ol pasin mipela i ting i bikpela samting.” Em i tok moa: “Pasin bilong ol man i wok long i go nogut moa yet na bihain ol bai bagarap olgeta, na wok politik i no inap stretim dispela hevi.”

Man bilong raitim buk, Cal Thomas, i tokaut long samting em i ting em i wanpela bikpela popaia long wok ol i mekim bilong senisim pasin bilong ol lain man long rot bilong wok politik. Em i tok: “Senis tru i save kamap long bel bilong man yet na i no long rot bilong eleksen, long wanem, ol bikpela hevi tru bilong yumi i no ol samting bilong mani na wok politik, nogat; dispela bikpela hevi, em yumi bin lusim stretpela pasin na ol samting bilong spirit.”

Tasol nau ol man yet i save makim wanem pasin i stret na wanem pasin i no stret, olsem na yu ting yumi inap mekim wanem bilong stretim pasin bilong ol man na kirapim ol long tingim ol stretpela pasin na ol samting bilong spirit? Ol man i gat namba na ol man i gat gutpela tingting—⁠maski ol i man bilong lotu o nogat—⁠sapos ol i no inap mekim graun i kamap gutpela ples, orait husat inap mekim? Stori i kamap bihain long dispela bai soim yumi olsem i gat rot long mekim. Dispela rot em as na Jisas i bin tok, Kingdom bilong em i no bilong dispela graun.

[Ol Piksa Kredit Lain long pes 2]

[Ol Piksa Kredit Lain long pes 3]