Papamama—Givim Samting Pikinini Bilong Yupela i Mas Kisim!
IMAS i gat man bilong stretim ol pikinini long pasin sori na soim rot long ol, na i gutpela moa long ol papamama i mas mekim olsem. Tania Zagury, em wanpela tisa long Brasil, em i tok long dispela samting olsem: “Olgeta pikinini i laik painim amamas. Em i bikpela samting long putim sampela tambu long ol. Ol papamama i mas mekim dispela samting. Sapos ol i no mekim, ol pikinini bai kamap wel olgeta na i no harim tok.”
Tasol long planti kantri ol man i orait long kain kain pasin nogut na ol i ting em i bikpela samting long man i ken bihainim laik bilong em yet, olsem na i hatwok long bihainim dispela gutpela tok i stap antap. Ol papamama i ken go long husat bilong kisim helpim? Ol papamama i daun long God ol i save olsem ‘ol pikinini i olsem presen’ i kam long Jehova. (Song 127:3) Olsem na ol i skelim Tok Bilong God, em Baibel, bilong em i ken stiaim ol long mekim bikpela long ol pikinini. Sindaun 13:24 i tok: “Sapos papa i no givim kanda long pikinini bilong en long taim pikinini i mekim rong, i olsem em i no laikim pikinini. Tasol sapos papa i laikim pikinini, orait em i save strong long stretim em.”
Dispela tok “kanda” em Baibel i kolim i no makim tasol pasin bilong paitim pikinini bilong stretim em, nogat; em i makim pasin bilong stretim pikinini, maski man i mekim dispela long wanem kain rot. Planti taim ol tok tasol bilong stretim pikinini inap helpim em long lusim pasin nogut bilong em. Sindaun 29:17 i tok: “Sapos yu stretim pikinini man bilong yu, bai em i mekim gutpela pasin na bai yu gat bel isi na yu amamas.”
Papamama i mas stretim ol pikinini long pasin sori bilong helpim ol long lusim ol pasin nogut. Taim papa o mama i strong long stretim pikinini long gutpela pasin sori, dispela i soim olsem em i tingim tru pikinini. (Sindaun 22:6) Olsem na yupela ol papamama, yupela i no ken les! Taim yu bihainim ol gutpela tok bilong Baibel em inap helpim yu, God Jehova bai amamas long yu na ol pikinini bilong yu bai rispek long yu.