Askim

Olsem wanem wanpela meri Kristen i ken stap gut long God na stap daun long man bilong em i no bilip, sapos man i save insait long ol samting bilong ol bikpela de bilong lotu?

Bilong mekim olsem, meri i mas bihainim gutpela tingting na mekim gutpela pasin. Tasol em i mekim pasin i stret taim em i wok strong long stap gut long God na em i stap daun long man bilong em tu. Jisas i bin toktok long samting i wankain olsem dispela, em i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Matyu 22:21) Tru, em i bin toktok long ol samting yumi mas givim long ol gavman, em bihain Baibel i bin tokim ol Kristen ol i mas i stap daun long en. (Rom 13:⁠1) Tasol tok bilong Jisas i stret tu long pasin meri i mas mekim bilong i stap daun long God na i stap daun long man bilong em olsem Baibel i makim, maski man i bilip o nogat.

Olgeta man i save long Baibel ol i wanbel long tok bilong en olsem, long olgeta taim ol i mas i stap gut long God i Gat Olgeta Strong. (Aposel 5:29) Tasol long planti samting ol man i lotu tru long God ol inap bihainim sampela tok o laik bilong wanpela man i no bilip na i gat namba, na ol i no sakim ol gutpela lo bilong God.

Pasin bilong tripela Hibru, em Daniel sapta 3 i stori long ol, em inap skulim yumi long planti samting. Hetman bilong gavman, em Nebukatnesar, i putim lo olsem ol yet na ol narapela i mas kam bung long ples stret bilong Dura. Taim tripela Hibru i kisim save olsem ol man bai lotuim wanpela imis long dispela hap, ol i no laik go. Ating Daniel i gat rot long abrusim dispela bung, tasol tripela Hibru nogat.a Olsem na ol i bihainim tok na ol i go long dispela bung, tasol ol i no mekim wanpela samting i no stret, nogat tru.​—⁠Daniel 3:​1-18.

Olsem tasol, long taim bilong ol bikpela de ating wanpela man i no bilip em bai askim o tokim strong meri Kristen bilong em long mekim sampela samting meri i no laik mekim. Tingim samting olsem: Man i tokim meri long kukim wanpela kain kaikai long wanpela de em man wantaim ol narapela bai mekim pati bilong wanpela bikpela de. O em i tok strong olsem famili (na meri tu) bai go lukim ol wanblut bilong em long dispela de bilong kaikai wantaim ol o bilong lukim ol tasol. O paslain long dispela bikpela de em i tokim meri long baim sampela samting bilong em, olsem ol kaikai ol man i save kisim long dispela bikpela de, o samting em i laik givim olsem presen, o ol pepa samting bilong karamapim ol presen.

Tru, meri Kristen i mas tingting strong olsem em i no ken insait long sampela pasin bilong lotu giaman. Tasol olsem wanem long ol dispela samting man i laik em i mas mekim? Man em i het bilong famili, na Baibel i tok: “Yupela meri, yupela i mas i stap aninit long ol man bilong yupela. Dispela pasin i stret long ai bilong Bikpela.” (Kolosi 3:18) Olsem wanem? Taim samting olsem i kamap, meri inap i stap aninit long man bilong em na stap gut long God tu? Em i mas skelim gut olsem wanem em i ken bihainim tok bilong man bilong em na i no sakim tok bilong Jehova.

Ating sampela taim man bilong em bai askim em long kukim wanpela kain kaikai, long wanem, em i laikim tru dispela kaikai o em i save kisim dispela kaikai long taim bilong ol bikpela de. Meri i laik kamapim olsem em i laikim tru man bilong em na em i stap aninit long em. Tasol olsem wanem? Em inap wokim dispela kain kaikai, maski man i askim em long mekim long wanpela bikpela de? Sampela meri Kristen inap mekim olsem, na bel bilong ol i no kotim ol. Ol i ting dispela i wankain olsem ol i redim kaikai bilong ol wan wan de tasol. Tru, wanpela Kristen i stap gut long God em i no tingim dispela kaikai olsem em i bilong wanpela bikpela de, maski man bilong em i ting olsem. Olsem tasol man inap tokim meri long i go wantaim em long lukim ol wanblut bilong em long sampela taim long olgeta mun o yia. Olsem wanem? Meri inap mekim olsem long wanpela bikpela de? O em i save orait long baim ol samting olsem man i tok, na em i no skelim skelim wanem samting man bilong em i laik mekim long dispela samting?

Meri Kristen i mas tingim ol narapela​—⁠olsem pasin bilong em i mekim wanem long ol. (Filipai 2:⁠4) Em i laik abrusim olgeta samting em inap kirapim ol narapela long ting olsem em i insait long ol samting bilong ol bikpela de, ating wankain olsem tripela Hibru i no laik ol narapela i lukim ol i go long ples stret bilong Dura. Olsem na long gutpela pasin meri i ken toktok wantaim man bambai em yet i ken mekim sampela samting bilong ol bikpela de. Long dispela rot man bai tingim gut meri bilong em i save laikim tru em na daun long em. Ating man inap luksave olsem em i bihainim gutpela tingting sapos em i no mekim wanpela samting em inap semim tupela taim meri i tokaut olsem em i no inap insait long sampela samting bilong lotu giaman. Tru tumas, sapos pastaim tupela i toktok gut wantaim, ating long pasin isi ol i ken stretim ol samting.​—⁠Sindaun 22:⁠3.

Bikpela samting i olsem: Ol Kristen i stap gut long God ol i mas skelim gut ol samting na bihain ol i ken makim wanem samting ol bai mekim. Pasin bilong bihainim tok bilong God i mas i stap nambawan, wankain olsem tripela Hibru i bin bihainim dispela pasin. (1 Korin 10:31) Yumi ken tingim dispela samting: Taim wanpela man i gat namba insait long famili o long ples i askim Kristen long mekim wanpela samting, orait olgeta wan wan Kristen i mas makim ol samting ol i ken mekim na ol i no kalapim lo bilong God.

[Futnot]