Yupela Man Marit, Mekim Pasin Sori Tru
“Yupela man, yupela i mas sori long ol meri bilong yupela, olsem Krais i sori long [kongrigesen] na i lusim laip bilong em yet bilong helpim [kongrigesen].”—EFESAS 5:25.
1. Wok bos bilong man marit, olsem wanem dispela wok i hatwok, tasol i gutpela wok tu?
WANPELA man bilong Nowe, nem bilong em Ibsen, em i tok: “Marit! Em i givim bikpela hatwok long man, winim olgeta narapela samting!” Baibel i tok, man em i het bilong famili, olsem na tru, man i gat bikpela wok. Tasol sapos yu wanpela Kristen na yu mekim gut wok bos bilong yu insait long famili, dispela samting inap helpim gut famili. Bai famili i pas gut wantaim long pasin sori, na bai narapela i harim tok bilong narapela, na bai bel bilong yu i stap isi. Tasol God i givim bikpela wok long yu—yu kisim planti samting, olsem na yu mas bekim planti samting.—Luk 12:48.
2. Em wok bilong man tasol long kamapim amamas insait long famili?
2 Olsem wanem? Yu man, yu wanpela tasol i gat wok long kamapim amamas insait long famili? Nogat. Meri bilong yu tu i gat wok long dispela samting. Yutupela i mas wok wantaim long helpim famili i stap amamas. (Provep 14:1) Ol tok nau i kamap, planti em i bilong ol man marit, tasol i no olsem ol meri i gutpela olgeta na i no gat sampela tok bilong helpim ol. Nogat. Tasol ol dispela tok em i bilong helpim ol man marit bambai ol i ken bihainim ol lo Kristen na bosim gut famili. Ol i mas mekim wok bos bilong ol olsem wanem? Maski yu marit o yu stap singel yet, tasol olgeta man i mas save long dispela samting.
Mekim Pasin Sori Olsem Krais i Mekim long Kongrigesen
3. Efesas 5:25 i stori olsem wanem long wok bos bilong man? Olsem na man marit i mas mekim wanem?
3 Aposel Poi i raitim tok, olsem: “Yupela man, yupela i mas sori long ol meri bilong yupela, olsem Krais i Sori long [kongrigesen] na i lusim laip bilong em yet bilong helpim [kongrigesen]. ”(Efesas 5:25) I stret wantaim Baibel long man i mas stretim tok long ol samting famili bai mekim, olsem na yu mas was gut. Nogut yu tingim laik bilong yu yet tasol. Taim yu tingim ol samting famili bai mekim, ating planti taim yu tingim laik bilong yu yet. Tasol taim i no gat sampela tok bilong Baibel yu mas bihainim, yu save bihainim laik bilong yu yet? Baibel i tok, ol man marit i mas mekim pasin sori olsem Krais i mekim. Krais i no tingim skin bilong em yet. Em i lusim laip bilong em bilong helpim ol disaipel bilong em. Baibel i tok: Krais “i no bin bihainim laik bilong em yet.” (Rom 15:3) Man i no tingim skin bilong em yet, dispela man em i redi long lusim sampela samting em yet i laik mekim bambai em i ken helpim narapela man; maski dispela samting i givim hatwok long em, em i redi long mekim bilong helpim narapela man.
4. Jisas i mekim wanem na em i kamapim bel bilong em, em i tingim tru ol disaipel bilong em?
4 Nambawan bikpela tingting bilong Jisas em olsem: Em i laik helpim ol disaipel long ol samting bilong spirit. Em i strong long bihainim stretpela pasin, tasol taim ol disaipel i kamapim tingting kranki, o ol i mekim pasin antap, o ol i no tingting gut pastaim, o ol i pret, em i no mekim hatpela pasin long ol, em i sori long ol. (Matyu 18:1-3; Luk 22:24-26, 47-51, 59-62) Long rot bilong ‘tok bilong God’ na gutpela pasin Jisas i mekim, em i helpim ol disaipel long stretim ol pasin na tingting kranki bilong ol bambai lain bilong ol i ken “i stap holi na i no gat asua.”—Efesas 5:26, 27.
5, 6. Jisas i mekim pasin sori tru, em i no tingim skin bilong em yet, orait, olsem wanem man marit i ken bihainim dispela pasin bilong Jisas? Wanem taim i hatwok liklik long mekim?
5 Yu save mekim dispela kain pasin bilong sori? Yu sori tru long meri bilong yu na yu no tingim skin bilong yu yet? Sampela man i ting, sapos ol i givim ol samting bilong skin long meri bilong ol, ol i no tingim skin bilong ol yet, ol i sori tru long meri bilong ol. Tru, man i hatwok long mekim dispela samting, na meri i mas pilim tru ol wok man bilong em i mekim bilong lukautim em long ol samting bilong skin. Tasol Jisas i wok strong tru long lukautim ol disaipel long ol samting bilong spirit na ol samting bilong helpim ol i stap belgut na amamas. Long san man i karim kain kain hevi na mekim wok bilong lukautim famili long ol samting bilong skin, olsem na planti man, taim ol i kam bek long haus ol i laik sindaun nating. Ol i laik bai skin na tingting tu i malolo; ol i no laik wokim tingting. Dispela kain samting i kamap insait long planti famili ol i no save bihainim tok bilong Baibel. Tasol sori tru, em i kamap insait long sampela famili Kristen tu. Wanpela meri Kristen i tok: “Man bilong mi i no bin givim sampela tok long mi bilong stiaim tingting bilong mi. Sampela taim mi kamapim olgeta tingting bilong mi long wanpela samting na mi laik tru bai em i givim sampela tingting long mi. Tasol nogat. Em i tingim narapela samting.”
6 Tasol sapos yu sori tru long meri bilong yu na yu no tingim skin bilong yu yet, taim meri i tingting planti long wanpela samting, bai yu no sakim em. Bai yu harim ol tok em i mekim na toktok gut wantaim em long pasin isi na givim sampela tingting long em. Bai yu tingting tru long helpim em long i stap strong long spirit, long helpim em long stadi na lainim tok bilong Baibel, na autim tok wantaim yu. Yu no ken larim em i hatwok long tingim ol samting bilong famili i wok bilong yu long stretim tok long en. Yu mas helpim em bambai em i gat taim bilong malolo liklik. (Mak 6:31) Sapos yu tingting gut na mekim kain pasin olsem, bai meri bilong yu i stap amamas na bel isi.
Daunim Yu Yet
7. Bilong mekim gutpela wok bos, man i mas i gat wanem pasin?
7 Sampela man i hatwok long mekim wok bos bilong ol insait long famili. Sapos meri i mekim sampela tok o i gat narapela tingting na em i skelim tok bilong man, man i kros na i pilim olsem meri i laik i stap bos. Tasol ol man marit long lain Kristen ol i mas bihainim pasin bilong Jisas. Jisas i tok: “Mi save mekim pasin isi long ol man, na mi save daunim mi yet.” (Matyu 11:29) Jisas i no bihainim pasin daun long skin tasol na lusim dispela pasin taim wanpela man i gat narapela tingting. Nogat. Dispela pasin i stap long bel bilong Jisas.
8, 9. (a) Sera i kros long wanem samting na em i tok em asua bilong Ebraham? (b) Bilong wanem Ebraham i no daunim Sera o bekim tok kros long em?
8 Ebraham tu i makim gutpela pasin daun ol man marit i ken bihainim. Wokmeri bilong Sera i bikhet long Sera na Ebraham i no lukim o em i no kirap kwik na stretim dispela samting. Olsem na Sera i tok: “Hega i bikhet long mi. Em i asua bilong yu tasol. Tru mi yet mi givim wokmeri bilong mi long yu. Tasol nau em i save em i gat bel na em i bikhet long mi. Yawe i ken skelim yumitupela.”—Jenesis 16:5.
9 Ating dispela tok i sutim tru bel bilong Ebraham! Long wanem Ebraham i laikim tru Sera na em i no laik bai samting nogut i kamap long em. Tru, ating Ebraham i gat hap asua long dispela samting, tasol Sera i kirap na kros kwik, na em i tok God i mas skelim tupela. Olsem wanem? Ebraham i bekim tok kros, long nem em i bos bilong famili? Em i ting Sera i bikhet? Em i save Sera i lusim gutpela sindaun long Ur na inap 10-pela yia i raun raun wantaim Ebraham na sindaun long ol haus sel, long wanem Ebraham i bihainim tok bilong Jehova. Sera i daun long Ebraham na bihainim em i go! Sera i save daun long Ebraham na sambai long em, Sera i no tingim skin bilong em yet. Dispela samting i mekim na Ebraham i laikim tru Sera. (1 Pita 3:5, 6) Olsem na em i bekim tok isi long Sera na em i tok: “Harim. Hega em i wokmeri bilong yu tasol. Yu bos bilong em. Mekim samting long en long laik bilong yu.” (Jenesis 16:6 Ebraham i gat pasin daun; em i daunim em yet. Em i wanpela man tru!
10. (a) Olsem wanem man marit i ken bihainim pasin bilong Ebraham? (b) Dispela wok yu mekim bai kamap gutpela long olgeta taim o nogat?
10 Taim wanpela hevi i kamap na meri bilong yu i tok em asua bilong yu, wok long bihainim pasin bilong Ebraham. Bekim tok isi long em. Em hatwok. Sampela taim bai yu popaia. Tasol mekim traim. Harim gut ol tok meri bilong yu i mekim na wok long pilim as bilong tingting bilong em na skelim gut ol tok em i mekim. Taim meri i belhat, ating em i no tingting gut pastaim na em i mekim tok. Ating em i kros kwik olsem Sera i bin mekim. Orait, yu no ken kros. Yutupela i mas wok wantaim long stretim dispela hevi.
11. Bilong wanem man i no ken tingim meri bilong em i olsem ‘man i no gat nem’?
11 Tru, man inap putim sampela lo bilong bosim famili. (Rom 7:2) Tasol meri bilong yu em i no wanpela pikinini o olsem ‘man i no gat nem.’ Jehova i tok: “Mi mas mekim kamap wanpela poroman i stap bilong helpim [man].” (Jenesis 2:18) Meri em i poroman bilong man. Iv i gat save na tingting wankain olsem Adam. Em inap tru long helpim Adam long mekim ol wok God i bin givim long em.
12. (a) Taim wanpela man marit i kirap bihainim pasin daun, wanem gutpela samting i kamap? (b) Olsem wanem pasin daun inap helpim tupela marit long i stap amamas?
12 Provep 31 i stori long ol wok gutpela meri marit i save mekim. Man bilong dispela kain meri em i save bilip long meri bilong em. Dispela meri i baim graun; em i mekim wok bisnis long han bilong em yet na “baim ol yangpela diwai wain bilong planim.” Em i mekim bikpela wok! Na olsem wanem long man bilong em? Em i pilim olsem meri i laik antap long em na i stap bos? Nogat. Man bilong em i litimapim nem bilong em! (Provep 31:10, 11, 16, 28) Kain tingting olsem inap helpim yu na bai yu no ken tok pait nating wantaim meri bilong yu. Wanpela man na meri bilong em, oltaim tupela i save tok pait. Man i strong tumas long i stap bos. Em i mekim pasin antap. Bihain em i pilim dispela samting, olsem na em i beten na skelim gut pasin em i mekim na em i daunim em yet. Nau em i kirap harim tok bilong meri bilong em. Taim meri i mekim sampela tok, em i skelim gut. Bihain em i larim meri bilong em i bosim sampela wok ol i mekim long mani bilong ol. Na nau man i tok: “Meri i mekim gutpela wok!” Na meri bilong em i tok: “Mi amamas, long wanem nau mi pilim olsem man bilong mi i bilip long mi.” Olsem na Provep 13:10 i toksave, olsem: “Bikhetpasin i save kamapim kros na pait. Tasol sapos man i larim ol arapela man i givim tingting long em, orait dispela man i gat gutpela tingting na save.” Man i gat pasin daun, em i save i gat sampela wok em i no inap mekim gut, na em i amamas long ol wok meri bilong em i gat save long mekim. Em i save daunim em yet.—Provep 11:2.
Meri “Em i No Strong Tumas,” Olsem na Yu Mas Mekim Gut long Em
13. (a) Man marit i mas mekim wanem olsem 1 Pita 3:7 i tok? (b) Meri i gat wanem laik tru?
13 Aposel Pita i raitim tok, olsem: “Yupela ol maritman, yupela i mas kisim gutpela save na stap stret wantaim meri bilong yupela. Bodi bilong meri em i no strong tumas, olsem na yupela i mas mekim gut long ol.” (1 Pita 3:7) Yu mas save long bel bilong meri bilong yu; bel bilong meri tu i no strong tumas. Meri i mas pilim olsem man bilong em i tingim em na laikim tru em. Sapos i no gat dispela samting—maski meri i gat planti samting bilong skin—bai em i no inap i stap belgut. Meri i laik tru bai man bilong em i gat wankain tingting olsem wanpela man marit i stap longtaim bipo, em i tok long meri bilong em, olsem: “I gat planti meri i gat gutpela pasin tru, tasol yu winim ol moa yet.”—Provep 31:28, 29.
14. Wanem samting i save mekim meri i stap belgut?
14 Tasol ating sampela man i ting olsem: ‘Mi maritim meri bilong mi, olsem na em i save mi laikim em.’ Tasol ol meri i laik bai man i mas tokim ol, ‘Mi laikim yu.’ Dispela samting i save mekim ol i stap belgut na amamas. Bilipman Aisak i save long dispela samting. Olsem na maski em i marit 35 yia pinis, tasol em i save go klostu long meri bilong em na holim em. Jenesis 26:8) Yu tu yu mas mekim olsem. Yu mas holim meri bilong yu na tokim em yu laikim em, olsem bai meri i ken save yu tingim em, na bai em i save yu givim bel tru long em na yu ting ‘em i winim ol narapela meri.’
15. Ol man marit i mas was gut long wanem samting na bai ol i tingim gut meri bilong ol? Olsem wanem na dispela samting i bikpela samting?
15 Yu mas lusim bikpela hap taim na tingting bambai yu inap mekim olsem. Sampela man i les long mekim hatwok olsem na amamasim meri bilong ol. Ol i amamas long tok gris wantaim narapela meri. Dispela pasin i kamap long Isrel long taim bilong Malakai. Ol dispela man i tingim skin bilong ol yet na ol i mekim nogut long meri bilong ol, na Jehova i tokim ol: “Yupela i mas was gut long tingting bilong yupela.” (Malakai 2:13-16, NW) Yes, ol i mas was gut long tingting bilong ol. Na yumi tu, sapos yumi wok wantaim ol meri o yumi stap klostu long ol yumi mas was gut. Yu mas bosim gut skin na tingting bilong yu. Nogut yu lusim tingting long meri bilong yu o yu les long em na yu tingim skin bilong yu yet na kirap laikim narapela meri.—Matyu 5:27-30.
Ol Samting Yu Mas Givim long Meri Bilong Yu
16. Planti taim hevi i kamap long wanem samting insait long marit? Baibel i tok wanem long 1 Korin 7:3, 4 na yumi save, man o meri marit em i no ken tingim skin bilong em yet tasol?
16 Taim yu go klostu long meri bilong yu, long dispela taim yu no ken tingim skin bilong yu yet. Baibel i tok: “Bodi bilong man i bilong meri bilong en, na man i no ken pasim. Olsem tasol, bodi bilong meri i bilong man bilong en, na meri tu i no ken pasim. Meri i no bos bilong bodi bilong em yet. Nogat. Man bilong em i bos. Na olsem tasol, man i no bos bilong bodi bilong em yet. Nogat. Meri bilong em i bos” (1 Korin 7:3, 4) Planti hevi i save kamap long dispela samting. Ol man bilong skelim dispela samting i tok, planti marit i gat hevi long dispela samting.
17. (a) Man i no ken givim bodi tasol long meri bilong em, em i mas mekim wanem samting moa? (b) Wanpela man bilong skelim dispela samting em i tok wanem long laik bilong meri?
17 Planti man marit i ting laik bilong meri i wankain olsem laik bilong ol na ol i gat wok long givim bodi tasol long meri. Pol i stori long narapela samting yumi gat wok long givim long ol man, em narapela samting olgeta, tasol em inap helpim yumi long dispela samting bilong marit. Pol i tok, yumi gat wok long givim samting long ol gavman. (Rom 13:7) I gat kain kain samting yumi mas givim. Long sampela yumi mas givim takis, long sampela yumi mas givim kastam mani, long sampela yumi mas givim ona, olsem litimapim nem bilong ol. Na i wankain long taim man i go klostu long meri bilong em. I gat kain kain samting em i mas mekim; em i no ken ting long givim bodi tasol. Em i mas tingim laik bilong meri bilong em na mekim ol samting em i mas mekim bambai meri i ken amamas long slip wantaim em. Wanpela man i skelim dispela samting (William M. Kephart long buk The Family, Society, and the Individual, em i tok: ‘Meri i mas pilim olsem man bilong em i laikim em na tingim em. Em bikpela samting. Olsem na taim tupela i slip wantaim, meri i laik bai man i holim skin bi1ong em na givim kis long em samting. Skin bilong meri i no save kirap kwik olsem bilong man. Olsem na man i mas mekim ol dispela samting bambai meri i ken pilim sori bilong em na bai meri i amamas long slip wantaim em.’
18. Wanem samting inap kirapim man o meri long tingim skin bilong em yet tasol?
18 Yu mas tingim dispela laik bilong meri bilong yu. Yu no ken tingim skin bilong yu yet na tingting long amamasim skin bilong yu yet. Sapos yu save lukim ol buk o piksa wokabaut samting i save kamapim samting bilong maritpasin, em nogut. Dispela kain samting inap mekim bel bilong yu ‘i kirap long samting nogut, na bai yu tingim skin bilong yu yet tasol. Na samting i gutpela tru bai yu mekim i kamap samting nogut. Yu mas klia olgeta long ol kain buk na piksa wokabaut olsem! (Kolosi 3:5) Long pasin isi, yu mas mekim ol pasin bilong sori long meri bilong yu, na givim olgeta samting i stret yu mas givim long em.—1 Korin 10:24
Sapos Yu No Tingim Skin Bilong Yu Yet Poroman Bai Givim Bel long Yu
19. Sapos man i mekim gutpela pasin na em i no tingim skin bilong em yet tasol, meri Kristen i no ken mekim wanem?
19 Em, yumi tok man i no ken tingim skin bilong em yet, tasol nogut meri i tingim dispela samting na oltaim em i strong long man bilong em i mas bihainim laik bilong em. Ol meri i no ken mekim olsem! Gutpela pasin sori bilong man bilong ol i mas kirapim ol meri Kristen long mekim pasin olsem kongrigesen i mekim taim ol i tingim sori bilong Krais. Pol i tok: “Sori bilong Krais tasol i save kirapim mipela . . . [em] i dai pinis, orait em i mekim olsem bilong yumi man i stap laip yumi no ken tingting moa long yumi yet na wokabaut.” (2 Korin 5:14, 15) Olsem tasol gutpela pasin sori yu mekim i mas kirapim meri bilong yu na em i no ken tingim laik bilong em yet tasol. Wanpela meri Kristen i amamas na em i tok: ‘Maski skin bilong mi yet i bagarap, tasol mi redi long helpim man bilong mi bambai mitupela inap mekim yet wanpela wok bilong God i hatwok long mekim, long wanem mi save man bilong mi i laikim mi tru na em i save tingim mi.’
20. (a) Sapos yumi tingim tok bilong Jenesis 3:16, olsem wanem dispela inap helpim yumi long save man na meri marit i mas tingting gut? (b) Bilong wanem ol meri i no ken kirap kwik na kamapim ol popaia bilong man bilong ol?
20 Tru tumas, yupela ol meri marit, yupela tu i no ken tingim skin bilong yupela yet. Man i mas bosim meri bilong em, tasol em i mas tingting gut, nogut em i tingim tumas skin bilong em yet na em i mekim hatpela pasin long meri bilong em. Na meri i laikim man bilong em, tasol nogut em i laik tumas long man i mas tingim em oltaim na i stap wantaim em oltaim. (Jenesis 3:16) I hatwok, tasol yu mas tingting gut. Man bilong yu i gat planti wok, ol wok bilong kongrigesen tu. Olsem na ating sampela taim bai em i no inapim olgeta laik bilong bel bilong yu. Man bilong raitim sam em i beten long God na em i tok: “Sapos yu kaunim olgeta sin bilong mipela bai husat inap long winim kot bilong yu?” Bai yumi olgeta i lus long kot! (Sam 130:3) Man bilong yu bai kot long ai bilong Jehova na yu tu. Tasol sapos nau yu marimari long man bilong yu, na yu pilim ol gutpela pasin em i mekim na tok tenkyu long em, bai em i givim bel tru long yu.
God Bai Helpim Yu
21. God i save helpim yumi olsem wanem? Stori long dispela.
21 Ating yu pilim olsem ol dispela wok em hatwok tumas. Tasol God bai helpim yu. “Papa i ken pulapim Holi Spirit bilong em long bel bilong yupela, na mekim yupela i strong tru.” Na dispela strong i wok long bel bilong yu em inap helpim yu long karim olgeta hevi na mekim ol wok bilong yu. Long wanem dispela strong bilong Jehova “em inap long winim olgeta prea na tingting bilong yumi, na i mekim bikpela wok moa.” (Efesas 3:16, 20) Hevi i kamap namel long man na meri Kristen, em tupela i marit, na tupela i bruk. Bihain tupela i bung wantaim na tupela i laik toktok wantaim na stretim dispela hevi. Tasol nogat. Tupela i kirap kros gen na narapela i bikmaus long narapela. Nau man i tok, gutpela sapos tupela i beten wantaim. Mekim pinis na bel bilong tupela i stap isi. Man i tok: “Dispela samting em i as tru bilong hevi i kamap insait long marit bilong mitupela. Oltaim mipela wok long stretim hevi bilong mipela long tingting bilong mipela yet. Mipela no tingim Jehova. Olsem na mipela i no inap stretim ol dispela hevi.” Bihain, taim tupela i stap wantaim gen winim 5-pela yia pinis, meri i tok: “Nau marit bilong mipela i wok gut. Mipela wok strong moa long bihainim ol tok i tru bilong Baibel, na amamas bilong mipela i wok long kamap moa yet. Nau mipela save tingim Jehova long olgeta samting long marit bilong mipela na askim em long helpim mipela. Mipela save amamas tru long wok wantaim long autim tok.”
22, 23. (a) Man na meri Kristen i marit, tupela i mas tingim wanem samting i nambawan bikpela samting? (b) Planti meri marit i mekim wanem gutpela pasin?
22 Bikpela samting long marit bilong Kristen em olsem: Em i mas tingim God, em i mas tingting long i stap gut wantaim God, em i no ken tingting tasol long amamasim poroman bilong em. Pol i raitim tok, olsem: “Ol man i gat meri ol i mas i stap olsem ol i no gat meri.” (1 Korin 7:29) Tasol Pol i no tok, ol man marit i no ken tingim meri bilong ol. Nogat. I stret man marit i mas tingim meri bilong em na em i mas laik long mekim “pasin meri bilong en i laikim.” (1 Korin 7:33) Tasol taim man i kamap strong long spirit na em i bihainim ol pasin bilong gutpela man marit, ating bai em i kisim sampela wok insait long kongrigesen. Hap taim bipo em i givim long meri bilong em, nau em i mas givim bilong mekim ol dispela wok bilong kongrigesen, tasol em i mas skelim gut ol wok bilong em long famili na long kongrigesen. Tasol meri i mas save, sampela taim man i no inap givim tingting olgeta long em.
23 Planti bilong yupela ol meri marit long lain Kristen, yupela i bin mekim gutpela pasin! Yupela i save wetim man bilong yu i mekim sampela wok bilong kongrigesen na yu no les kwik. Yu no tingim laik bilong yu yet. Yu mekim gutpela wok bilong helpim man bilong yu, na man bilong yu na Jehova tu i pilim dispela gutpela wok yu mekim. Yu “givim biknem” long man bilong yu olsem Baibel i tok, na God i “belgut long yu”!—Provep 12:4;18:22.
24. Man marit i mas wok strong long mekim wanem? Na meri marit i mas wok strong long mekim wanem?
24 Olsem na yupela ol man marit: Yu mas wok yet long mekim gutpela pasin sori na no ken tingim skin bilong yu yet. Na yupela ol meri marit: Yu mas pilim gutpela pasin man bilong yu i mekim na sambai long em na no ken tingim laik bilong yu yet. Long marit bilong yu, yu mas tingting long i stap gut wantaim God, em nambawan bikpela samting. Na bai God i blesim ol wok yu mekim!
Yu Tingim?
□ Man i mas mekim wanem na bai em i ‘sori long meri bilong em olsem Krais i sori long kongrigesen’?
□ Olsem wanem man marit inap bihainim gutpela pasin daun bilong Ebraham?
□ Man i mas mekim wanem na bai em i tingim gut meri bilong em, meri i no strong tumas?
□ Sapos man i mekim gutpela pasin sori olsem, na em i no tingim skin bilong em yet, meri bilong em i mas mekim wanem?
[Ol Piksa long pes 19]
MAN MARIT I MAS I GO PAS
Long autim tok
Long kisim malolo
Long stretim tok long ol samting bilong famili