Ol i Gat Savepasin Bilong Ol Yet

WANPELA savetok bilong Naijiria i tok, “Ol bikpela manmeri i gat savepasin, tasol ol pikinini i gat savepasin bilong ol yet.” Edwin, wanpela elda Kristen long Naijiria, em i kisim save olsem dispela tok em i tru.

Wanpela taim Edwin i painim wanpela bokis ain aninit long tebol long haus.

Edwin i askim tripela pikinini bilong em: “Em bokis bilong husat?”

Emmanuel i gat 8-pela krismas i tok: “Em bilong mi.” Kwiktaim em i tok moa olsem dispela 12 sentimita bokis ain i ros pinis na i gat liklik hul antap long en, em bilong ol kontribiusen bilong helpim wok bilong ol Witnes Bilong Jehova long olgeta hap. Em i tok: “Mi no save go long Haus Kingdom long olgeta de, olsem na mi tingting long wokim wanpela bokis na taim mi no mekim wok long hap mani bilong mi bilong baim liklik kaikai samting, mi ken putim long bokis.”

Papa bilong Emmanuel i gat wanpela bokis long haus bilong putim mani bilong go long kibung distrik i save kamap long olgeta yia. Tasol famili i kisim wanpela hevi na ol i mekim wok long dispela mani. Bilong lukautim kontribiusen mani bilong em na ol i no ken mekim narapela wok long en, Emmanuel i kisim wanpela olpela tin i go long woksop na wanpela man i ken pasim gut. Taim dispela man i kisim save long wok bilong dispela tin, em wokim wanpela bokis bilong Emmanuel long liklik hap ain. Brata bilong Emmanuel, em Michael, em i gat 5-pela krismas, na em tu i laikim wanpela bokis.

Edwin i kirap nogut long samting ol pikinini i mekim, olsem na em i askim ol bilong wanem ol i wokim ol bokis. Michael i tok: “Mi laik givim kontribiusen!”

Papamama i no bin save olsem, Emmanuel, Michael, na Uchei, em susa bilong ol i gat 9-pela krismas, ol i bin wok long bungim ol hap mani bilong baim kaikai samting na putim long ol dispela bokis. Ol i kisim dispela tingting we? Taim ol pikinini i bikpela inap long holim mani long han, papamama i skulim ol long putim sampela mani insait long bokis kontribiusen long Haus Kingdom. Em nau, ol pikinini i bihainim gut tok ol i bin lainim.

Taim ol dispela bokis i pulap, ol i opim. Mani ol i bin bungim em inap olsem K10.36—⁠em i no liklik mani long wanpela kantri we planti man i kisim sampela handet kina tasol long wok mani bilong ol insait long wanpela yia. Kain kontribiusen olsem, em bilong helpim wok autim tok bilong ol Witnes Bilong Jehova ol i mekim nau long 235 kantri long olgeta hap.