Litimapim Nem Bilong God Long Ol Maunten Bilong Filipin
Sapos yu ting kantri Filipin em ol lain ailan, tingting bilong yu i stret. Tasol tu em i wanpela kantri i gat ol bikpela maunten. Ol Witnes Bilong Jehova i no hatwok tumas long autim tok long ol biktaun na ol ples daun na wok ol i mekim i kamap gutpela. Tasol em i hatwok long autim tok long ol ples maunten.
OL NAISPELA maunten bilong Filipin i narapela kain long ol nambis, ol rip, ol liklik ples ol man i kisim pis long en, na ol taun i gat planti manmeri em ol i stap long ol ples daun bilong dispela ailan. Na tu, ol dispela maunten i mekim na i hatwok long ‘autim gutnius’ bilong Kingdom bilong God.—Matyu 24:14.
Ol ailan Filipin i stap antap stret long hap we tupela bikpela hap graun (tectonic plates) i stap aninit tru i save bung. Taim tupela hap graun i bung wantaim dispela i mekim na ol bikpela kil i sap i save kamap long ol bikpela ailan. Winim 7,100 ailan i stap long kantri Filipin na ol dispela ailan i stap long hap wes bilong solwara Pasifik we i gat planti volkeno. Olsem na long ol dispela ailan i gat planti volkeno, na dispela em i narapela as na i gat ol ples maunten. Ol maunten i gat ol bikpela ston samting, olsem na ol manmeri i stap long ol maunten i no save bungim tumas ol narapela man. I hatwok long go long ol maunten, long wanem, i no gat planti gutpela rot bilong ka i ken ron long en.
Maski i gat ol dispela hevi, ol Witnes Bilong Jehova i save ol i mas autim tok long “olgeta manmeri.” (1 Timoti 2:4) Olsem na ol Witnes long Filipin i mekim wok i stret wantaim tok bilong Aisaia 42:11, 12: “Yupela ol manmeri bilong taun Sela, yupela i mas i go antap long ol maunten na singaut wantaim amamas. Yupela ol manmeri i stap klostu na yupela ol manmeri i stap longwe, yupela olgeta i mas litimapim nem bilong Bikpela na givim biknem long em.”
Winim 50 yia i go pinis, ol Witnes i kirap wok strong long autim tok long ol manmeri i stap long ol dispela maunten. Bihain long Namba Tu Pait, ol misineri i strongim dispela wok. Planti manmeri bilong ples i amamas long tok i tru bilong Baibel, na ol i autim dispela tok long ol manmeri i stap long ol ples antap long ol maunten. Dispela i kamapim ol gutpela samting. Olsem: Long ol maunten Cordillera Central long hap not bilong Luzon, i gat 6,000 samting man bilong autim gutnius. Klostu olgeta manmeri em ol asples bilong Ibaloi, Ifugao, na Kalinga.
Tasol i gat ol ples antap long ol maunten i hatwok long go long en. Ol Witnes i no lusim tingting long ol dispela manmeri. Olsem wanem ol Witnes inap autim tok long sampela bilong ol dispela ples? Na wanem gutpela samting i bin kamap?
Trupela Bilip i Kisim Ples Bilong Pasin Tumbuna
Ol Tinggian i save stap long ol maunten bilong provins Abra, long hap not bilong ailan Luzon. Ating ol i kisim dispela nem Tinggian long tok Malai bilong bipo olsem tinggi, na em i makim “maunten.” Dispela nem i stret tru! Ol manmeri i kolim ol yet na tok ples bilong ol olsem Itneg. Ol i bilip long wanpela god ol i kolim Kabunian, na ol kain kain bilip tumbuna i stiaim ol samting ol i mekim long olgeta de. Olsem: Sapos wanpela man i tingting long go long wanpela hap na em i kus, dispela i makim olsem samting nogut bai painim em. Em i mas wet inap sampela aua bambai dispela samting nogut i pinis.
Long 1572, ol man bilong Spen i kam na bringim lotu Katolik long Tinggian, tasol ol i no skulim ol manmeri long lotu Kristen tru. Ol lain husat i bin kamap Katolik, i bilip yet long god Kabunian na ol i bihainim ol pasin bilong ples. Namba wan taim ol i kisim stretpela save bilong Baibel em long 1935 samting, taim ol Witnes Bilong Jehova i kirap autim tok bilong Kingdom long ol dispela maunten. Kirap long dispela taim i kam inap nau, planti Tinggian i gat gutpela bel ol i kirap long litimapim nem bilong Jehova “antap long ol maunten.”
Tingim Lingbaoan, bipo em i hetman bilong wanpela lain na ol man i save rispektim em. Bipo em i insait tru long pasin bilong ples bilong ol Tinggian. Em i tok: “Mi givim bel long bihainim tru pasin tumbuna bilong ol Tinggian. Sapos wanpela man i dai, mipela i save danis na paitim belo bihain long mipela i planim em. Mipela i save kilim i dai ol animal tu bilong mekim ofa. Mipela bilip long Kabunian, na mi no save long God bilong Baibel.” Em i mekim ol dispela samting maski em i wanpela Katolik.
Ol Witnes Bilong Jehova i kam autim tok long dispela ples. Ol i bungim Lingbaoan na ol i strongim em long ritim Baibel. Em i tok: “Baibel i mekim na mi bilip tru olsem Jehova em i God tru.” Bihain wanpela Witnes i stadi wantaim em, na Lingbaoan i pasim tok long bel olsem em i laik lotuim trupela God. Lingbaoan i lusim ol pasin bipo em i save mekim, na wok bilong em olsem wanpela hetman, na dispela samting i mekim na pris bilong dispela ples wantaim ol pren bilong Lingbaoan bilong bipo i kros long em. Tasol Lingbaoan i gat strongpela tingting long bihainim ol tok i tru bilong Baibel em i bin kisim save long en. Nau em i wanpela elda long kongrigesen.
Sevenpela De na Sikspela Nait
Maski sampela hap bilong Abra i save harim gutnius inap planti taim, ol narapela ples i stap longwe ol i harim gutnius wan wan taim tasol. Inap sampela taim i go pinis, ol i stretim rot bilong autim tok long wanpela bilong ol dispela ples. Inap 35 Witnes i go autim tok long longwe teritori long Tineg, Abra, em wanpela ples ol i no bin autim tok long en inap 27 yia.
Ol i wokabaut inap sevenpela de bilong mekim dispela raun bilong autim tok. Tingim olsem yu mas wokabaut long ol bris ol i wokim long rop na i hangamap, na brukim ol bikpela wara i daun moa na wokabaut planti aua long ples maunten i gat kil na yu mas karim ol samting bilong yu wantaim—ol i mekim ol dispela samting bilong autim gutnius long ol man i no save harim gutnius planti taim! Taim ol i raun ol i slip long hap inap sikspela nait, na inap fopela nait ol i slip ausait.
Maski ol dispela strongpela Witnes i karim sampela kaikai, ol i no kisim planti kaikai inap long dispela raun olgeta. Tasol dispela i no givim hevi long ol, long wanem, ol manmeri i amamas tru long senisim kaikai wantaim ol buk i kamapim tok bilong Baibel. Ol Witnes i kisim planti kaikai bilong gaden, pis, na mit bilong dia. Maski ol i hatwok liklik, dispela grup i tok: “Mipela i daunim laik bilong mipela yet, tasol mipela i kisim bikpela amamas tru.”
Insait long sevenpela de, ol Witnes i autim tok long 10-pela ples, ol i tilim 60 buk, 186 magasin, 50 buklet, na planti liklik nius. Ol i soim pasin bilong stadi long Baibel long 74 lain manmeri. Na long taun Tineg, ol wokman bilong gavman wantaim sampela bikman bilong taun ol i askim ol brata long mekim wanpela miting bilong kongrigesen, na inap 78 manmeri i bung. Planti bilong ol dispela lain i bung em ol tisa na ol polisman. Gutpela sapos planti manmeri moa bilong Tinggian i kam bung wantaim ol lain i “singaut strong” na litimapim nem bilong Jehova antap long ol maunten.
Samting i Winim Gol
Long hap saut bilong Filipin i gat sampela ailan we ol Spen i bin painim gol long en. Olsem na ol i kolim ol dispela ailan olsem Mindoro, em nem ol i kisim long tok Spen mina de oro, olsem “main bilong kisim gol.” Tasol samting i winim gol i stap long ol dispela ailan long nau—em ol manmeri i laik mekim wok bilong trupela God Jehova.
Inap olsem 125,000 manmeri ol i kolim ol Mangyan i save stap insait tru long bikbus bilong Mindoro. Ol i no tingting long kisim planti samting bilong skin, ol i stap bilong ol yet, na ol i gat tok ples bilong ol yet. Planti ol i bilip long kain kain spirit na ol i gat planti god.
Sampela taim ol i sot long kaikai o ol narapela samting, na wan wan Mangyan i save kam daun long ol hap bilong nambis na painim wok. Pailing i mekim olsem, em i bilong wanpela liklik grup bilong Mangyan ol i kolim Batangan. Em i go bikpela namel long lain bilong em long bikbus bilong ol maunten, na em i save bihainim bilip na pasin bilong ol Batangan. Planti ol i save pasim laplap tasol. Bilong kaikai ol i planim i ken kamap gut, ol i bihainim pasin tumbuna bilong ol Batangan, na ol i kilim i dai wanpela kakaruk na larim blut i kapsait i go insait long wara taim ol i wok long beten.
Pailing i no bihainim moa ol dispela pasin tumbuna. Bilong wanem? Taim em i go long ples daun, em i painim wok long sampela famili em ol i Witnes Bilong Jehova. Wanpela bilong dispela famili i autim tok i tru bilong Baibel long Pailing. Em i harim gut na em i laikim save em i kisim long laik bilong Jehova long ol man na dispela graun. Dispela famili i stretim rot bilong em i ken go long skul, na long wankain taim em i stadi long Baibel. Pailing i kisim baptais olsem wanpela Witnes Bilong Jehova taim em i gat 24 krismas. Taim em i gat 30 krismas, em i mekim namba tu yia bilong em long haiskul, na skul i kamap teritori bilong em long autim tok. Long nau ol i kolim em Rolando (nem bilong ol lain i stap long ples daun).
Sapos yu bungim Rolando, bai yu bungim wanpela man i bilas gut na i smail, em i autim tok fultaim na em i wanpela kongrigesen sevent long Mindoro. I no longtaim i go pinis na Rolando i go bek long ples maunten, em i no go bilong mekim pasin tumbuna wantaim ol lain Batangan, tasol em i go bilong tokim ol long tok i tru bilong Baibel i save givim laip.
Ol i Laik Wokim Haus Kingdom
Provins Bukidnon—long tok Sebuano insait bilong dispela nem em “Ol Manmeri i Save Stap Long Ol Maunten”—na dispela provins i stap long ailan Mindanao long hap saut. Dispela hap i gat ol maunten, ol traipela baret, ol ples daun i gat ol bikpela wara, na ol stretpela hap graun. Gutpela graun i gat gris i kamapim kaikai olsem painapol, kon, kofi, rais, na banana. Ol lain hailans bilong Talaandig na Higaonon i stap long dispela hap. Ol dispela manmeri tu i mas kisim save long Jehova. I no longtaim i go pinis, klostu long taun Talakag, narapela kain samting i kamap na i opim rot long autim tok.
Ol Witnes i go antap long ol dispela ples na ol i kisim save olsem ples i kol, tasol ol manmeri i mekim gutpela pasin pren. Ol asples i tok ol i bilip long God i Gat Olgeta Strong, em Papa bilong yumi, tasol ol i no save long nem bilong em. Ol i save stap olgeta taim long bus, olsem na dispela em namba wan taim ol i bungim ol Witnes Bilong Jehova. Ol Witnes i tokim ol long nem bilong God na long ol gutpela samting em bai mekim long rot bilong Kingdom bilong em. Ol manmeri i amamas, olsem na ol brata i pasim tok long ol bai go bek long narapela taim.
Ol Witnes i go bek planti taim. Olsem na ol asples i givim ol wanpela hap graun bilong wokim “haus” bilong ol Witnes Bilong Jehova. Ol Witnes i amamas na i orait long dispela samting. Dispela hap graun i stap antap long wanpela maunten, em long dispela hap ol inap lukim gut rot. Ol i wokim haus long diwai, mambu, na lip bilong diwai pam. Ol i wokim dispela haus insait long 3-pela mun na 10-pela de. Long fran bilong Haus Kingdom ol i putim bikpela sain olsem “Haus Kingdom Bilong Ol Witnes Bilong Jehova.” Tingim dispela, ol i wokim Haus Kingdom paslain long ol i kamapim kongrigesen!
Bihain, wanpela elda i save autim tok fultaim i go sindaun long dispela hap, na wanpela kongrigesen sevent tu i mekim olsem. Ol Witnes bilong ol ples i stap klostu i wok strong wantaim ol long kamapim wanpela kongrigesen. Kongrigesen i kamap long Ogas 1998. Wanpela liklik kongrigesen i mekim wok long dispela Haus Kingdom, ol i helpim ol manmeri i stap long ol maunten long save long tok i tru bilong Baibel.
Tru tumas, Jehova i bin mekim bikpela wok tru long ol wokman bilong em long Filipin, em ol i gat laik long autim tok i tru bilong Kingdom long ol ples maunten tu, maski i hatwok long go long ol dispela ples. Dispela i kirapim yumi long tingim tok bilong Aisaia 52:7, em i tok: “Bai ol manmeri i amamas tru long lukim wanpela man i ran i kam long ol ples maunten, bilong bringim gutpela tok.”
[Ol Mep long pes 11]
(Bilong save ol dispela rait i stap we long pes, lukim buk o magasin)
ABRA
MINDORO
BUKIDNON
[Kredit Lain]
Globe: Mountain High Maps® Copyright © 1997 Digital Wisdom, Inc.
[Ol Piksa long pes 10]
Bilong autim tok long ol ples maunten, ol i mas wokabaut inap planti aua long ol rot nogut
[Piksa long pes 10]
Kisim baptais long wara bilong maunten