Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• Wanem tok bilong Jisas antap long maunten em yu inap yusim bilong daunim hevi?
Long olgeta de, yu ken ritim wanpela bikpela tok Jisas i mekim antap long maunten o insait long 4-pela Gutnius. Sapos yu tingim tingim long bel ol dispela tok na yu wok long bihainim, yu inap painim bikpela amamas moa na daunim hevi.—12/15, pes 12-14.
• Wanem tripela gutpela as na ol elda i mas lainim ol kongrigesen sevent long mekim sampela ol narapela wok moa?
Namba bilong ol Witnes Bilong Jehova i wok long i go bikpela, olsem na i mas i gat sampela man moa ol i save mekim gut wok na bai ol inap helpim ol dispela nupela baptais long kamap strong. Sampela elda i mekim wok inap planti yia pinis, ol i wok long go lapun o ol i gat sik na dispela i mekim na ol i mas lusim sampela wok ol i bin mekim. Na sampela strongpela elda i holim sampela ol narapela wok bilong spirit antap long ol wok ol i mekim long kongrigesen, olsem na ating ol i no inap mekim planti wok insait long kongrigesen olsem long bipo.—1/1, pes 29.
• Olsem wanem na ol man i bilip long ol god em ol i no god tru?
Planti manmeri i lotuim ol god bilong lotu bilong ol, tasol ating em ol god i no gat laip na i no inap kisim bek ol olsem god Bal long taim bilong Elaija. (1 King 18:26, 29; Song 135:15-17) Sampela narapela i lotuim ol man i gat nem long singsing o pilai spot samting, em ol god i no inap tru long mekim samting ol man i ting ol inap mekim. Tasol Jehova i stap tru na em i save kamapim ol laik bilong em.—1/15, pes 3-5.
• Pasin Kein i mekim taim God i givim toksave long em i lainim yumi long wanem samting?
God i wokim yumi bambai yumi yet i ken skelim wanem samting yumi laik mekim, na yumi ken makim stretpela rot long bihainim na maski long givim baksait long stretpela pasin olsem Kein i bin mekim. Dispela stori bilong Baibel i soim yumi olsem Jehova bai givim strafe long ol man i no tanim bel.—1/15, pes 22-23.
• Bilong wanem pasin bilong i stap klin em i bikpela samting long nau?
Pasin na sindaun bilong ol man i wok long senis, planti manmeri i no tromoi bikpela hap taim long klinim haus bilong ol olsem bipo. Sapos ol man i no tingim pasin bilong lukautim kaikai na wara na bai i no gat doti long en, dispela inap givim bikpela sik long man. Skin bilong yumi i mas i stap klin, na tu, Baibel i kamapim olsem yumi mas i stap klin long samting bilong spirit, long pasin na toktok, na long tingting.—2/1, pes 3-6.
• Pol i tingim ol Witnes Bilong Jehova i bin stap paslain long Krais na em i tok ol i no ken “kamap gutpela tru paslain long yumi.” Olsem wanem em inap tok olsem? (Hibru 11:40)
Long taim bilong Wan Tausen Yia, Krais wantaim ol brata bilong em long heven em God i bin makim ol, ol bai mekim wok king na pris na ol bai mekim wok long ofa bilong Krais bilong helpim ol lain i kirap bek. Long dispela rot ol bilipman olsem Hibru sapta 11 i stori long en, ol bai “kamap gutpela tru.”—2/1, pes 23.
• Wanem insait bilong dispela tok bilong Pol taim em i tokim ol Hibru: “Long dispela pait blut bilong yupela i no kapsait yet”? (Hibru 12:4)
Dispela tok i makim olsem man i sanap strong na sakim ol traim i go inap long indai i painim em. I gat stori bilong sampela manmeri long bipo em ol i stap olsem gutpela piksa long pasin bilong stap gut long God i go inap long ol i dai. Maski ol Hibru em Pol i raitim pas long ol i no bin kisim kain traim olsem, ol i gat wok long kamap strongpela Kristen, olsem strongim bilip bilong ol na bai ol inap karim ol kain kain hevi.—2/15, pes 29.
• I stret wanpela Kristen i putim sampela marasin long bodi bilong wanpela long famili i dai na bai bodi i no ken bagarap?
Pasin bilong putim marasin long bodi bilong wanpela daiman i bilong stretim bodi na bai em i no ken bagarap. Ol samting bilong lotu i as na sampela man bilong bipo i bin bihainim dispela pasin. Tasol ol man i lotu tru i no inap mekim olsem. (Saveman 9:5; Aposel 24:15) Pasin bilong putim marasin long bodi bilong daiman na bai bodi i no ken bagarap, dispela i no inap pasim samting bai painim bodi long bihain, em dispela bodi i mas go bek long graun. (Stat 3:19) Tasol bai i no gat wok long tingting planti sapos lo i tok yumi mas mekim, o sampela insait long famili bilong man i dai pinis i gat laik long mekim olsem, o ol i mekim, long wanem, sampela famili i stap longwe bai i go long dispela bung bilong planim man i dai pinis.—3/15, pes 29-31.
• Wanem sampela stori bilong Baibel i lainim yumi olsem God i amamas long singautim ol manmeri bilong olgeta lain?
Jehova i salim profet Jona long givim toksave long ol Ninive, na God i kirapim Jona long amamas long ol i tanim bel. Long rot bilong toktok na pasin bilong em, Jisas i kirapim ol narapela long mekim pasin sori long ol manmeri bilong Samaria. Aposel Pita na Pol i gat wok long autim gutnius long ol manmeri i no bilong lain Juda. Long ol dispela stori, yumi ken luksave olsem i gat wok long helpim ol manmeri em ol i gat kain kain sindaun.—4/1, pes 21-24.