Tetragramaton Long Septuagint
NEM bilong God, Jehova, ol i raitim long 4-pela leta Hibru יהוה (YHWH), ol i kolim Tetragramaton. Inap longpela taim ol man i ting Tetragramaton i no bin stap long ol kopi bilong Baibel Septuagint. Ol i tok, taim ol man bilong raitim Ol Skripsa Grik i kisim sampela tok long Ol Skripsa Hibru, ol i no bin putim nem bilong God long rait bilong ol.
Ol samting ol i bin painim insait long wan handet yia samting i go pinis, i kamapim klia olsem nem bilong God i bin stap long Baibel Septuagint. Wanpela buk i tok: “Ol i gat bikpela laik tru long nem holi bilong God i mas i stap long Baibel na i no ken senis, olsem na taim ol Juda em ol i save bihainim pasin bilong ol Grik ol i tanim Baibel Hibru long tok Grik, ol i raitim ol leta bilong Tetragramaton insait long ol tok ol i raitim long tok Grik.”
Hap bilong wanpela olpela rait i stap long han kais i wanpela tasol bilong planti olpela rait i stap yet. Ol i painim dispela rait long Oxyrhynchus, Isip, na ol i givim namba 3522 long en, dispela olpela rait i bilong taim bilong ol aposel.a Tok bilong Jop 42:11, 12, i stap long en, na longpela bilong en i 7-pela sentimita, na braitpela bilong en i 10.5 sentimita. Tetragramaton mipela i makim long piksa i stap long ol leta Hibru bilong bipo.b
Olsem wanem? Nem bilong God i bin stap long Ol Skripsa Grik ol i bin raitim pastaim? Saveman George Howard i tok: “Ol i bin putim Tetragramaton long ol kopi bilong Baibel Grik [Septuagint], em Baibel bilong misin bilong pastaim, olsem na i stret yumi ken ting taim ol man bilong raitim N[upela] T[estamen] i kamapim sampela tok bilong Olpela Testamen, ol i bin putim Tetragramaton long rait bilong ol.” I luk olsem bihain liklik long dispela, ol man bilong raitim tok bilong Baibel, ol i no raitim moa nem bilong God, ol i raitim Kyʹri·os (Bikpela) na The·osʹ (God).
[Ol Futnot]
a Bilong kisim sampela save moa long olpela rait ol i bin painim long Oxyrhynchus, lukim Wastaua bilong Februeri 15, 1992, pes 26-28.
b Bilong lukim sampela narapela olpela rait long tok Grik i gat nem bilong God long en, lukim Baibel New World Translation of the Holy Scriptures−With References, appendix 1C.
[Piksa Kredit Lain long pes 30]
Courtesy of the Egypt Exploration Society