Askim

Olsem wanem? Man i mas i go insait tru long wara sapos em i laik kisim baptais tasol em i gat bikpela bagarap long skin o skin i no strong na dispela i mekim na i hatwok long em i go insait tru long wara?

Dispela tok “baptais” i kam long wanpela tok Grik baʹpto, mining bilong en i olsem “putim i go insait.” (Jon 13:26) Long Baibel dispela tok “baptais” i gat wankain mining olsem “go insait tru long wara.” Wanpela Baibel (The Emphasised Bible, bilong Rotherham) i tok long baptais bilong man Itiopia olsem: “Tupela wantaim i go daun long wara, em Filip na dispela man,​—⁠na Filip i putim em i go insait tru long wara.” (Aposel 8:38) Olsem na man i kisim baptais em i mas i go insait tru long wara.​—⁠Matyu 3:16; Mak 1:⁠10.

Jisas i tokim ol disaipel bilong em: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol.” (Matyu 28:​19, 20) Olsem na ol Witnes Bilong Jehova i save baptaisim ol man long ol ples waswas samting, raunwara, wara, na ol narapela ples i gat wara inap long man i ken go insait tru long en. Lo bilong Baibel i tok man i laik kisim baptais i mas go insait tru long wara, na ol man i no gat namba long tok long wanpela man olsem em i no gat wok long kisim baptais. Olsem na man i mas kisim baptais, maski sik samting i mekim na ol brata i mas mekim ol narapela kain samting bilong stretim rot bilong em i ken kisim baptais. Olsem: Pasin bilong baptaisim man long traipela dis em man i ken waswas insait long en i bin helpim sampela lapun na ol man em skin bilong ol i no gat strong liklik. Ol brata inap hatim wara bilong dispela dis, na isi isi ol i ken putim man i go insait long wara, na taim skin bilong em i lain pinis, ol inap baptaisim em.

Ol i bin baptaisim pinis sampela man i gat bikpela bagarap tru long skin. Olsem: Ol i bin baptaisim pinis sampela man em ol i bin kisim operesen long nek bambai ol i ken pulim win, olsem na ol i gat hul long nek, na ol i bin baptaisim sampela man i mas yusim masin bilong pulim win. Tru, bilong ol i ken baptaisim ol kain man olsem ol brata i mas redim gut ol samting. Em i gutpela long wanpela nes i stap long taim bilong baptais o sapos inap wanpela dokta i ken i stap. Taim ol brata i stretim na redim gut ol samting, klostu olgeta taim ol inap baptaisim man. Olsem na sapos man i gat laik tru long kisim baptais na em i redi long karim hevi inap kamap long dispela, ol brata i mas mekim olgeta samting ol inap long mekim bilong man i ken kisim baptais long wara.