Baibel i Tok Wanem?
Yu Mas Kisim Baptais Gen?
LUCILA i tingting planti. Em i go bikpela long lotu Katolik, tasol nau wanpela pren i no bilong lotu Katolik i save helpim em long stadi gut long Baibel. Nau em i lukim tok bilong Baibel long baptais na save i narapela kain long baptais em i bin kisim taim em i liklik pikinini. Olsem na Lucila i askim olsem: ‘Mi mas kisim baptais gen? Nogut mi baptais gen na mekim nogut bel bilong God.’
Planti milion manmeri, maski ol i bilong lotu Katolik o Talatala, taim ol i liklik pikinini, pris i bin tromwe o kapsaitim hap wara long ol, olsem baptaisim ol. Na sampela milion manmeri moa, taim ol i bikpela pinis, ol i bin go insait tru long wara bilong kisim baptais. Olsem na yumi gat askim: Baptais Kristen i wanem kain baptais? I gat sampela samting i mekim na man i mas baptais namba tu taim?
Wanpela buk (Pocket Catholic Dictionary) i tok, baptais i olsem ‘pasin bilong wasim rong bilong man long rot bilong wara na tok bilong God, na man i kamap nupela gen na em inap go long heven na stap wantaim Krais inap oltaim oltaim.’ Na dispela buk i stori long pasin bilong kisim baptais namba tu taim. Buk i tok: ‘Baptais i save putim wanpela mak long tewel bilong man i no inap tekewe. Olsem na man i no ken baptais gen, i no stret em i mekim olsem.’ Olsem wanem? Baibel i tok olsem?
Kamapim Ol Disaipel na Baptaisim Ol
Matyu 28:19, 20 i kamapim wanpela lo long baptais Jisas i bin givim long ol disaipel bilong em taim em i kirap bek pinis na em i no go yet long heven. Em i tok: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” Nau yumi save, i no ol liklik pikinini i mas kisim baptais, nogat; ol disaipel bilong Krais, em ol man i bin lain pinis long bihainim olgeta tok bilong Krais, ol i mas kisim baptais. Na dispela tok i no pait wantaim tok bilong Baibel, long wanem, olgeta baptais Baibel i stori long en, em baptais bilong ol man i kamap disaipel pinis na ol i bin go insait tru long wara. Na dispela i stret long Krais Jisas tu taim Jon Bilong Baptais i baptaisim em. Baibel i tok, taim Jisas i baptais pinis, em “i lusim wara na i kam antap.” (Matyu 3:16) Na Baibel i tok, Jon i bin makim gut ol ples bilong baptaisim ol man, olsem ol ples i gat planti wara.—Jon 3:23.
Bihain Baibel i stori long baptais bilong man bilong Itiopia na Baibel i tok: “Filip wantaim dispela man i go daun long wara. Na Filip i baptaisim em. Na tupela i lusim wara na i kam antap.” (Aposel 8:38, 39) Dispela tok baptais i kam long wanpela tok Grik ba·ptiʹzo na dispela tok i kam long narapela tok Grik baʹpto. Insait bilong dispela tok Grik i olsem “putim i go insait, subim i go daun insait.” Olsem na yumi save taim man i go daun insait olgeta long wara baptais bilong em i stret long dispela tok Grik.
Baibel i Stori Long Man i Baptais Gen
Tasol olsem wanem long ol planti milion man i bin baptais taim ol i pikinini o pris i bin tromoi hap wara long het bilong ol? I stret ol i baptais gen? Aposel 19:1-7 i bekim ol dispela askim. Ating long taim bilong kol long yia 52 o 53, Pol i bin go long taun Efesus long Esia Maina. Planti maniman i stap long dispela taun. Long Efesus Pol i painim sampela disaipel ol i mas kisim baptais gen, long wanem, ol i bin kisim baptais bilong Jon. Olsem na Pol i baptaisim ol gen long “nem bilong Bikpela Jisas.” Em i no ting dispela samting bai mekim nogut bel bilong God. God i wanbel long tingting bilong Pol na bilong strongim dispela tingting God i salim spirit holi olsem presen long ol dispela man.
Sapos ol dispela 12-pela man i no bin wanbel long tok bilong Pol long ol i mas kisim baptais gen long nem bilong Krais Jisas, Pol i no inap baptaisim ol. Pastaim ol i mas kisim stretpela save na ol i mas bihainim. Em nau, God i ken amamas long ol taim ol i baptais namba tu taim.
Inapim Mak Bilong Kisim Baptais
Yumi mas mekim wanem ol samting bilong inapim mak bilong kisim baptais? Tingim ol bikpela lain manmeri i bin kisim baptais long de bilong Pentikos long yia 33. Olsem wanem ol i bin inapim mak na ol inap kisim baptais? Ol i bilong lain Juda, olsem na ol i gat save pinis long God Jehova na ol samting em i bin mekim long lain bilong em. Na ol i gat save pinis long ol tok profet bilong Mesaia, em God i tok promis long salim em i kam. Na long dispela de stret ol i kisim baptais ol i bin harim wanpela tok bilong aposel Pita na dispela i bin helpim ol long kisim sampela stretpela save moa. Wanem samting i kamap?
“Ol manmeri i harim tok bilong Pita, na dispela tok i sutim tru bel bilong ol. Na ol i askim Pita wantaim ol arapela aposel olsem, ‘Ol brata, bai mipela i mekim wanem nau?’ Na Pita i tokim ol olsem, ‘Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela.’ ” (Aposel 2:37, 38) Tok Pita i givim i no olsem tok nating, tok i sutim tru bel bilong ol man. “Pita i autim planti arapela tok tu long ol, na em i tok strong long ol.” Ol man i bilipim dispela tok, long wanem, tok bilong em i gat as, olsem na ol i kisim baptais. “Long dispela de samting olsem 3,000 manmeri i kam insait long lain bilong ol manmeri i bilip long Jisas.”—Aposel 2:40, 41.
Long nau tu, man i laik kisim baptais Kristen i stret long ai bilong God, pastaim em i mas inapim sampela mak, olsem: (1) kisim stretpela save, (2) tanim bel tru, (3) baut na lusim ol “pasin nogut,” na tanim i go long God. Na man i mas baptais long “nem bilong Krais Jisas,” olsem em i bilip long ofa bilong Jisas bilong tekewe sin. Na em i mas aninit long Jisas olsem king God i makim pinis.—Aposel 2:40; Rom 5:12-19; 7:14-25.
Ol man i gat gutpela bel na inapim tru mak bilong kisim baptais i no ken ting sapos ol i baptais gen dispela bai mekim nogut bel bilong God. Taim man i baptais stret, long wanem, em inapim mak, God i save amamas long em.