Sapta 12
Ol Samting Baptais Bilong Yu i Makim
1. Bilong wanem yumi olgeta wan wan i mas tingim baptais long wara?
LONG yia 29 C.E., Jisas i kisim baptais long wara Jordan, taim Jon Bilong Baptais i putim em i go insait long wara. Jehova yet i lukim dispela na em i tok, em i amamas long dispela samting. (Matyu 3:16, 17) Olsem na Jisas i stap olsem piksa ol disaipel bilong em i ken bihainim. Tripela yia na hap bihain, Jisas i tokim ol disaipel bilong em: “God i givim mi bikpela namba na strong bilong bosim olgeta samting long heven na long graun. Olsem na yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit.” (Matyu 28:18, 19) Olsem wanem? Yu kisim baptais pinis, olsem Jisas i tok? Sapos nogat, yu wok long redim ol samting bilong kisim baptais?
2. Yumi mas bekim wanem ol askim bilong baptais?
2 Maski man i baptais pinis o em i redi long baptais, olgeta man i laik mekim wok bilong Jehova na stap long nupela taim, ol i mas save gut long as bilong baptais. Ol askim yumi mas save long bekim bilong en i olsem: Baptais bilong ol Kristen long nau i makim wankain samting olsem baptais bilong Jisas? Pasin bilong kisim baptais “long nem bilong Papa na bilong Pikinini na bilong Holi Spirit” i makim wanem samting? Yumi mas mekim wanem na bai yumi mekim ol samting i stret wantaim baptais bilong ol Kristen long wara?
Baptais Bilong Jon
3. Husat tasol i kisim baptais bilong Jon?
3 Inap 6-pela mun paslain long taim Jisas i kisim baptais, Jon Bilong Baptais i autim tok long ples nating bilong Judia, em i tok: “Yupela tanim bel. Kingdom bilong heven em i kam klostu pinis.” (Matyu 3:1, 2) Ol manmeri i harim dispela tok na ol i bihainim. Ol i autim sin bilong ol, tanim bel, na ol i go long Jon na bai em i ken baptaisim ol long wara Jordan. Dispela baptais i bilong ol Juda tasol.—Luk 1:13-16; Aposel 13:23, 24.
4. Bilong wanem ol Juda long taim bilong ol aposel i mas tanim bel hariap?
4 Ol dispela Juda i mas tanim bel hariap. Long yia 1513 B.C.E., long maunten Sainai, ol tumbuna bilong ol i bin mekim kontrak—olsem strongpela tok promis—wantaim God Jehova. Tasol ol i mekim ol sin nogut tru, olsem na ol i no mekim ol samting ol i bin tok promis long mekim, na i olsem dispela kontrak i kamapim ples klia asua bilong ol. Long taim bilong Jisas ol i stap nogut tru. “Bikpela De” bilong Jehova, em Malakai i bin tok profet long en, em i klostu pinis. Long 70 C.E., dispela “de” i kamap taim ol ami bilong Rom i bagarapim Jerusalem, tempel bilong en, na kilim i dai winim wan milion Juda. Jon Bilong Baptais i givim bel long lotu i tru, na God i salim em i go paslain long dispela bagarap na bai em i ken “redim ol man na ol i stap redi long Bikpela i kam.” Ol Israel i mas tanim bel na hevi long rong ol i bin mekim long Lo Bilong Moses, na ol i mas redim bel na tingting na bai ol i ken bilip long Pikinini bilong God, Jisas, em Jehova i laik salim em long ol.—Malakai 4:4-6; Luk 1:17; Aposel 19:4.
5. (a) Taim Jisas i kam long Jon bilong kisim baptais, bilong wanem Jon i tingting planti? (b) Baptais bilong Jisas i makim wanem samting?
5 Jisas tu em i kam long Jon bilong kisim baptais. Tasol bilong wanem Jisas i laik kisim baptais? Jon i save Jisas i no gat sin, olsem na em i tok: “Mobeta mi kisim baptais long yu. Olsem wanem na yu kam long mi?” Tasol baptais bilong Jisas i makim narapela samting. Olsem na em i tokim Jon: “Maski, nau yu mas mekim olsem mi tok. Long dispela pasin bai yumi inapim olgeta samting God i laik bai yumi mas mekim.” (Matyu 3:13-15) Jisas i no gat sin, olsem na baptais bilong em i no makim olsem em i tanim bel. Na tu, Jisas i no gat wok long dediket long God, long wanem, em i bilong lain Israel i dediket pinis long Jehova. Tasol taim em i gat 30 krismas na em i kisim baptais, dispela i makim olsem em i givim em yet long Papa bilong em long heven bilong mekim sampela samting moa God i laik bai em i mekim.
6. Jisas i ting olsem wanem long wok bilong mekim laik bilong God?
6 God i laik bai Krais Jisas i mekim ol wok bilong Kingdom. (Luk 8:1) Em i laik bai Jisas i givim laip bilong em olsem ofa bilong baim bek ol man na kamapim nupela kontrak. (Matyu 20:28; 26:26-28; Hibru 10:5-10) Jisas i tingim tru ol samting baptais bilong em i makim. Em i no larim ol narapela samting i pulim tingting bilong em. Em i mekim tru laik bilong God i go inap long taim em i dai, na wok bilong autim tok bilong Kingdom bilong God em i nambawan wok bilong em.—Jon 4:34.
Baptais Bilong Ol Disaipel Kristen
7. Kirap long Pentikos 33 C.E., ol Kristen i kisim tok long mekim wanem samting?
7 Ol man husat i kamap namba wan disaipel bilong Jisas, pastaim Jon i bin baptaisim ol na bihain em i salim ol i go long Jisas na ol inap kamap lain bilong Kingdom bilong heven. ( Jon 3:25-30) Jisas i bosim wok bilong ol na ol tu i baptaisim sampela man, em dispela baptais i gat wankain as olsem baptais bilong Jon. ( Jon 4:1, 2) Tasol long Pentikos 33 C.E., ol i bihainim tok na kirap baptaisim ol man “long nem bilong Papa na bilong Pikinini na bilong Holi Spirit.” (Matyu 28:19) Sapos yu tingim gen mining bilong dispela tok em bai helpim yu tru.
8. Baptais “long nem bilong Papa” i makim wanem samting?
8 Pasin bilong kisim baptais “long nem bilong Papa” i makim wanem samting? Em i makim olsem yumi daun long nem, namba, biknem, laik, na ol lo bilong em. Tingim ol samting i insait long dispela. (1) Long Song 83:18, Baibel New World Translation i tok long nem bilong em: “Yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” (2) Long 2 King 19:15, Baibel i tok long namba bilong em: “Bikpela . . . , yu tasol yu God tru.” (3) Kamapim Tok Hait 4:11 i tok long biknem bilong em olsem: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” (4) Yumi mas save tu olsem Jehova em i Man bilong givim laip, em i laik kisim bek yumi long sin na i dai: “Bikpela, yu wanpela tasol yu save kisim bek mipela na mipela i no save bagarap.” (Song 3:8; 36:9) (5) Yumi mas daun long Jehova olsem Man bilong givim lo: “Bikpela yet bai i stap king bilong yumi na em yet bai i givim ol lo long yumi na bosim yumi. Na em bai i was gut long yumi na yumi no painim taim nogut.” (Aisaia 33:22) Jehova i gat ol dispela namba, olsem na Baibel i tokim yumi olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.”—Matyu 22:37.
9. Baptais “long nem bilong . . . Pikinini” i makim wanem samting?
9 Baptais “long nem bilong . . . Pikinini” i makim wanem samting? Em i makim olsem yumi save long nem, wok, na namba bilong Jisas Krais. Mining bilong nem bilong em, Jisas, i olsem “Jehova i Save Kisim Bek Ol Man.” Em i kisim dispela bikpela wok, long wanem, em i namba wan pikinini bilong God, na namba wan samting God i bin wokim. (Matyu 16:16; Kolosi 1:15, 16) Long Jon 3:16, Baibel i tok long dispela Pikinini olsem: “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Jisas i stap gut long God i go inap long taim em i dai, olsem na God i kirapim em bek long matmat na givim bikpela wok moa long em. Aposel Pol i tok, God i “litimapim Jisas na mekim em i stap antap tru,” em i namba tu long Jehova. Long dispela as “olgeta ensel na olgeta man . . . i ken brukim skru long ai bilong Jisas na i stap aninit long em. Na olgeta bilong ol i ken tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.” (Filipai 2:9-11) Dispela i makim olsem ol i bihainim tok bilong Jisas, em tok Jehova yet i bin kamapim.—Jon 15:10.
10. Baptais “long nem bilong . . . Holi Spirit” i makim wanem samting?
10 Baptais “long nem bilong . . . Holi Spirit” i makim wanem samting? Em i makim olsem man i save long wok bilong holi spirit. Holi spirit em i wanem samting? Em i strong bilong Jehova, na long rot bilong en em i kamapim ol samting em i tingting pinis long mekim. Jisas i tokim ol disaipel: “Bai mi askim Papa, na em bai i givim yupela narapela Helpim bilong strongim yupela. Na em bai i stap wantaim yupela oltaim oltaim. Dispela Helpim em i Spirit bilong tok tru.” ( Jon 14:16, 17) Dispela spirit bai helpim ol long mekim wanem? Jisas i tok: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:8) Long rot bilong holi spirit, Jehova i kirapim ol man long raitim Baibel. Baibel i tok: “I no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.” (2 Pita 1:21) Yumi luksave long wok bilong holi spirit taim yumi stadi long Baibel. Narapela rot bilong kamapim olsem yumi luksave long wok bilong holi spirit, em yumi save askim Jehova long helpim yumi long kamapim “ol gutpela pasin” bilong spirit, em ‘pasin bilong laikim tru ol arapela, amamas, stap bel isi, no ken belhat kwik, helpim ol man, mekim gutpela pasin long ol, wokabaut stret oltaim, stap isi, na daunim laik bilong olpela bel.’—Galesia 5:22, 23.
11. (a) Long dispela taim bilong yumi baptais i makim wanem samting? (b) Olsem wanem baptais i olsem man i dai na i kirap bek?
11 Ol namba wan lain i kisim dispela baptais Jisas i tok long en, em ol Juda na ol man bilong ol narapela lain i bihainim lotu Juda, kirap long 33 C.E. Bihain liklik, rot i op long ol Samaria inap kamap ol disaipel Kristen. Long 36 C.E., ol i singautim ol man bilong ol arapela lain long kamap disaipel Kristen. Taim ol i no kisim yet baptais, ol Samaria na ol man bilong ol arapela lain, na ol Juda na ol man bilong ol narapela lain i bihainim lotu Juda, ol i mas dediket long Jehova bilong mekim wok bilong em olsem disaipel bilong Pikinini bilong em. I kam inap long nau, baptais ol Kristen i kisim long wara i makim dispela samting. Pasin bilong i go insait tru long wara i makim stret man i dediket pinis, long wanem, baptais i olsem ol i planim man. Taim yu go insait tru long wara, dispela i makim olsem yu dai long olpela pasin bilong yu. Na taim yu kam antap long wara, dispela i makim olsem yu kisim laip bilong mekim laik bilong God. Dispela “wanpela baptais” i stret long olgeta man i kamap trupela Kristen. Long taim ol i baptais ol i kamap Kristen Witnes Bilong Jehova, ol wokman bilong God.—Efesus 4:5; 2 Korin 6:3, 4.
12. Wanem samting i olsem piksa na i makim baptais bilong ol Kristen long wara? Olsem wanem em i piksa bilong dispela samting?
12 Dispela kain baptais i gutpela samting tru long ai bilong God na em inap kisim bek yumi. Aposel Pita i stori long Noa i wokim sip na em wantaim famili bilong em i abrusim bagarap long taim bilong Bikpela Tait, na bihain Pita i tok: “Dispela wara em i olsem piksa bilong baptais, long wanem, God i save kisim bek yupela long wara bilong baptais. Baptais em i no bilong rausim doti bilong skin. Nogat. Em i promis yupela i mekim long God long yupela bai i stap klin long ai bilong en. Bilong kisim bek yupela, God i bin kirapim Jisas Krais long matmat.” (1 Pita 3:21) Noa i wokim sip na dispela i kamapim long ples klia olsem Noa i mekim wok God i bin givim long em. Taim wok bilong wokim sip i pinis, “wara i kamap gen na bikpela tait i karamapim dispela graun, na graun i bagarap olgeta.” (2 Pita 3:6) Tasol Noa na famili bilong em, “8-pela manmeri, ol i bin i go antap long sip na bikpela wara i karim ol i go na God i kisim bek ol na ol i stap gut.”—1 Pita 3:20.
13. Baptais long wara i helpim Kristen long abrusim wanem samting?
13 Long nau, ol man i bilip long Krais i kirap bek pinis na ol i dediket long Jehova, ol i kisim baptais bilong makim olsem ol i dediket pinis. Ol i mekim ol samting God i laik bai ol i mas mekim long nau, na em i kisim bek ol long pasin nogut bilong nau. (Galesia 1:3, 4) Ol i no stap bilong kisim bagarap taim pasin nogut bilong nau i pinis. God i kisim bek ol na mekim bel bilong ol i kamap klin. Aposel Jon i tokim ol wokman bilong God olsem: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”—1 Jon 2:17.
Truim Tok Promis Yumi Mekim Pinis
14. Bilong wanem baptais tasol i no makim olsem God i mas kisim bek yumi na yumi no ken bagarap?
14 Tasol nogut yumi ting, yumi kisim baptais na dispela samting tasol i mekim na yumi no ken lus. Nogat. I gat wanpela rot tasol bilong baptais i ken helpim man. Em i mas dediket tru long Jehova long rot bilong Jisas Krais na mekim laik bilong God i go inap long pinis. “Ol manmeri i stap strong inap long las de, God bai i kisim bek ol.”—Matyu 24:13.
15. (a) God i laik bai ol Kristen i baptais pinis i mas mekim wanem long nau? (b) Yumi mas ting olsem wanem long wok bilong i stap disaipel Kristen?
15 Wanpela samting God i laik bai Jisas i mekim long laip bilong em i olsem: Em i laik bai Jisas i givim laip bilong em olsem ofa. Tasol yumi mas givim skin bilong yumi long God, na yumi mas daunim laik bilong yumi yet na mekim laik bilong God. (Rom 12:1, 2) Yumi no mekim laik bilong God sapos sampela taim long laik bilong yumi yet yumi bihainim pasin bilong ol man bilong dispela graun, o sapos yumi givim bel long inapim laik bilong yumi yet, na givim hap bel tasol long mekim wok bilong God. (1 Pita 4:1-3; 1 Jon 2:15, 16) Taim wanpela Juda i askim Jisas long ol samting em i mas mekim bilong kisim laip oltaim, Jisas i tok em i bikpela samting long bihainim stretpela pasin. Tasol bihain em i kamapim wanpela samting i bikpela samting moa: Man i mas kamap disaipel Kristen, olsem man i bihainim Jisas. Dispela samting i mas i stap olsem namba wan samting long laip bilong man. Ol samting bilong skin i mas i stap namba tu.—Matyu 19:16-21.
16. (a) Olgeta Kristen i gat wanem wok bilong Kingdom ol i mas mekim? (b) Olsem ol piksa long pes 116 na 117 i makim, i gat wanem ol gutpela rot bilong mekim wok bilong Kingdom? (c) Pasin bilong yumi long givim bel long mekim dispela wok i kamapim klia wanem samting?
16 Yumi mas kamapim klia gen olsem God i laik bai Jisas i mekim bikpela wok bilong Kingdom bilong God. Em i bin makim Jisas long kamap King. Tasol taim em i stap long graun, em i givim bel long autim tok bilong Kingdom. Yumi tu i gat wankain wok bilong mekim, na i gat as tru na yumi mas givim bel long mekim dispela wok. Taim yumi mekim olsem, yumi soim olsem yumi amamas tru long wok king bilong Jehova na yumi laikim tru ol narapela man. (Matyu 22:36-40) Na yumi soim tu olsem yumi stap wanbel wantaim ol wanlotu bilong yumi long olgeta hap, em olgeta bilong ol i autim tok bilong Kingdom. Long olgeta hap, yumi olgeta wantaim i wok strong long kisim laip oltaim long graun em Kingdom i bosim.
Stori Gen Long Ol Dispela Tok
• Wanem samting long baptais bilong Jisas long wara i wankain olsem baptais long wara long nau? Tasol wanem samting i no wankain?
• Baptais “long nem bilong Papa na bilong Pikinini na bilong Holi Spirit” i makim wanem samting?
• Yumi mas mekim wanem na bai yumi bihainim ol samting olsem baptais bilong Kristen long wara i makim?
[Ol Piksa long pes 116, 117]
SAMPELA ROT BILONG AUTIM TOK BILONG KINGDOM
Long ol haus
Long ol wanblut
Long ol wanwok
Long ol wanskul
Long rot
Go bek lukim ol man i laik harim tok
Long ol Baibel-stadi