Baptais i Makim Wanem Samting?
Bekim Bilong Baibel
Baptais i makim olsem man i mas i go insait olgeta long wara.a Baibel i gat planti stori bilong baptais. (Aposel 2:41) Wanpela baptais em Baibel i stori long en, em bilong Jisas, em i bin kisim baptais long Wara Jordan. (Matyu 3:13, 16) Sampela yia bihain, wanpela man Itiopia i kisim baptais long “wanpela wara” i stap klostu long rot em i raun long en.—Aposel 8:36-40.
Jisas i tok ol disaipel bilong em i mas kisim baptais. (Matyu 28:19, 20) Aposel Pita tu i strongim dispela tok.—1 Pita 3:21.
Long dispela atikol
Baptais i makim wanem samting?
Baptais em samting man i mekim bilong soim long ol narapela olsem em i hevi long ol rong em i bin mekim na em i tanim bel, na em i tok promis long God long mekim laik bilong em. Baptais i makim tu olsem man bai bihainim tok bilong God na Jisas long laip bilong em. Ol manmeri i kisim baptais ol i kirap long bihainim rot God i laik ol i mas bihainim na bai ol i ken i stap oltaim.
Taim man i go insait olgeta long wara, dispela i makim olsem em i lusim pinis olpela pasin bilong em. Long wanem rot? Baibel i tok baptais i olsem man i dai na ol planim em. (Rom 6:4; Kolosi 2:12) Taim man i go insait olgeta long wara, dispela i makim olsem em i lusim pinis, olsem dai, long olpela wokabaut bilong em. Taim em i lusim wara na i kam antap, em i soim olsem em i kirapim nupela laip bilong em olsem wanpela Kristen i dediket pinis.
Baibel i tok wanem long pasin bilong baptaisim ol bebi?
Baibel i no tok ol bebi i mas kisim baptais.b Baibel i tok man i laik kisim baptais, em i mas winim sampela mak.
Olsem, em i mas kliagut long ol bikpela tok bilong Baibel na bihainim ol dispela tok long laip bilong em. Em i hevi long ol rong em i bin mekim na tanim bel. Na long rot bilong beten, em i dediketim laip bilong em long God. (Aposel 2:38, 41; 8:12) Ol bebi i no inap mekim ol dispela samting.
Wanem mining bilong dispela tok, baptais long nem bilong Papa, Pikinini, na holi spirit?
Jisas i tokim ol disaipel bilong em long “go na kamapim ol disaipel . . . , baptaisim ol long nem bilong Papa na bilong Pikinini na bilong holi spirit. Skulim ol long bihainim olgeta samting mi tokim yupela long mekim.” (Matyu 28:19, 20) Dispela hap tok “long nem bilong” i makim olsem man i kisim baptais i luksave long namba na strong bilong Papa na Pikinini, na wok bilong holi spirit bilong God. Olsem: Aposel Pita i tokim wanpela man lek nogut long taim em i bon olsem: “Long nem bilong Jisas Krais dispela Nasarin, yu kirap na wokabaut!” (Aposel 3:6) Em klia—Pita i luksave long namba bilong Krais na taim em i oraitim man em mekim long nem bilong Jisas Krais.
Dispela tok “Papa” i makim Jehovac God. Jehova em Krieta, Man Bilong Givim Laip, na God i Gat Olgeta Strong, olsem na em wanpela tasol i gat bikpela namba moa.—Stat 17:1; Revelesen 4:11.
Dispela tok “Pikinini” i makim Jisas Krais, em i bin givim laip bilong em bilong helpim yumi. (Rom 6:23) God i no inap kisim bek yumi sapos yumi no kliagut na luksave long wok Jisas i mekim bilong inapim ol samting God i tingting pinis long mekim long ol man.—Jon 14:6; 20:31; Aposel 4:8-12.
“Holi spirit” em strong bilong God, o strong bilong em long mekim wok.d God i yusim holi spirit bilong em long wokim, givim laip, givim tok long ol profet na ol narapela, na givim strong long ol long mekim laik bilong em. (Stat 1:2; Jop 33:4; Rom 15:18, 19) God i yusim tu holi spirit long stiaim ol man bilong raitim Baibel long raitim ol tok bilong em.—2 Pita 1:21.
Sapos man i kisim baptais gen, yu ting em i mekim sin?
Planti manmeri i save senisim lotu bilong ol. Tasol olsem wanem sapos ol i bin kisim baptais long olpela lotu bilong ol? Sapos ol i kisim baptais gen, yu ting ol i mekim sin? Sampela bai tok yes, ating ol i tingim tok bilong Efesus 4:5, em i tok: “I gat wanpela Bikpela tasol, na wanpela bilip tasol, na wanpela baptais tasol.” Tasol dispela ves i no makim olsem man i no inap baptais gen. Bilong wanem?
Ol ves i stap klostu. Ol ves i stap klostu long Efesus 4:5 i soim olsem aposel Pol i stori long ol Kristen tru i mas stap wanbel long bilip. (Efesus 4:5, 1-3, 16) Kain pasin wanbel inap kamap sapos ol i bihainim wanpela Bikpela tasol, em Jisas Krais; ol i holim wanpela bilip tasol, o ol i kliagut long ol tok Baibel i mekim; na ol i bihainim ol wankain mak em Baibel i kolim long ol man i laik kisim baptais i mas winim.
Aposel Pol i kirapim sampela Kristen em ol i baptais pinis long kisim baptais gen. Ol i mas mekim olsem bikos taim ol i bin kisim baptais, ol i no kliagut long ol bilip Kristen.—Aposel 19:1-5.
As na man i mas kisim baptais. Man i mas kisim stretpela save long tok i tru bilong Baibel na kisim baptais, long dispela rot God bai orait long em. (1 Timoti 2:3, 4) Sapos man i bilip long ol tok bilong lotu we i pait wantaim ol tok bilong Baibel, na em i kisim baptais, God i no inap orait long baptais bilong em. (Jon 4:23, 24) Ating man i bilip olsem ol samting em i mekim i stret na em i kisim baptais, tasol em “i no gat stretpela save na [em] i mekim olsem.” (Rom 10:2) Bilong God i ken orait long em, em i mas kisim save long tok i tru bilong Baibel, bihainim samting em i lainim, dediketim laip bilong em long God, na kisim baptais gen. Sapos em i mekim olsem na kisim baptais gen, orait em i no mekim sin. Em i mekim samting i stret.
Baibel i stori long ol narapela baptais
Baibel i stori long ol narapela baptais em ol i gat narapela mining long baptais em ol disaipel i bin kisim. Skelim sampela bilong ol.
Baptais em Jon Bilong Baptais i bin mekim.e Jon i baptaisim ol Juda na ol man i bin joinim lotu Juda bilong soim olsem ol i tanim bel long ol sin ol i bin mekim long Lo Bilong Moses—em Lo God i bin givim long lain Israel long rot bilong Moses. Baptais bilong Jon i helpim ol manmeri long luksave na bilip long Mesaia, em Jisas bilong Nasaret.—Luk 1:13-17; 3:2, 3; Aposel 19:4.
Baptais bilong Jisas. Jon Bilong Baptais i baptaisim Jisas, na dispela baptais i narakain. Jisas em i gutpela olgeta na em i no gat sin. (1 Pita 2:21, 22) Olsem na baptais bilong em i no makim olsem em i mas tanim bel o em i mas “askim God long mekim maus bilong bel bilong [em] i stap klin.” (1 Pita 3:21) Nogat, baptais bilong em i soim olsem em i givim em yet long God long mekim laik bilong Em olsem Mesaia, o Krais em Baibel i bin tok profet long en. Dispela i makim tu olsem em i mas givim laip bilong em bilong helpim yumi.—Hibru 10:7-10.
Baptais bilong holi spirit. Jon Bilong Baptais na Jisas Krais i stori long baptaisim man long holi spirit. (Matyu 3:11; Luk 3:16; Aposel 1:1-5) Dispela baptais i no wankain long baptais long nem bilong holi spirit. (Matyu 28:19) Bilong wanem em i narapela kain?
Sampela disaipel bilong Jisas tasol i kisim baptais long holi spirit. God i makim ol long holi spirit bikos em i singautim ol bilong mekim wok king na pris wantaim Krais long heven na bosim graun.f (1 Pita 1:3, 4; Revelesen 5:9, 10) Ol bai bosim planti milion manmeri husat i bihainim Jisas em ol bai kisim laip i stap oltaim long Paradais long graun.—Matyu 5:5; Luk 23:43.
Ol man i bin baptais na pas wantaim Krais Jisas na pas wantaim em long dai bilong em. Ol man i baptais long holi spirit, ol tu i “baptais na . . . pas wantaim Krais Jisas.” (Rom 6:3) Olsem na dispela baptais em i bilong ol man i bihainim Jisas em God i bin makim ol long holi spirit na ol bai mekim wok king wantaim Jisas long heven. Taim ol i kisim baptais na pas wantaim Jisas, ol i insait long lain God i bin makim. Em i stap olsem het na ol i stap olsem bodi.—1 Korin 12:12, 13, 27; Kolosi 1:18.
Na tu, ol Kristen God i bin makim, ol i “baptais bai [ol] inap pas wantaim [Jisas] long dai bilong em.” (Rom 6:3, 4) Wankain olsem Jisas, ol i bihainim tok bilong God na ol i daunim laik bilong ol yet, na olsem Jisas, ol i save ol bai i no stap oltaim long graun. Taim ol i dai na kirap bek na kisim laip long heven olsem ol spirit, i olsem ol i pinisim baptais bilong ol na pas wantaim Jisas long dai bilong em.—Rom 6:5; 1 Korin 15:42-44.
Baptais long paia. Jon Bilong Baptais i tokim lain i harim tok bilong em: “Dispela man [Jisas] bai baptaisim yupela long holi spirit na long paia. Long han bilong em, em i holim savol bilong rausim pipia long wit, na em bai klinim gut floa bilong em we ol i krungutim wit. Na em bai bungim ol wit bilong em na putim long bakstua. Tasol em bai kukim ol pipia bilong wit long paia i no save dai.” (Matyu 3:11, 12) Tingim olsem baptais long paia na baptais long holi spirit i no wankain. Wanem mining bilong dispela tok piksa?
Wit i makim ol man em ol i harim tok bilong Jisas na bihainim tok bilong em. Ol bai kisim baptais long holi spirit. Ol pipia bilong wit i makim ol man i no harim tok bilong Jisas. Ol bai kisim baptais bilong paia, dispela i makim olsem ol bai bagarap na pinis olgeta.—Matyu 3:7-12; Luk 3:16, 17.
a Wanpela buk (Vine’s Complete Expository Dictionary of Old and New Testament Words) i tok olsem tok Grik ol i tanim olsem “baptais” i makim olsem “man i go insait olgeta long wara, em i stap insait long wara, na em i lusim wara na i kam antap.”
b Pasin bilong baptaisim ol bebi em wanpela pasin sampela lotu i save bihainim we ol i save givim nem long bebi na bihain baptaisim em long rot bilong tromoi liklik liklik wara long het bilong em o kapsaitim wara long het bilong em.
c Jehova em i nem bilong God. (Buk Song 83:18) Lukim atikol “Jehova Em i Husat?”
d Lukim atikol “Holi Spirit Em Wanem Samting?”
e Lukim atikol “Jon Bilong Baptais Em Husat?”
f Lukim atikol “Husat Bai Go Long Heven?”
g Baibel i yusim tu dispela tok “baptais” bilong stori long pasin bilong wasim ol samting bilong yusim long lotu, kain olsem wasim ol kap na sospen samting. (Mak 7:4; Hibru 9:10) Dispela i no wankain long baptais em Jisas na ol man i bihainim em i bin kisim.