I Gat Taim Bilong Kamapim Ol Tok i Stap Hait

Pasin bilong larim wanpela tok i stap hait na yumi no kamapim, em inap mekim na pasin wanbel i kamap na i daunim kros. Tasol olsem wanem? I gat taim bilong kamapim ol tok i stap hait? Tingim tok profet Amos i mekim long God bilong em, em i tok: “Olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” (Amos 3:⁠7) Long dispela tok yumi ken kisim sampela save long pasin bilong larim wanpela tok i stap hait na yumi no kamapim long narapela. Sampela taim Jehova i save haitim sampela samting i go i go na bihain em i save kamapim long sampela man. Olsem wanem yumi inap bihainim pasin bilong Jehova long dispela samting?

Long sampela taim, ol wasman insait long kongrigesen Kristen i lukim olsem i gutpela long larim wanpela tok i stap hait. (Aposel 20:28) Ol i tingim kongrigesen i mas i stap gut, olsem na ol i no tokaut long sampela samting ol i stretim o sampela senis long ol wok insait long kongrigesen inap long taim i stret na ol i tokaut long en.

Tasol long kain taim olsem, em i gutpela long ol wasman bilong kongrigesen i tokim husat i insait long dispela long wanem taim na long wanem rot stret ol bai kamapim dispela samting i stap hait. Taim ol i save long wanem taim stret ol elda bai tokaut, dispela bai helpim ol na bai ol i no kamapim ol tok i stap hait.​​—⁠Sindaun 25:⁠9.