“Yu Gutpela Meri”

Wanpela man i mekim dispela gutpela tok long wanpela yangpela meri Moap. Em i wanpela meri wanpis, nem bilong em Rut, na em i tambu bilong wanpela meri Israel, em Naomi. Rut i bin stap long Israel inap 3000 yia i go pinis, long dispela taim ol hetman i bin bosim Israel na Rut i kisim nem olsem gutpela meri. (Rut 3:​11) Olsem wanem em i kisim gutpela nem olsem? Na gutpela pasin bilong em inap helpim husat?

Rut ‘i no save les, nogat.’ Em i wok long moningtaim yet i go inap long apinun na em i wok strong long bungim ol het bali long gaden. Pasin bilong em long wok strong i mekim na em i kisim gutpela nem. Maski papa bilong gaden i tokim ol wokman long mekim ol samting bilong helpim Rut, em i wok strong yet long mekim wok i go. Dispela gutpela pasin bilong em i stret tru wantaim tok bilong Baibel i stori long meri marit i save wok strong na i mekim gut ol wok bilong em na i stret ol i givim biknem long em.​​—⁠Sindaun 31:​10-​31; Rut 2:​7, 15-​17.

Pasin bilong Rut long kamapim ol gutpela pasin bilong spirit​​—⁠olsem daunim em yet na tingim ol narapela na laikim tru narapela​​—⁠ol dispela pasin i as na ol manmeri i litimapim nem bilong em. Em i bin lusim papamama na ples bilong em na i olsem em i no gat rot long marit gen na painim gutpela sindaun, olsem na em i pas gut wantaim Naomi. Na tu Rut i kamapim olsem em i laik lotuim Jehova, em God bilong tambu meri bilong em. Bilong kamapim olsem Rut em i gutpela meri tru, stori bilong em long Baibel i tok: ‘Sapos Naomi i bin i gat 7-pela pikinini man, em i no inap laikim ol olsem em i save laikim dispela tambu meri bilong em.’​​—⁠Rut 1:​16, 17; 2:​11, 12; 4:​15.

Tru ol man i litimapim gutpela pasin bilong Rut, tasol wanpela samting i bikpela moa, em God i skelim ol gutpela pasin bilong em na God i givim gutpela samting tru long em, em long kamap tumbuna bilong Jisas Krais. (Matyu 1:5; 1 Pita 3:⁠4) Em i no stap gutpela piksa bilong ol meri Kristen tasol, em i stap gutpela piksa tu bilong olgeta manmeri i tok ol i lotuim Jehova!