Pisin Stok i Lainim Yumi
“OLKAIN bikpela [“stok,” NW] na liklik pisin i save long taim bilong kam i stap long wanpela hap na long taim bilong lusim dispela hap gen. Tasol ol manmeri bilong mi i no save tingting long ol lo bilong mi, Bikpela.” (Jeremaia 8:7) Jeremaia i mekim dispela tok taim em i tokaut long kot Jehova bai mekim long lain Juda ol i lusim pinis God bilong ol Jehova, na kirap lotuim ol giaman god bilong ol narapela ples. (Jeremaia 7:18, 31) Bilong wanem Jeremaia i stori long pisin stok bilong skulim ol bikhet Juda?
Ol Israel i save lukim waitpela stok planti taim long hap bilong ol, taim em i flai na painim ples i hat. Long tok Hibru mining bilong nem bilong dispela bikpela pisin i gat longpela lek na i save wokabaut long wara em olsem, “stap gut long narapela; mekim gutpela pasin sori.” Dispela nem i stret long em, long wanem, stok i save pas wantaim poro bilong em inap laip olgeta, tasol dispela i no pasin bilong planti narapela pisin. Long taim bilong kol ol i save go long ples i hat liklik, na planti i save kam bek long olgeta yia, na planti taim ol i kam bek long haus bipo ol i bin stap long en.
I gat sampela pasin i narapela kain em stok i save mekim na dispela i kamapim pasin bilong em long stap gut long narapela. Man na meri pisin wantaim i save sindaun antap long kiau na tupela wantaim i save givim kaikai long ol nupela pikinini. Buk Our Magnificent Wildlife i tok: “Taim ol stok i kamap papamama, ol i bihainim moa yet pasin bilong i stap gut long narapela. Wanpela papa stok long Jemani i bin flai long pawa lain na i dai. Meri bilong em i wok long sindaun antap long ol kiau inap 3-pela de, na insait long dispela hap taim em i lusim ol kiau inap sotpela taim tasol bilong painim sampela kaikai. . . . Narapela stori i olsem: Ol i sutim wanpela mama stok, na long dispela taim papa yet i mekim bikpela long ol pikinini.”
Tru tumas, taim stok i bihainim save God i putim long skin bilong em na i stap gut long poroman bilong em inap laip olgeta na i lukautim gut ol pikinini, em i truim mining bilong nem bilong em—“stap gut long narapela.” Ol stok i stap olsem gutpela piksa bilong lainim ol Israel i no stap gut long God na i bikhet.
Long nau planti manmeri i pilim olsem pasin bilong i stap gut long narapela em samting bilong bipo tasol—ol i ting em i gutpela samting tasol i no inap wok gut. Pasin bilong katim marit, lusim ol wok samting ol i mas mekim, pasin stil, na ol narapela pasin giaman i wok long go bikpela, na dispela i soim olsem ol man i no ting pasin bilong i stap gut long ol narapela i bikpela samting. Tasol Baibel i tok, taim pasin sori na pasin bilong mekim gut long narapela i kirapim yumi long i stap gut long narapela, em i gutpela tru. Baibel i kirapim ol Kristen long “kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” (Efesus 4:24) Yes, taim yumi kamap olsem ol nupela manmeri, dispela bai helpim yumi long i stap gut long ol narapela, tasol stok tu, inap lainim yumi long dispela pasin.