Olsem Wanem Pasin Bilong Tingting Gut Inap Lukautim Yu?

TRAIPELA biksi em i samting yumi amamas long lukim, tasol long ol boskru bilong sip, em i makim taim nogut. Laip bilong ol inap lus long dispela traipela si.

Olsem tasol ol bikpela hevi inap painim ol wokboi bilong God na i laik daunim ol. Ating yu luksave pinis olsem planti hevi na traim i save painim ol Kristen, olsem si i wok long bruk i kam. Yu laik tru long sanap strong na winim ol dispela hevi na traim, na yu no laik bagarap long ol samting bilong spirit olsem sip i bagarap long rip. (1 Timoti 1:​19) Pasin bilong tingting gut em wanpela bikpela samting bilong helpim yu long mekim olsem. Orait yu inap kisim dispela pasin olsem wanem?

Tok Hibru ol i tanim olsem “pasin bilong tingting gut” (mezim·mahʹ ), ol i kisim long wanpela tok i makim pasin bilong “tingim gut na skelim ol samting.” (Sindaun 1:⁠4) Olsem na long sampela Baibel ol i tanim dispela tok mezim·mahʹ olsem “gutpela tingting” o “save long ol samting inap kamap.” Ol saveman bilong Baibel, Jamieson, Fausset, na Brown, ol i tok mezim·mahʹ i makim pasin bilong “wokim gut tingting long abrusim ol hevi na painim gutpela samting.” Dispela i makim olsem man i mas skelim gut olsem pasin em i mekim bai kamapim wanem ol samting long nau na long bihain tu. Pasin bilong tingting gut bai helpim yumi long skelim gut pastaim ol samting yumi laik mekim, na taim yumi mas mekim ol bikpela samting.

Sapos man i gat pasin bilong tingting gut taim em i skelim ol samting em i laik mekim long bihain o ol samting i painim em long nau, pastaim em i save skelim ol hevi inap kamap long dispela. Taim em i save pinis long wanem ol hevi inap kamap, em bai tingim rot bilong abrusim ol dispela hevi, na em i mas tingim ol samting ol poroman bilong em na sindaun bilong em inap mekim long em. Nau em inap makim rot em i mas bihainim na bai hevi i no ken painim em, na em inap kisim ol gutpela blesing i kam long God. Orait nau yumi ken skelim sampela samting em pasin bilong tingting gut inap helpim yumi long en.

Abrusim Pasin Pamuk

Taim win i sakim strong biksi i go long nus bilong sip, ol i kolim dispela olsem si i kam long poret. Dispela kain si inap kapsaitim sip sapos ol boskru i no stiaim gut sip i go stret long biksi.

Wankain hevi i painim yumi long nau. Yumi stap namel long ol manmeri i tingting strong long ol samting bilong maritpasin, na long olgeta de yumi harim ol tok o lukim ol samting i stori long maritpasin. Yumi mas save, ol dispela samting yumi lukim o harim inap kirapim laik i stap long skin bilong yumi long mekim maritpasin. Yumi mas bihainim pasin bilong tingting gut na sakim strong ol traim, nogut yumi drip i go na bagarap i painim yumi.

Olsem: Planti man Kristen i wok wantaim ol man em ol i no gat rispek long ol meri, na ol i tingim ol meri olsem ol i samting bilong inapim tasol laik bilong ol long mekim maritpasin. Ating long toktok bilong ol, ol wanwok i tromoi sampela tok pilai nogut na ol tok bokis bilong maritpasin. Dispela pasin inap putim ol tingting bilong pasin pamuk long tingting bilong wanpela Kristen.

Sampela taim meri Kristen tu i mas mekim wok mani, olsem na em tu inap bungim ol hevi. Ating em i wok wantaim ol man na meri em ol i no bihainim stretpela pasin olsem em i bihainim. Ating wanpela man wanwok i laikim em. Ating pastaim em i mekim gut tru long meri Kristen na em i rispek long bilip bilong em. Pasin bilong dispela man long strong long mekim gut long meri Kristen na stap klostu oltaim wantaim em, dispela inap kirapim laik bilong meri Kristen long pas gut moa wantaim em.

Olsem wanem pasin bilong tingting gut inap helpim yumi ol Kristen taim kain samting olsem i kamap? Namba wan samting, em inap helpim yumi long luksave long ol bagarap inap painim yumi long ol samting bilong spirit. Na namba tu samting, em inap kirapim yumi long tingim gut na makim stretpela pasin yumi mas bihainim. (Sindaun 3:​21-​23) Taim ol kain samting olsem i kamap, yumi mas kamapim klia long ol wanwok olsem pasin yumi bihainim i narapela kain, long wanem, Baibel i as bilong ol bilip bilong yumi. (1 Korin 6:​18) Toktok na pasin yumi mekim inap strongim dispela samting. Na tu, yumi no ken bung tumas wantaim sampela wanwok.

Ol samting i kirapim man long mekim pasin pamuk i no save kamap long ples wok tasol, nogat. Ol dispela samting inap kamap sapos tupela marit i larim ol hevi i bagarapim pasin bilong ol long i stap wanbel. Wanpela wasman bilong raun i tok: “I no olsem wantu tasol marit i save bagarap, nogat. Ating isi isi tupela marit i lusim pasin bilong pas gut wantaim, na narapela i no toktok tumas long narapela o lusim hap taim bilong i stap wantaim. Ol i pilim olsem marit bilong ol i no gat as bilong en, olsem na ating ol i wok long painim ol samting bilong skin bilong inapim laik bilong ol. Narapela i no save mekim ol tok amamas long narapela, olsem na man marit inap kirap laikim narapela meri na meri marit bai laikim narapela man.”

Dispela wasman bilong raun i tok moa: “Oltaim ol marit i mas sindaun wantaim na skelim marit bilong ol, nogut i gat wanpela samting i wok long bagarapim pasin bilong ol long pas gut wantaim. Ol i mas tingim gut rot bilong mekim ol samting wantaim, olsem stadi, beten na autim tok. Marit bilong ol bai stap gut sapos narapela i toktok gut wantaim narapela long taim ol i ‘stap long haus, wokabaut long rot, malolo, na wok,’ olsem ol papamama na ol pikinini i save mekim.”​​—⁠Lo 6:​7-9.

Ol Pasin i No Stret Long Kristen i Mekim

Pasin bilong tingting gut inap helpim yumi taim samting i laik traim stretpela pasin bilong yumi, na tu, em inap helpim yumi long karim ol hevi i kamap namel long yumi na ol wanlain Kristen. Sampela taim win i sakim biksi i go long baksait bilong sip, na dispela biksi inap apim baksait bilong sip na tanim i go na si i paitim sip long sait bilong en. Dispela bai mekim na i isi tru long si i kapsaitim sip.

Bagarap inap painim yumi tu long wanpela rot yumi no bin tingim. Yumi “wok gut wantaim” planti gutpela brata sista Kristen long mekim wok bilong Jehova. (Sefanaia 3:⁠9, NW ) Sapos wanpela bilong ol i mekim pasin i no stret long Kristen i mekim, dispela inap bagarapim pasin bilong yumi long bilip long em, na ating yumi inap bel hevi tru. Olsem wanem pasin bilong tingting gut inap helpim yumi na bai dispela samting i no ken pundaunim yumi na mekim yumi i bel hevi tumas?

Yumi save, “olgeta manmeri i save mekim sin.” (1 King 8:46) Olsem na yumi no ken kirap nogut sapos wan wan taim wanpela brata Kristen i mekim samting i kirapim yumi long kros o i bagarapim bel bilong yumi. Taim yumi save long dispela samting, yumi inap redi na tingting long rot bilong karim dispela hevi. Aposel Pol i bin mekim wanem taim sampela brata Kristen i toktok long em olsem em i samting nating na ol i mekim tok i bagarapim tru bel bilong em? Em i no larim dispela samting i pundaunim em, nogat; em i ting i bikpela samting moa long Jehova i orait long em. (2 Korin 10:​10-18) Kain tingting olsem bai helpim yumi na bai yumi no hariap long kros taim wanpela i bagarapim bel bilong yumi.

Dispela i kain olsem samting i save kamap taim yumi bamim lek bilong yumi. Ating inap wanpela o tupela minit samting, yumi no inap tingting gut. Tasol taim pen long lek i pinis, em nau, yumi inap skelim gut ol samting. Olsem tasol, yumi no ken kirap kwik long mekim sampela samting taim narapela i mekim tok o pasin i no stret. I gutpela long wet pastaim na skelim ol hevi inap kamap sapos yumi no tingting gut na wantu yumi kirap na bekim rong.

Malcolm, em i save mekim wok misineri inap planti yia pinis, em i stori long samting em i save mekim taim narapela i bagarapim bel bilong em. Em i tok: “Namba wan samting mi save mekim em long skelim sampela askim, olsem: Mi kros long dispela brata, long wanem, pasin bilong mipela i narapela narapela? Tok em i mekim i bikpela samting? Samting sik malaria i mekim long skin bilong mi i kirapim mi long kisim kain tingting olsem? Bihain liklik, tingting bilong mi bai senis?” Malcolm i lukim olsem planti taim dispela hevi i no bikpela samting na em inap lusim tingting long en.a

Malcolm i tok moa: “Sampela taim, maski mi wok strong long stretim wanpela hevi, brata i save birua yet long mi. Mi wok strong na bai dispela samting i no ken bagarapim bel bilong mi. Taim mi mekim pinis olgeta samting mi inap mekim, mi kisim narapela tingting long dispela hevi. Mi tingim dispela hevi olsem isi isi em bai pinis, na i no olsem nau yet mi mas stretim. Mi no inap larim dispela hevi i bagarapim mi long ol samting bilong spirit, na bagarapim pasin bilong mi long pas gut wantaim Jehova na ol brata bilong mi.”

Olsem Malcolm, yumi no ken larim pasin kranki bilong wanpela man i daunim tru yumi. Long olgeta kongrigesen i gat planti gutpela brata sista. Yumi amamas long “wok wantaim” ol long bihainim pasin Kristen. (Filipai 1:​27) Taim yumi tingim olsem Papa bilong yumi long heven i save helpim yumi, dispela tu bai helpim yumi long kisim stretpela tingting long ol samting.​​—⁠Song 23:​1-3; Sindaun 5:​1, 2; 8:​12.

No Ken Laikim Ol Samting Bilong Graun

Pasin bilong tingting gut inap helpim yumi long winim narapela traim i no stap ples klia. Taim win i sakim biksi i go long sait bilong sip, ol i kolim dispela olsem si i kam long sait. Long taim i no gat win ren samting, isi isi kain si olsem inap subim sip i go bihainim narapela rot. Tasol long taim bilong bikpela win ren, kain si olsem inap kapsaitim sip.

Olsem tasol, sapos yumi bihainim laik bilong bungim ol mani kago samting bilong dispela graun nogut, dispela pasin inap subim yumi i go lusim rot na bai yumi no tingim moa ol samting bilong spirit. (2 Timoti 4:10) Sapos yumi no sakim dispela pasin, isi isi em inap mekim na bai yumi lusim rot Kristen. (1 Jon 2:15) Olsem wanem pasin bilong tingting gut inap helpim yumi taim kain samting olsem i kamap?

Namba wan samting, em bai helpim yumi long skelim wanem ol hevi inap painim yumi. Ol lain bilong dispela graun i save mekim wok long olkain pasin trik bilong pulim yumi. Oltaim ol i wok strong long kirapim ol man long ting olsem ol i mas bihainim wankain pasin long sindaun bilong ol olsem ol maniman na ol man i gat biknem na namba. (1 Jon 2:16) Ol i tok promis long yumi olsem ol wanlain na pren bai amamas na orait long yumi sapos yumi bihainim ol kain pasin olsem. Tasol pasin bilong tingting gut bai helpim yumi long daunim dispela kain tingting, na helpim yumi long tingim olsem em i bikpela samting long yumi “no ken bihainim pasin bilong mangal long mani,” long wanem, Jehova i tok promis olsem ‘em i no inap lusim yumi.’​—⁠Hibru 13:⁠5.

Namba tu samting, em pasin bilong tingting gut bai pasim yumi long bihainim ol man em ol i “lusim pinis rot bilong tok tru.” (2 Timoti 2:18) I hatwok tru long sakim ol man em pastaim yumi bin laikim ol na bilip long ol. (1 Korin 15:​12, 32-34) Maski sapos yumi bin bung sotpela taim tasol wantaim ol man em ol i lusim pinis rot Kristen, dispela inap pasim yumi long kamap strong long ol samting bilong spirit na isi isi bagarap inap painim yumi. Bai yumi stap kain olsem wanpela sip i drip i go na lusim rot liklik tasol. Tasol taim sip i drip i go longpela hap pinis, ating em bai i stap longwe tru long hap stret em i mas i go long en.​—⁠Hibru 3:⁠12.

Pasin bilong tingting gut bai helpim yumi long save yumi stap olsem wanem long ol samting bilong spirit long nau, na bai yumi stap olsem wanem long bihain. Ating yumi luksave olsem yumi mas wok strong moa long mekim ol wok Kristen. (Hibru 6:​11, 12) Tingim stori bilong wanpela yangpela Witnes i bihainim pasin bilong tingting gut na dispela i helpim em long winim ol mak bilong spirit. Em i tok: “Rot i op long mi inap mekim wok olsem wanpela niusman. Mi gat laik tru long mekim dispela wok, tasol mi tingim dispela ves long Baibel i tok ‘dispela graun bai i pinis’ tasol ‘man i bihainim tok bilong God, em bai i stap oltaim.’ (1 Jon 2:17) Mi tingting olsem ol samting mi mekim long i stap bilong mi i mas kamapim klia ol bilip bilong mi. Papamama bilong mi ol i lusim pinis bilip Kristen, na mi no laik bihainim pasin bilong ol. Mi tingting strong long mekim i stap bilong mi i gat as bilong en, na mi insait long wok fultaim bilong autim tok olsem wanpela painia oltaim. Nau mi mekim dispela wok inap 4-pela yia pinis, na mi save olsem mi bin makim stretpela rot.”

Winim Bikpela Win Ren Bilong Spirit

Bilong wanem em i bikpela samting long yumi mas bihainim pasin bilong tingting gut long nau? Ol boskru bilong sip i mas was i stap long ol mak bilong taim nogut, olsem long taim bikpela win ren i laik kamap. Sapos wantu tasol ples i kol na win i kamap strong, ol i save daunim ol pos bilong pasim sel na redi long bungim taim nogut. Olsem tasol, yumi tu i mas redi long karim ol bikpela hevi i kamap nau long taim pasin nogut bilong dispela graun i laik pinis. Stretpela pasin bilong ol man i wok long pinis, na pasin bilong ol man nogut “i kamap nogut tru.” (2 Timoti 3:13) Ol boskru bilong sip ol i save putim yau oltaim long ol toksave bilong win ren samting, na olsem tasol yumi tu i mas putim yau long ol toksave i kam long rot bilong ol tok profet bilong Baibel.​​—⁠Song 19:​7-11.

Taim yumi bihainim pasin bilong tingting gut, yumi bihainim save i bringim yumi long laip oltaim. (Jon 17:⁠3) Yumi ken save long ol hevi bai kamap na skelim gut rot bilong winim ol dispela hevi. Olsem na bai yumi tingting strong long yumi no ken larim wanpela samting i pulim yumi long lusim rot Kristen, na taim yumi putim na winim ol mak long ol samting bilong spirit, yumi inap ‘bungim planti samting bilong helpim yumi bihain.’​​—⁠1 Timoti 6:​19.

Sapos yumi holimpas gutpela tingting na pasin bilong tingting gut, yumi no ken pret long “taim nogut i kamap.” (Sindaun 3:​21, 25, 26) Tok promis bilong God bai mekim gut bel bilong yumi, em i tok: “Bai yu kisim planti gutpela tingting na bai yu belgut long gutpela save bilong yu. Pasin bilong tingting gut bai i banisim yu.”​—⁠Sindaun 2:​10, 11.

[Futnot]

[Piksa long pes 23]

Sapos long olgeta taim ol marit i toktok gut wantaim, dispela bai strongim marit