“Em i Bringim Mi i Go Long Ol Liklik Wara”
LONG ol ples hat bilong Palestain, ol sipsip i mas dring wara long olgeta de. Olsem na bikpela wok bilong wasman bilong sipsip em long givim wara long ol sipsip bilong em. Sampela taim ol wasman i kisim wara long wanpela hul wara na kapsaitim i go long baret ston samting bambai ol sipsip i ken dring. (Stat 29:1-3) Long taim bilong ren, ol ples klostu long ol liklik na bikpela wara ol i gutpela ples bilong “malolo.”—Song 23:2.
Wanpela gutpela wasman i mas save long ol ples em inap painim wara bilong ol sipsip i ken dring na gutpela gras bilong ol sipsip i ken kaikai. Sapos wasman i save gut long ples bilong em, dispela inap helpim ol sipsip long i stap laip. Devit, em man i bin lukautim ol sipsip long ol maunten bilong Judia inap planti yia, em i skelim pasin bilong God long soim rot long lain bilong em long ol samting bilong spirit wantaim pasin bilong wasman long bringim ol sipsip i go long gutpela gras na wara. Devit i tok: “Em i bringim mi i go long ol liklik wara.”—Song 23:1-3.
Planti yia bihain, long rot bilong profet Esekiel, Jehova i mekim wok long wankain tok piksa. Em i tok promis long bungim ol manmeri bilong em i stap nabaut long ol narapela kantri, olsem wasman i bungim ol sipsip. Em i tokim ol olsem: “Bai mi . . . bringim ol i kam long kantri Israel, em graun bilong ol yet. Na bai ol i ken i stap gut oltaim long ol maunten na klostu long ol wara.”—Esekiel 34:13.
Na tu, God Jehova i gat bikpela laik long givim wara bilong spirit. Buk Kamapim Tok Hait i stori long wanpela “wara bilong givim laip” i kamap long sia king bilong God. (KTH 22:1) Singaut bilong dring long dispela wara i go long olgeta manmeri. “Man i laik dring, em i mas kam na kisim wara bilong givim laip, em i olsem presen bilong God.”—KTH 22:17.
Dispela wara i piksa bilong ol samting God i bin stretim bilong ol man i ken kisim laip oltaim oltaim. Olgeta man inap dring long dispela wara long rot bilong kisim ‘save long God tru na long Jisas Krais, em i bin salim i kam.’—Jon 17:3.