Askim

• Dispela tok “sta bilong moning,” long Aisaia 14:​12, i makim husat?

Aisaia 14:12 i tok: “Yu bin i stap olsem sta bilong moning i lait antap long skai. Tasol nau yu pundaun pinis.” Sampela man i ting dispela ves i toktok long Satan.

Orait yumi laik save, husat dispela “sta bilong moning” em dispela ves i toktok long en? Dispela tok “sta bilong moning” em hap bilong wanpela “song i gat tok bilas long king bilong Babilon” long en, em Aisaia i tok profet long ol Israel bai singim. Olsem na dispela tok em i hap bilong wanpela tok i go long lain king bilong Babilon. Yumi ken save dispela tok “sta bilong moning” i go long wanpela man, na i no long wanpela spirit, long wanem, narapela ves i tok: “Bai yu go daunbilo tru long ples bilong ol man i dai pinis.” Ples bilong ol man i dai pinis, em matmat tasol​—⁠em i no wanpela ples Satan i stap long en, nogat. Na tu, ol man i lukim “sta bilong moning” i go long dispela ples, ol i askim olsem: “Ating dispela man tasol i bin mekim graun i guria?” Em nau, “sta bilong moning” i makim wanpela man​—⁠em i no makim wanpela spirit.​​—⁠Aisaia 14:​4, 15, 16.

I gat wanem as na dispela tok i go long lain king bilong Babilon? Yumi mas save, dispela tok “sta bilong moning” em i go long king bilong Babilon bihain long taim em i pundaun na i bilong tok bilas long em. (Aisaia 14:⁠3) Pasin hambak i bin kirapim ol king bilong Babilon long putim ol yet i go antap tru long ol narapela king. Dispela lain king i hambak tru, na i olsem em i tok: “Bai mi abrusim ol sta na i go antap tru long heven. Na bai mi putim sia king bilong mi antap tru long ol sta bilong God. Na tu bai mi sindaun antap tru long dispela maunten long hap not ol . . . i save kam bung long en. . . . Bai mi stap olsem God Antap Tru.”​​—⁠Aisaia 14:​13, 14.

“Ol sta bilong God” ol i king long lain bilong Devit. (Namba 24:​17, NW ) Kirap long Devit i kam, ol dispela “sta” i sindaun long maunten Saion na mekim wok king. Taim Solomon i wokim pinis tempel long taun Jerusalem, ol i putim dispela nem Saion long taun olgeta. Aninit long kontrak bilong Lo, olgeta man Israel i mas go long Saion 3-pela taim long yia. Olsem na Saion i kamap olsem ‘maunten bilong bung long en.’ Taim Nebukatnesar i tingting strong long daunim ol king bilong Juda na rausim ol na bai ol i no ken i stap moa long dispela maunten, i olsem em i tokaut em i laik putim em yet antap long ol dispela “sta.” Taim em i daunim ol dispela king Juda, em i no tok em i bin mekim long strong bilong Jehova, nogat. Long pasin hambak em i mekim olsem em i kisim ples bilong Jehova. Olsem na taim lain king bilong Babilon i pundaun pinis, Baibel i tok bilas na kolim em “sta bilong moning i lait antap long skai.”

Tru, hambak pasin bilong ol king bilong Baibel i kamapim tingting bilong “god bilong dispela graun”​​—⁠em Satan. (2 Korin 4:⁠4) Em tu i laik kisim bikpela namba na putim em yet i stap antap tru, winim God Jehova. Tasol dispela tok “sta bilong moning” em i no wanpela nem Baibel i givim long Satan.

• I gat wanem as na 1 Stori 2:​13-​15 i tok Devit em i namba 7 pikinini bilong Jesi, tasol tok bilong 1 Samuel 16:​6-11 i makim olsem em i namba 8 pikinini?

Taim King Sol bilong Israel i lusim pinis lotu i tru, God Jehova i salim profet Samuel bilong i go makim wanpela pikinini bilong Jesi i kamap king. Stori bilong dispela samting em Samuel i bin raitim long 1078 B.C.E. samting, i makim olsem Devit i namba 8 pikinini man bilong Jesi. (1 Samuel 16:​10-​13) Tasol stori pris Esra i raitim 600 yia bihain, i tok: “Jesi i gat 7-pela pikinini man. Namba wan em Eliap na namba 2 em Abinadap na namba 3 em Simea, narapela nem bilong en Sama. Namba 4 em Netanel na namba 5 em Radai. Namba 6 em Osem na namba 7 em Devit.” (1 Stori 2:​13-​15) Wanem samting i bin painim wanpela brata bilong Devit, na i gat wanem as na Esra i no kolim nem bilong em?

Baibel i tok Jesi “i gat 8-pela pikinini man.” (1 Samuel 17:12) I luk olsem wanpela pikinini i dai na em i no bin marit na i no gat pikinini. Em i no gat pikinini, olsem na em i no inap kisim hap graun bilong papa bilong em na i no gat as na nem bilong em i mas stap long lista bilong ol tumbuna bilong Jesi.

Orait nau yumi ken tingim taim bilong Esra. Tingim ol samting i bin kamap taim em i raitim Buk Stori. Seventi seven yia paslain, ol Juda i bin lusim kalabus long Babilon, na nau ol i sindaun gen long graun bilong ol. King bilong Persia i bin givim namba long Esra long makim ol jas na ol tisa bilong skulim ol man long lo bilong God na long bilasim gut haus bilong Jehova. Ol Israel i mas i gat lista i kamapim stret nem bilong ol tumbuna bambai ol i ken lukim lista na save long graun bilong ol wan wan lain, na bai ol man i gat namba long mekim wok pris ol tasol i ken holim dispela wok. Olsem na Esra i raitim stori bilong olgeta samting i bin painim lain Israel, na tu, wanpela lista i stret na i kolim klia ol tumbuna bilong lain Juda na bilong Devit. Dispela pikinini bilong Jesi i dai na i no gat pikinini, nem bilong em i no inap helpim wok bilong dispela lista. Olsem na long dispela as Esra i no putim nem bilong em.