Go Klostu Long God
“Mi Save Lukim Tingting na Laik Bilong Man”
LUKLUK bilong man inap giamanim yumi. Samting yumi lukim long wanpela man, dispela i no save kamapim klia ol tingting i stap insait tru long bel bilong em. Ol man i save skelim man long ol samting ol i lukim long ai. Tasol yumi amamas olsem Jehova i save lukim tingting na laik tru bilong man. Dispela i kamap ples klia long tok i stap long 1 Samuel 16:1-12.
Piksaim dispela samting long tingting. Jehova i laik makim wanpela nupela king bilong bosim lain Israel. God i tokim profet Samuel: “Mi laik bai yu . . . go lukim Jesi, wanpela man bilong taun Betlehem, long wanem, mi bin makim wanpela bilong ol pikinini man bilong en long kamap king.” (Ves 1) Jehova i no kolim nem, tasol em i tok dispela man Em i makim em i wanpela pikinini man bilong Jesi. Taim Samuel i wokabaut i go long Betlehem, ating em i wok long tingting, ‘Olsem wanem bai mi save long wanem pikinini man bilong Jesi em Jehova i bin makim?’
Taim Samuel i kamap long Betlehem, em i stretim ol samting bambai em i ken kaikai ofa wantaim Jesi na ol pikinini man bilong em. Taim Eliap, namba wan pikinini man i kam insait, wantu Samuel i kirap nogut long naispela pes bilong em. Samuel i ting olsem lukluk bilong Eliap na longpela bilong em i stret long wanpela king, na Samuel i toktok long em yet: “Ating dispela man tasol, Bikpela i makim em pinis long kamap king.”—Ves 6.
Tasol Jehova i lukluk long narapela samting. Em i tokim Samuel: “Yu no ken ting long em i longpela bun o long em i luk naispela na bai mi makim em. Nogat. Mi no laik bai dispela man i kamap king.” (Ves 7) Jehova i no tingim longpela o naispela pes bilong Eliap, nogat. Em i save lukim tingting na bel we i gat ol gutpela samting i stap.
Jehova i tokim Samuel: “Mi no save skelim ol man olsem ol man i save skelim. Nogat. Ol man i save lukluk long bodi. Tasol mi save lukim tingting na laik bilong man na mi skelim ol.” (Ves 7) Yes, em i lukim bel—olsem pasin tru, tingting, na filings bilong man—dispela i bikpela samting long Jehova. Man bilong “painimaut” ol samting long bel, Em i sakim Eliap, na tu, em i sakim ol arapela sikspela pikinini man bilong Jesi em ol i kam sanap long ai bilong Samuel.—Sindaun 17:3.
Jesi i gat wanpela pikinini man moa, Devit, em i laspela pikinini husat “i wok long lukautim ol sipsip.” (Ves 11) Olsem na ol i salim tok i go long Devit na em i kam long Samuel. Orait, Jehova i tokim Samuel: “Em dispela man tasol. Kisim wel bilong makim king na putim long em.” (Ves 12) Tru, Devit “em i yangpela man na pes bilong en i naispela moa na ai bilong en i lait tumas na skin bilong en i gutpela tru.” Tasol laik na tingting i stap long bel bilong em, dispela i mekim em i gutpela man tru long ai bilong God.—1 Samuel 13:14.
Nau long dispela graun ol man i save tingim tumas gutpela skin, tasol yumi stap bel isi, long wanem, yumi save olsem God Jehova i no tingim naispela skin na makim man, nogat. Maski yu longpela man o ol narapela i ting yu gat naispela pes, dispela i no bikpela samting long Jehova. Tingting na laik i stap long bel bilong yu, dispela i bikpela samting long em. Taim yu save long dispela samting, dispela bai kirapim yu long kisim ol kain gutpela pasin i mekim yu i kamap naispela man tru long ai bilong God, laka?