Samuel i Helpim Lotu i Tru

WANPELA profet i krosim ol wanbilip em ol i laik bai wanpela man i kamap king bilong ol, na em i strong long ol i mas bihainim tok bilong God. Bilong kamapim klia olsem em i wanpela profet tru bilong God, em i askim Jehova long wanpela mak, olsem bikpela win na ren. Long dispela taim bilong yia long Israel, em i taim bilong kisim wit long gaden na i no gat bikpela ren i save kam daun. Tasol God i mekim na bikpela ren i pundaun na klaut i pairap. Olsem na ol manmeri i pret nogut tru long Jehova na mausman bilong em, Samuel.​—1 Samuel 12:​11-​19.

Profet Samuel i raitim tu ol stori. Em i bin raitim stori bilong ol samting i bin kamap insait long 330 yia samting, na sampela em ol stori bilong ol Hetman i bin bosim Israel. Stori bilong Samson, em strongpela man tru i winim olgeta narapela man, i bin kirapim ol man long raitim ol naispela stori na singsing, na wokim ol piksa wokabaut i stori long ol samting Samson i bin mekim. (Hetman, sapta 13–16) Samuel i raitim tu stori bilong Rut na tambu mama bilong em Naomi, ol man bilong tupela i dai pinis na ol i stap rabis. Dispela trupela stori na gutpela samting i painim tupela long pinis bilong stori, em tu i save kirapim tru tingting bilong man.​—Rut, sapta 1-4.

Yumi ken lainim wanem samting long ol stori Samuel i bin raitim na long i stap bilong em? Olsem wanem em i bin helpim lotu i tru?

Taim Em i Yangpela Yet

Papa bilong Samuel, Elkana, em i save lotuim Jehova na em i wanpela gutpela man marit. Meri bilong em Hana i strongpela meri bilong lotuim God. Em i no inap karim pikinini. Long haus bilong Jehova long Silo, Hana i beten strong na i mekim strongpela promis olsem: “Bikpela, yu gat olgeta strong. Mi laik yu lukim mi, wokmeri bilong yu. Lukim dispela hevi bilong mi na tingting long mi. . . . Sapos yu givim mi wanpela pikinini man, orait bai mi givim em long yu na bai em i ken i stap wokman bilong yu inap em i dai. Na bilong makim dispela, ol i no ken katim gras bilong en.” (1 Samuel 1:​1-​11) Dispela i makim olsem em bai givim pikinini long Jehova bilong mekim wok bilong em.

Hana i beten long tingting tasol. Baibel i tok maus bilong em i meknais, tasol i no gat toktok i kamap long maus. Hetpris Eli i lukim em na i ting Hana i spak, na em i krosim Hana. Tasol long pasin daun Hana i kamapim hevi bilong em, na Eli i tok: “Yu ken bel isi na yu go. Na God bilong yumi Israel i ken givim yu dispela samting yu bin askim em.” Na tru tru Jehova i mekim olsem. Baibel i tok: “Hana i gat bel na bihain em i karim pikinini man. Na em i tok, ‘Mi bin askim Bikpela long givim mi dispela pikinini. Olsem na mi kolim nem bilong en Samuel.’ ”​—1 Samuel 1:​12-​20.

Papamama bilong Samuel i bin ‘skulim em long ol tok bilong Bikpela.’ (Efesus 6:4) Taim Samuel i lusim susu pinis, Hana i bringim em i go long haus bilong God long Silo na i givim em long Hetpris Eli. Eli i lukautim liklik mangi na em i “mekim wok bilong Bikpela.” Hana i kamapim bikpela amamas bilong em long tok em i mekim bilong tenkyu long Jehova, em bihain Samuel yet i raitim.​—1 Samuel 2:​1-​11.

Sapos yu wanpela papa o mama, yu wok long kirapim ol pikinini bilong yu long mekim wok bilong Jehova fultaim? Wok bilong helpim lotu i tru em i nambawan wok tru yumi ken mekim.

Samuel i lain gut long nupela sindaun bilong em long haus bilong God. “Samuel i mekim wok bilong God na i kamap bikpela liklik,” na “Bikpela wantaim ol man i laikim em.” Em i bihainim ol pasin bilong God, olsem na ol man i laikim em tru.​—1 Samuel 2:​21, 26.

Tasol tupela pikinini man bilong Eli, em Hopni na Finias, tupela i no olsem Samuel. Ol i man nogut tru na “tupela i ting olsem, Bikpela i samting nating.” Tupela i save mekim pasin pamuk na ol i save kisim ol nambawan gutpela hap bilong ol ofa ol man i bringim long haus bilong God. God i salim pinis wanpela profet bilong tokaut long strafe Eli i ken wetim, na wanpela strafe em tupela pikinini bilong em bai i dai. (1 Samuel 2:​12, 15-​17, 22-​25, 27, 30-​34) Long rot bilong Samuel Jehova bai salim narapela tok bilong kotim Eli.

Samuel i Mekim Wok Profet

God i tokim Samuel: “Mi gat tok long [Eli] olsem, bai mi mekim save long famili bilong em na pinisim ol tru, long wanem, tupela pikinini bilong en i bin tok nogut long mi. Na Eli yet i save tupela i mekim dispela pasin, tasol em i no pasim tupela.” Em wanpela strongpela tok Samuel i mas givim long Eli, na Eli i tok em i no ken haitim wanpela hap tok long em. Olsem na Samuel i kamapim olgeta tok bilong Jehova. Em i mas i gat strongpela bel tru long mekim olsem!​—1 Samuel 3:​10-​18.

Taim Samuel i kamap bikpela pinis, olgeta Israel i save em i profet bilong God. (1 Samuel 3:​19, 20) Dispela strafe Samuel i tok profet long en i kirap long taim ol Filistia i kam pait long Israel na ol Israel i lus long pait. Hopni wantaim Finias i dai long pait, na ol Filistia i kisim Bokis Kontrak bilong Jehova. Orait taim Eli i harim olsem tupela pikinini bilong em i dai na ol birua i karim Bokis Kontrak i go, em i pundaun baksait long sia em i sindaun long en, na nek bilong em i bruk na em i dai.​—1 Samuel 4:​1-​18.

Twenti yia bihain, Samuel i kirapim ol Israel long lusim lotu giaman. Ol i harim tok bilong em na ol i kirap rausim ol piksa bilong ol god giaman bilong ol, na ol i tambu long kaikai, na ol i mas autim ol sin bilong ol. Samuel i beten na givim wanpela ofa na kukim olgeta long paia long Jehova. Orait wanem samting i kamap? Taim ol Filistia i kam pait long ol Israel, Jehova i paulim tingting bilong ol na ol i longlong nabaut, na ol Israel i bekim pait na daunim ol birua. Jehova i mekim gut long ol Israel na sindaun bilong ol i kamap gutpela, na ol i kisim bek graun ol Filistia i bin kisim long ol.​—1 Samuel 7:​3-​14.

Tru tumas, Samuel i wok long helpim lotu i tru. Olsem: Sampela gutpela samting ol Israel i kisim long pait, em i tok ol i mas mekim wok long en bilong lukautim haus bilong God. Em i helpim wok bilong stretim rot long mekim ol bung bilong Pasova na stretim wok bilong ol Livai i stap wasman long dua bilong haus bilong God. (1 Stori 9:22; 26:​27, 28; 2 Stori 35:18) Samuel i sindaun long Rama, na long olgeta yia em i save go long sampela taun na harim kot. Em i kisim nem olsem stretpela man na man bilong mekim wankain pasin long olgeta man. Ol man i rispek long Samuel, olsem na em inap helpim ol long ol samting bilong spirit. (1 Samuel 7:​15-​17; 9:​6-​14; 12:​2-5) Stretpela pasin bilong em na pasin bilong tingim lotu i tru i bin kirapim planti man long bihainim pasin bilong em. Olsem wanem long yu? Pasin na wokabaut bilong Samuel i mekim olsem long yu?

Ol Israel i Laikim Wanpela King

Taim Samuel i lapun pinis, em i makim tupela pikinini man bilong em, Joel na Abiya, olsem hetman. Tupela “i no bihainim pasin bilong papa bilong tupela. Nogat. Tupela i laikim tumas long kisim mani, olsem na tupela i save kisim grismani na tupela i paulim kot.” Dispela pasin bilong ol i mekim na ol lida bilong Israel i singaut long kisim wanpela king. (1 Samuel 8:​1-5) Dispela em i samting nogut long ai bilong Samuel. Tasol taim em i beten long Jehova long dispela samting, Jehova i tok: “Yu no ken ting ol i les long yu na ol i laik rausim yu. Nogat. Ol i no laik mi stap king bilong ol, na ol i rausim mi.” (1 Samuel 8:​6, 7) God i tokim Samuel long bihainim laik bilong ol na givim tok lukaut long ol olsem taim ol i stap aninit long wanpela king, bai ol i no stap fri moa long mekim sampela samting i stret ol i ken mekim. Tasol ol i strong long kisim wanpela king, olsem na Jehova i tokim Samuel long makim Sol bilong kamap king.​—1 Samuel 8:​6-​22; 9:​15-​17; 10:1.

Samuel i sapotim dispela samting, maski em i tingting planti long en. Taim ol Israel i winim ol Amon, Samuel i bungim ol manmeri long Gilgal bilong strongim tok olsem Sol i kamap king. (1 Samuel 10:​17-​24; 11:​11-​15) Samuel i stori long olgeta samting i bin painim ol Israel kirap long bipo na i kam inap long dispela taim, na em i tokim king wantaim ol manmeri long bihainim tok bilong Jehova. Samuel i beten na Jehova i harim dispela beten na salim traipela ren i kam olsem yumi bin stori pastaim long en. Dispela traipela ren i mekim na ol manmeri i kamapim rong bilong ol, olsem ol i bin sakim Jehova. Ol i askim Samuel long beten bilong helpim ol, na em i bekim tok olsem: “Mi gat wok bilong beten oltaim long God i helpim yupela. Sapos mi lusim beten bai mi mekim sin long Bikpela. Na mi bai skulim yupela long gutpela na stretpela pasin na yupela i mas bihainim.” Tru tumas, Samuel i gutpela piksa long pasin bilong stap gut long Jehova na lain bilong em! (1 Samuel 12:​6-​24) Olsem wanem long yu? Yu amamas long helpim ol wok bilong God na beten long God i ken helpim ol wanbilip?

Tupela King Bilong Pastaim

Sol em man i gat pasin daun na God i orait long em. (1 Samuel 9:21; 11:6) Tasol bihain em i sakim ol tok bilong God. Olsem: Samuel i bin tokim em long wetim em, tasol em i no laik wet na em i kirap mekim ofa. (1 Samuel 13:​10-​14) Na taim Sol i bikhet na em i no kilim i dai King Agak bilong Amalek, Samuel i tokim em: “Nau Bikpela i rausim yu long wok king, na yu no inap bosim ol Israel moa, . . . na em i givim wok king pinis long wanpela arapela man bilong Israel. Dispela man em i gutpela man na i winim yu.” Samuel yet i kilim i dai Agak na em i tingim Sol na i krai sori long em.​—1 Samuel 15:​1-​35.

Bihain Jehova i tokim Samuel: “Oltaim yu save bel hevi long Sol. Wanem taim bai bel hevi bilong yu i pinis? Mi bin rausim em pinis, na long ai bilong mi em i no moa i stap king bilong Israel.” Orait nau Jehova i salim Samuel i go long Betlehem bilong kapsaitim wel long wanpela pikinini man bilong Jesi bilong makim em long kamap king. Samuel i wok long skelim olgeta wan wan pikinini bilong Jesi i go inap long taim Jehova i tok orait long kapsaitim wel long Devit, em laspela pikinini bilong Jesi. Long dispela de Jehova i skulim Samuel long wanpela bikpela samting, em i tok: “Mi no save skelim ol man olsem ol man i save skelim. Nogat. Ol man i save lukluk long bodi. Tasol mi save lukim tingting na laik bilong man na mi skelim ol.”​—1 Samuel 16:​1-​13.

Samuel i bel hevi long pasin bikhet bilong Sol, olsem na ating bel bilong Samuel i bagarap stret taim Sol i birua long Devit na i laik kilim em i dai! Maski ol dispela hevi i kamap, taim Samuel i lapun pinis em i mekim yet wok bilong Jehova inap long skel bilong em.​—1 Samuel 19:​18-​20.

Samuel i Stap Gutpela Piksa

Taim Samuel i dai, ol Israel i krai sori long dispela profet i gat pasin daun na strongpela bel na i bin stiaim wokabaut bilong planti man. (1 Samuel 25:1) Tru, Samuel i no gutpela olgeta, na sampela taim em i bin popaia taim em i skelim ol samting. Tasol maski Samuel i no inap mekim stret olgeta samting, em i bin givim bel olgeta long lotuim Jehova na em i wok strong tru long helpim ol narapela long mekim olsem.

Kirap long taim bilong Samuel na i kam inap nau, planti senis i bin kamap, tasol stori bilong laip bilong Samuel inap skulim yumi long sampela bikpela samting. Nambawan samting, Samuel i bin bihainim na helpim lotu i tru bilong Jehova. Olsem wanem? Yu save mekim olsem?

[Piksa long pes 16]

TINGIM LAIP BILONG SAMUEL

• Olsem papamama bilong Samuel i bin skulim em long tok bilong God, yu tu i mas ‘skulim ol pikinini bilong yu long tok bilong Bikpela.’​—Efesus 6:4.

• Kirapim ol pikinini bilong yu long bihainim pasin bilong Samuel na mekim wok bilong Jehova fultaim.

• Samuel i bihainim ol gutpela pasin bilong God, olsem na ol narapela i laikim em tru, na em i stap gutpela piksa yumi ken bihainim.

• Samuel i bin wok strong tru long helpim lotu i tru, na yumi tu i mas mekim olsem.

[Piksa long pes 15]

Samuel i helpim lotu i tru na i amamas long helpim ol man long ol samting bilong spirit