Taim Bilong Amamas Long Hap Bilong Bolkan

Em yia 1922. Ol Sumatin Bilong Baibel, em nem bilong ol Witnes Bilong Jehova long bipo, ol i mekim miting long Innsbruck, Ostria. I gat wanpela yangpela man i sindaun harim tok, nem bilong em Franz Brand, em i bilong Apatin long Vojvodina, Serbia. Taim man bilong mekim tok i kolim nem bilong God, em Jehova, bikpela lain man i singaut bikmaus na ol i mekim na i hatwok long em long pinisim tok, olsem na ol i pinisim miting. Tasol ol tok Franz i harim i kirapim em tru, na em i kirap mekim wok bilong autim gutnius bilong Kingdom. Long dispela rot, ol wok bilong spirit i kirap na i go bikpela long wanpela kantri long Bolkan.

LONG tingting bilong planti manmeri long nau, nem Yugoslavia i makim ol bikpela pait na ol man i dai na skin bilong ol i slip nabaut long graun. Ol i tingim bikpela lain manmeri em ol man i kilim i dai, ol refiuji, ol haus i bagarap, na ol pikinini papamama bilong ol i dai pinis. Bikpela pen moa na planti hevi em pait i kamapim i bagarapim tru Bolkan Peninsula long 1991 i go 1995 na dispela i bagarapim tru gutpela sindaun na bel isi ol man i laik kamapim. Ol samting bilong pait i mekim na ol manmeri bilong kantri bipo ol i kolim Yugoslavia, ol i gat bikpela hevi long mani na ol i stap rabis tru.a

Bikpela hevi i painim ol manmeri bilong dispela hap, olsem na yumi ting yumi no inap painim sampela lain i stap amamas. Tasol i gat dispela kain manmeri i stap. Klostu long yia 2000, ol dispela manmeri i kisim narapela kain bikpela amamas. Tasol olsem wanem Franz Brand, em dispela yangpela man yumi stori long em pastaim, i insait long dispela amamas?

Wok Bilong Spirit i Kamap Strong Long Hap Bilong Bolkan

Franz Brand i amamas long tok i tru em i harim na em i tingting olsem em i mas autim gutnius. Em i painim wanpela wok bilong katim gras bilong ol man long Maribor, em wanpela biktaun long Slovenia long boda bilong Ostria, na em i kirap autim tok long ol kastama bilong em, em ol i save sindaun isi na harim ol stori bilong em taim em i wok long katim gras bilong ol. Dispela wok bilong em i mekim na long 1928 samting, wanpela liklik grup bilong autim tok bilong Kingdom i kamap long Maribor. Ol i mekim ol tok bilong Baibel long wanpela haus kaikai, em bihain ol i kolim stret nem bilong en olsem Novi svet (Nupela Taim) Haus Kaikai.

Bihain gutnius i go long olgeta hap bilong dispela kantri. Ol i mekim wok long piksa “Photo–Drama of Creation” (i gat ol film, piksa slait na ol toktok na musik samting ol i rekodim) na wok bilong autim gutnius i go bikpela. Long 1930 samting, taim ol i mekim nogut long ol Witnes Bilong Jehova long Jemani, sampela ol painia bilong Jemani i ranawe i go long Kingdom bilong Yugoslavia na dispela i strongim lain Witnes i stap long dispela hap. Ol i no tingim gutpela sindaun​—⁠ol i go long ol longwe ples bilong dispela kantri i gat planti ol maunten na ol i autim tok. Pastaim i luk olsem liklik lain tasol i harim dispela tok. Long 1942 samting i gat 150 pablisa tasol i putim ripot bilong wok autim tok.

Long 1941, ol i kirap mekim nogut tru long ol Witnes, na ol i mekim olsem i go inap long 1952. Long Septemba 9, 1953, aninit long gavman Komiunis bilong Jeneral Tito, ol Witnes Bilong Jehova i amamas tru taim gavman i orait long wok bilong ol. Long dispela yia yet, i gat 914 pablisa bilong gutnius na namba i wok long go bikpela. Long 1991, namba bilong ol pablisa i go bikpela inap 7,420 na 16,072 i kam long Memorial long dispela yia.

Long Ogas 16 i go 18 bilong yia 1991, namba wan kibung intenesenel bilong ol Witnes Bilong Jehova long dispela kantri i kamap long Zagreb, Kroesia. I gat 14,684 manmeri bilong Kroesia na ol narapela hap i bin bung long dispela kibung. Dispela kibung i bin redim tingting bilong ol manmeri bilong Jehova long ol traim bai kamap bihain. Sampela bilong ol laspela ka long brukim ples bilong sekim ol ka na bas samting long boda bilong Kroesia na Serbia, em ol bas i kisim ol Witnes bilong Serbia i go bek long ples bilong ol. Taim laspela bas i brukim pinis boda, orait ol i pasim dispela boda na pait i kirap.

I Gat As na Lain Bilong Jehova i Amamas

Ol yia bilong pait em taim bilong ol bikpela traim i painim ol Witnes Bilong Jehova long Bolkan. Tasol i gat as na ol i amamas, long wanem, Jehova i bin blesim ol manmeri bilong em na namba i go bikpela tru. Bihain long 1991, namba bilong ol pablisa i autim tok bilong Kingdom long dispela kantri bipo ol i kolim Yugoslavia i bin go bikpela winim 80 pesen. Long sevis yia bilong 2001, i gat olsem 13, 472 pablisa.

Ol ofis i stap long Zagreb na Belgrade (Serbia) i bin lukautim wok bilong ol Witnes Bilong Jehova long olgeta ples i stap insait long kantri bipo ol i kolim Yugoslavia. Tasol namba bilong ol Witnes Bilong Jehova i wok long go bikpela, na tu, gavman i senis senis, olsem na ol i mas wokim ol nupela ofis long Ljubljana (Slovenia), na Skopje (Masedonia). Na ol i wokim tu ol nupela ofis long Belgrade na Zagreb. Inap olsem 140 manmeri i mekim wok long ol dispela ofis. Planti bilong ol em ol yangpela i givim bel tru na i laikim tumas Jehova. Sampela bilong ol i mekim wok bilong tanim tok bilong ol buk samting i helpim man long stadi long Baibel long tok ples Kroesia, Masedonia, Serbia na Slovenia. Em wanpela gutpela blesing tru olsem planti bilong ol buk na nius samting bilong ol Witnes Bilong Jehova long ol dispela tok ples em ol i save wokim long wankain taim olsem bilong tok Inglis. Dispela ol buk na nius samting i mekim gut bel bilong planti manmeri na i helpim ol long wetim gutpela samting i kamap bihain.

Na narapela as na ol i amamas i olsem: Ol brata i mekim wok bilong Jehova fultaim i givim bikpela helpim long ol. Inap sampela yia i go pinis ol i bin wokim planti naispela Haus Kingdom, na dispela tu i mekim na ol kongrigesen i amamas. Tasol i gat bikpela amamas moa bai i kamap bihain. Olsem wanem i gat bikpela amamas moa bai kamap?

Wanpela Narakain Wok

Planti pablisa i save tingting, ‘Bai yumi inap kisim New World Translation long tok ples bilong yumi yet?’ Olgeta yia ol i wet long harim wanpela toksave long dispela samting long kibung distrik. Olsem wanem dispela bikpela wok inap kamap? Ol lain bilong tanim tok long ol dispela tok ples ol i bin kirap mekim dispela wok inap sampela yia tasol i go pinis, na i no gat planti man bilong tanim tok.

Taim Gavening Bodi i skelim pinis ol samting, ol i tok orait long ol lain bilong tanim tok bilong Kroesia, Masedonia na Serbia i wok bung wantaim na narapela i kisim helpim long wok na toktok narapela i mekim. Ol lain bilong Kroesia long tanim tok i mas go pas long dispela wok.

De Bilong Bikpela Amamas

Ol Witnes Bilong Jehova long Bolkan i no inap lusim tingting long Julai 23, 1999. Ol “Tok Profet Bilong God” Kibung Distrik i mas kamap long wankain taim long Belgrade, Sarajevo (Bosnia-Hetsagovina), Skopje, na Zagreb. Inap sampela mun ol i no save gut olsem ol inap holim kibung long Belgrade o nogat, long wanem, i tambu long mekim ol miting taim ol soldia bilong lain NATO i tromoi bom. Orait sampela mun bihain ol brata i amamas tru long harim olsem ol inap bung wantaim ol narapela brata. Tasol samting i kamap i winim tru samting ol i ting bai kamap.

Long Fraide apinun, wanpela bikpela toksave i kamap long olgeta 4-pela biktaun em kibung i kamap long en. Inap 13,497 i bin go long ol dispela kibung na ol i stap isi na redi long harim toksave bai kamap. Orait bihain man i mekim tok i tokaut long ol inap kisim nupela buk New World Translation of the Christian Greek Scriptures long tok ples Kroesia na Serbia, na em i toksave olsem ol i wok yet long tanim long tok ples Masedonia. Em nau, ol manmeri i kam long dispela kibung i no inap long pasim amamas bilong ol. Ol i paitim han strong tru na ol i no larim man bilong mekim tok i pinisim dispela toksave. Long kibung i kamap long Sarajevo, olgeta manmeri i pasim maus na i stap isi, long wanem, ol i kirap nogut tru long toksave i kamap. Bihain ol i paitim han inap longpela taim. Aiwara bilong amamas i pundaun long pes bilong planti manmeri long Belgrade, na ol i paitim han planti taim na man bilong mekim tok i hatwok long pinisim toksave. Olgeta i amamas tru!

Dispela presen em i dia tumas, long wanem, ol Witnes Bilong Jehova i kisim tok orait long prinim Baibel long tok ples Kroesia na Serbia. Olsem na ol i bungim New World Translation of the Christian Greek Scriptures bilong tok ples Kroesia wantaim Ol Skripsa Hibru i stap long dispela tok ples na ol i wokim olsem wanpela volium, na ol i mekim olsem tu long New World Translation of the Christian Greek Scriptures long tok ples Serbia. Na tu, Baibel long tok ples Serbia ol i prinim long rait Roman na Sirilik.

Lain bilong Jehova long Bolkan ol i tenkyu long olgeta gutpela blesing na helpim ol i kisim, na ol i wanbel wantaim tok bilong Devit, em i tok: “God, maski mi wokabaut long ples nogut na bikpela tudak, mi no ken pret long samting nogut, long wanem, yu stap wantaim mi.” Maski ol i wok yet long karim ol bikpela hevi, ol i tingting strong olsem ol bai “amamas long Bikpela na bai em i strongim [ol].”​​—⁠Song 23:4; Nehemia 8:​10.

[Futnot]

[Piksa long pes 20]

Ol namba wan lain pablisa bilong Maribor, Slovenia, ol i autim tok long longwe teritori